មជ្ឈដ្ឋានទូទៅបានសម្តែងការខកចិត្ត ចំពោះដំណើរការថយក្រោយ នៃការចរចារវាងគណបក្សទាំងពីរ ដែលទើប​នឹងបានធ្វើលើកចុងក្រោយនេះ ដោយមិនបានចេញសេចក្ដីប្រកាសរួមអ្វីទាំងអស់។ មិនត្រឹមតែប៉ុណ្ណឹង គណបក្ស​សង្គ្រោះ​ជាតិ តាមរយៈប្រធានគណបក្ស លោក សម រង្ស៊ី បានប្រកាសផ្អាកការចរចានេះ ដោយសំអាង​ហេតុផលថា គណបក្សប្រជាជនកម្ពុជា គ្មានបំណងចង់កែទម្រង់ស្ថាប័នគ.ជ.ប និងចូលតុចរចាដើម្បីគ្រាន់តែបង្អូសពេល​វេលានៃ​ការ​កាន់​អំណាចរបស់ខ្លួនតែប៉ុណ្ណោះ។ សូមអានការវិភាគរបស់ អ្នកវិភាគឯករាជ្យ លោក កែម ឡី ជុំវិញបញ្ហានេះ។

គូរបដិបក្ខនយោបាយកម្ពុជាដ៏ធំទាំងពីរ សម រង្ស៊ី (ខាងឆ្វេង) និង ហ៊ុន សែន។ (រូបថត ឯកសារ)

នយោបាយកម្ពុជា - លោកកែម ឡី ជាអ្នកស្រាវជ្រាវបញ្ហាសង្គម និងជាអ្នកវិភាគនយោបាយឯករាជ្យកម្ពុជា បាន​ថ្លែងប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី១១ ខែមីនា នេះថា ការចរចាដែលគួរឲ្យជឿជាក់ និងរំពឹងថានឹង​ទទួលបានលទ្ធផល គឺចាំបាច់ណាស់ត្រូវកំណត់គោលការណ៍ឲ្យបានច្បាស់លាស់។ លោកកែម ឡី បញ្ជាក់ថា៖ «ការចរចារបស់គណបក្សទាំងពីរ គួរផ្តោតលើនយោបាយវិញ ជាជៀងផ្តោតលើបច្ចេកទេស ព្រោះបច្ចេកទេស យើងត្រូវចំណាយពេលយូរ ១ឆ្នាំអីនោះ បានហើយ»។

ក្នុងឆន្ទៈរួម ដើម្បីទម្លាយភាពជាប់គាំងផ្នែកនយោបាយ គណបក្សសង្រ្គោះជាតិ និងគណបក្សប្រជាជនកម្ពុជា តាម​រយៈក្រុមការងារបច្ចេកទេសម្ខាង៦នាក់ បានបន្តចរចាលើការកែទម្រង់ការបោះឆ្នោតជាបន្តបន្ទាប់ តែការចរចាចុង​ក្រោយនៅថ្ងៃទី១០ ខែមីនា គណបក្សទាំងពីរ មិនបានចេញសេចក្តីថ្លែងការណ៍រួមដូចសព្វដងនោះទេ។ ផ្ទុយទៅ​វិញ​គណបក្សទាំងពីរ បានចេញសេចក្តីថ្លែងការណ៍រៀងៗខ្លួន ដែលបង្ហាញពីគោលជំហរមិនចុះសម្រុងគ្នា តែគណបក្ស​ទាំងពីរ ក៏បានអះអាងថានឹងបន្តចរចាជាមួយគ្នាទៀត។

ចំពោះករណីនេះ ត្រូវបានលោកកែម ឡី ពន្យល់ថា ទង្វើរបស់គណបក្សទាំងពីរ គឺតំណាងឲ្យអាយុជីវិតប្រជាពលរដ្ឋ និងប្រទេសជាតិ ដូច្នេះក្រោយការចរចាគណបក្សទាំងពីរគួរធ្វើកំណត់ត្រាបង្ហាញលទ្ធផល ក្នុងពេលប្រជុំឲ្យប្រជា​ពលរដ្ឋបានដឹង។ លោកកែម ឡី បញ្ជាក់ថា៖ «ការចរចាដែលមិនមានផែនការច្បាស់លាស់ គឺគ្រាន់តែជារបៀប​បញ្ឆោតប្រជាពលរដ្ឋ ហើយអាកប្បកិរិយានេះ មិនទទួលការគាំទ្រពីប្រជាពលរដ្ឋច្រើននៅពេលអនាគតនោះទេ»។

គួរកត់សម្គាល់ថា បើទោះជាគណបក្សបក្សទាំងពីរ បានបន្តចរចាជាមួយគ្នាជាបន្តបន្ទាប់ក៏ដោយ ក៏ចំណុចខ្វែង​គំនិត​គ្នាដែលជាឬសគល់នៃភាពជាប់គាំងផ្នែកនយោបាយ នៅតែឃ្លាតឆ្ងាយពីរបៀបវីរៈនៃការចរចានៅឡើយ ព្រោះ​គណបក្សង្រ្គោះជាតិ នៅបន្តធ្វើពហិការមិនចូលប្រជុំសភា និងទាមទារឲ្យបោះឆ្នោតមុនបញ្ចប់អាណត្តិឡើងវិញ។ តែការទទូចនេះ ត្រូវបានគណបក្សប្រជាជនកម្ពុជា បដិសេធ។

ជុំវិញករណីនេះ លោកកែម ឡី បញ្ជាក់ថា៖ «បើសិនជាគណបក្សទាំងពីររកសេនារ៉េយោ (scénario) ល្អ បានន័យថា​គណបក្ស​ទាំងពីរ បន្ទន់ឥរិយបថពីគ្នាបន្តិច ទៅវិញទៅមក ខ្ញុំគិតថាអាចជួយគ្នាបាន។ គណបក្សប្រជាជន​អាច​បើក​ផ្លូវឲ្យបោះឆ្នោតអាណត្តិទី៦ មុនអាណត្តិ នៅឆ្នាំណាមួយ ហើយគណបក្សសង្រ្គោះជាតិ បើគណបក្សប្រជាជនយល់​ព្រមបោះឆ្នោត គណបក្សសង្រ្គោះជាតិ គួរតែយល់ព្រមចូលសភា ដើម្បីបំពេញសុពលភាពច្បាប់ពីអន្តរជាតិ ហើយ​យើងអាចទាញប្រយោជន៍មកអភិវឌ្ឍន៍ប្រទេសយើងបានច្រើន។»៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១១ មីនា ២០១៤