បន្ទាប់ពីមានអ្នកការសែតមួយចំនួនបានទទួលរងរបួស និងខូចខាតសម្ភារៈ ក្នុងពេលសមត្ថកិច្ចចុះបង្រ្កាបបាតុកម្ម​របស់​លោក ម៉ម សូណង់ដូ ក្លឹបអ្នកការសែតកម្ពុជាបានចេញសេចក្តីថ្លែងការណ៍ អំពាវនាវដល់គ្រប់ភាគីទាំងអស់ គម្បីជៀងវៀងការប៉ះពាល់​ដល់​អ្នកការសែត និងត្រូវរួមចំណែកផ្តល់សុវត្ថិភាពដល់អ្នកការសែត ក្នុងពេល​ដែល​ពួក​គេចុះបំពេញបេសកកម្មការងារ។

សារព័ត៌មានដែលចេញផ្សាយនៅក្នុងស្រុក។

សេរីភាពសារព័ត៌មាន - លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា បានថ្លែងប្រាប់ទស្សនាវដ្តី​មនោរម្យ.អាំងហ្វូ នៅថ្ងៃទី២៨ ខែមករា ឆ្នាំ២០១៤ នេះថា ក្លឹបអ្នកការសែតកម្ពុជានឹងចេញសេចក្តីថ្លែងការណ៍ អំពាវនាវដល់គ្រប់ភាគីទាំងអស់ រួមទាំង​សមត្ថកិច្ច អង្គការសង្គមស៊ីវិល និងបាតុករប្រឆាំងរដ្ឋាភិបាល ត្រូវរួម​ចំណែកផ្តល់សុវត្ថិភាពដល់អ្នកការសែត និង​គម្បីឲ្យតម្លៃដល់អ្នកការសែតក្នុងផ្លូវល្អ។ លោក ប៉ែន សមិទ្ធិ បន្តថា រឿងប្រើហិង្សាលើអ្នកការសែត មិនមែនទើប​តែកើតឡើងក្នុងពេលនេះនោះទេ គឺបានកើតឡើង​តាំងពីដើមមក​ជាបន្តបន្ទាប់។

ប្រធានក្លឹបអ្នកកាសែតកម្ពុជារូបនេះបញ្ជាក់ថា៖ «មិនមានអ្វីដាក់សម្ពាធលើអ្នកការសែតនោះទេ ព្រោះពួកគេមាន​វិជ្ជាជីវៈហើយ តែគ្រាន់តែថតរូបត្រូវគេវ៉ៃ។ ក្នុងពេលចុងក្រោយនេះ អ្នកការសែតប្រឈមមែនទែន ដោយទទួលការ​រើសអើងពីសមត្ថកិច្ច និងបាតុករប្រឆាំងរដ្ឋាភិបាលផងដែរ។ ដូច្នេះ គ្រប់ភាគីនៅកន្លែងកើតហេតុ ​គួរមើលអ្នក​ការសែតក្នុងផ្លូវវិជ្ជមានឲ្យបានច្រើន ព្រោះអ្នកការសែតគ្មានអ្វីក្រៅពីម៉ាស៊ីនថត និងប៊ិច(...)។»

គួររម្លឹកថា នៅថ្ងៃទី២៧ ខែមករា ឆ្នាំ២០១៤ អ្នកកាសែតជាតិ និងអន្តរជាតិមួយចំនួនបានរងរបួស និងខូចខាត​សម្ភារៈដោយសារការប៉ះទង្គិចពីកម្លាំងកងរាជអាវុធហត្ថ ដែលចុះបង្ក្រាបបាតុកម្មអហិង្សា ទាមទារហ្វ្រេកង់ទូរទស្សន៍ និងទាមទារកម្លាំងផ្សាយវិទ្យុបន្ត ដឹកនាំដោយលោក ម៉ម សូណង់ដូ ប្រធានវិទ្យុសំបុកឃ្មុំ ។

ចំពោះករណីប៉ះទង្គិចដែលបណ្តាលអ្នកអ្នកការសែតរងរបួស និងខូចខាតសម្ភារៈនេះ ក៏ត្រូវបានលោក សយ សុភាព អគ្គនាយក​មជ្ឈមណ្ឌលព័ត៌មាន ដើមអំពិល បញ្ជាក់តាមរយៈស្ថាប័នព័ត៌មានរបស់ខ្លួនថា៖  «ខ្ញុំសូម​អំពាវ​នាវ​ដល់​អគ្គស្នងការនគរបាលជាតិ និងមេបញ្ជាការកងរាជអាវុធហត្ថលើផ្ទៃប្រទេស មេត្តាយោគយល់កុំឲ្យ កម្លាំងសមត្ថកិច្ច​ទាំងពីរប្រភេទ ប្រើអំពើហិង្សាលើអ្នកកាសែតអី ហើយក៏សូមឲ្យអភិបាលរាជធានីភ្នំពេញ មេត្តាយោគយល់​ផង​ដែរ»។

ជុំវិញការអំពាវនាវទាំងនេះ ទស្សនាវដ្តីមនោរម្យ.អាំងហ្វូ មិនទាន់អាចទាក់ទងអ្នកនាំពាក្យកងរាជអាវុធហត្ថលើផ្ទៃ​ប្រទេស និងអ្នកនាំពាក្យអគ្គស្នងការនគរបាលជាតិ ដើម្បីធ្វើការអត្ថាធិប្បាយបាននៅឡើយ។ តែបើយោងលើ​មេ​បញ្ជាការ​កងរាជអាវុធហត្ថរាជធានីភ្នំពេញ លោក រ័ត្ន ស្រ៊ាង ដែលជាអ្នកដឹកនាំកម្លាំងសមត្ថកិច្ច បំបែកបាតុកម្មរបស់​លោក ម៉ម សូណង់ដូ បានបញ្ជាក់មុនការបង្រ្កាបថា៖ «អ្នកសារព័ត៌មានទាំងអស់ត្រូវចេញឲ្យ​ឆ្ងាយពីរង្វង់ប្រតិបត្តិការ​របស់សមត្ថកិច្ច បើមិនដូច្នេះទេ សមត្ថកិច្ចមិនទទួលការខុសត្រូវ ចំពោះការប៉ះទង្គិច ឬការខូចខាតនោះទេ»៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២៨ ខែមករា ឆ្នាំ២០១៤