ក្នុងពេលដែលវិបត្តិនយោបាយកម្ពុជាបច្ចុប្បន្ន ត្រូវបានគេមើលឃើញថា កំពុងមានភាពកាន់តែជ្រាលជ្រៅនោះ អ្នក​វិភាគនយោបាយឯករាជ្យកម្ពុជាក៏បានសម្តែងការព្រួយបារម្ភយ៉ាងខ្លាំង និងទូចឲ្យគណបក្សប្រជាជនកម្ពុជា និង​គណបក្សស្រង្រ្គោះជាតិ គួរធ្វើសម្បទានឲ្យគ្នាទៅវិញទៅមក ដោយធ្វើយ៉ាងណាឲ្យវិបត្តិនយោបាយនេះ ត្រូវបិទ​បញ្ចប់ឲ្យបានឆាប់ ដើម្បីផ្តល់ភាពកក់ក្តៅដល់ប្រជាពលរដ្ឋ និងជាការជម្រុញឲ្យប្រទេសកម្ពុជា ធ្វើដំណើរទៅមុខ​ដោយប្រក្រតីភាព។

បណ្ឌិតកែម ឡី អ្នកវិភាគនយោបាយកម្ពុជាឯករាជ្យ នៅក្នុងសន្និសីទការសែតថ្ងៃទី១៣ ខែមករា ឆ្នាំ២០១៤ នៅសណ្ឋាគារ​អ៊ីមភើរៀល។ (រូបថត MONOROOM.info/ O. Vary)

នយោបាយកម្ពុជា - លោក កែម ឡី អ្នកវិភាគនយោបាយកម្ពុជាឯករាជ្យ ក្នុងពិធីមួយនៅសាកលវិទ្យល័យខេមរៈ នៅថ្ងៃទី១៣ ខែមករា ឆ្នាំ២០១៤ នេះ បានពន្យល់ថា គួរដល់ពេលហើយដែលគណបក្សប្រជាជនកម្ពុជា និង​គណបក្ស​សង្រ្គោះជាតិ ថយមួយជំហានម្នាក់ ដើម្បីផ្តល់ប្រយោជន៍ពិតប្រាកដដល់ពលរដ្ឋ និងប្រទេសកម្ពុជា ជាជាងការយក​ឈ្នះតែរៀងៗខ្លួន ដើម្បីឡើងទៅកាន់អំណាច ដោយមិនមានការព្រួបារម្ភ ពីផលលំបាកដែលកើត​ចេញការប្រកួត​ប្រជែង​ទាំងនោះ។

អ្នកវិភាគដដែលនេះលើកឡើងថា វាជារឿងគ្រោះថ្នាក់ និងគួរឲ្យព្រួយបារម្ភខ្លាំងណាស់ ពីជោគ​វាសនារបស់ប្រទេស​កម្ពុជា នៅពេលដែលគណបក្សសង្រ្គោះជាតិ ប្តឹងមន្រ្តីរដ្ឋាភិបាល ឬមន្រ្តីគណបក្សប្រជាជនកម្ពុជា ទៅតុលាការ​ព្រហ្មទណ្ឌអន្តរជាតិ រីឯគណបក្សប្រជាជនកម្ពុជា ឬរដ្ឋាភិបាល ប្តឹងមន្រ្តីគណបក្សសង្រ្គោះជាតិទៅកាន់​តុលាការ​កម្ពុជា ក្នុងពេលដែលស្ថានការណ៍នយោបាយកំពុងមានភាពតានតឹង និងដោះស្រាយមិនទាន់រួចផងនោះ ព្រោះ​គណបក្ស​មួយ​អាងកម្លាំងប្រជាពលរដ្ឋ រីឯគណបក្សមួយទៀតអាងកម្លាំងប្រដាប់អាវុធដែលពួកគេជាខ្មែរដូចគ្នា។

លោក កែម ឡី បានបញ្ជាក់ថា៖ «គណបក្សទាំងពីគួរធ្វើការជាមួយគ្នាក្នុងសភា ហើយព្រមព្រៀងធ្វើវិសោធនកម្ម​រដ្ឋធម្មនុញ្ញ ដោយអនុញ្ញាតឲ្យបោះឆ្នោតមុនអាណត្តិឡើងវិញ មុនឆ្នាំ២០១៥ ឬក្រោយឆ្នាំ២០១៦។ (...) គណបក្ស​ទាំងពីខាតមួយជំហានម្នាក់ តែអ្នកចំណេញគឺប្រជាពលរដ្ឋ និងប្រទេសកម្ពុជាទាំងមូល ព្រោះបានបញ្ចប់វិបត្តិ​នយោបាយ និងសេដ្ឋកិច្ចអាចដំណើរការឡើងវិញបានល្អ។»

ជុំវិញករណីនេះទស្សនាវដ្តីមនោរម្យព័ងអាំងហ្វូមិនអាចទាក់ទង មន្រ្តីអ្នកនាំពាក្យគណបក្សង្រ្គោះជាតិ និងគណបក្ស​ប្រជាជនកម្ពុជាដើម្បីធ្វើការអត្ថាធិប្បាយបាននៅឡើយទេ។ តែបើយោងលើគោលជំហររបស់ គណបក្សទាំងពីរ​ក្នុង​ពេលចុងក្រោយ បានបង្ហាញថា នៅតែមិនទាន់ឯកភាពគ្នានៅឡើយ ព្រោះគណបក្សសង្រ្គោះជាតិ មិនទទួល​ស្គាល់​រដ្ឋាភិបាល និងរដ្ឋសភា«ឯកបក្ស»បច្ចុប្បន្ន ហើយទាមទារឲ្យបោះឆ្នោតមុនបញ្ចប់អាណត្តិឡើងវិញ ក្រោយ​ការធ្វើ​កំណែទម្រង់គណៈកម្មាធិការជាតិរៀបចំការបោះឆ្នោត(គ.ជ.ប)។

រីឯគណបក្សប្រជាជនកម្ពុជា បើទោះជាចង់ចរចាជាមួយគណបក្សសង្រ្គោះជាតិ តែបានអះអាងពីភាពស្រប​ច្បាប់​របស់រដ្ឋាភិបាល និងរដ្ឋសភាបច្ចុប្បន្ន ហើយក៏បានបដិសេធការឆ្នោតមុនបញ្ចប់អាណត្តិឡើងវិញផងដែរ។ ជាងនេះ​ទៅទៀតគណបក្សគ្រប់គ្រងអំណាចមួយនេះ បានប្ដេជ្ញាប្រើប្រាស់កម្លាំងប្រដាប់អាវុធ គ្រប់គ្រងដោយរដ្ឋាភិបាល​គណបក្សប្រជាជនកម្ពុជា ក្នុងការការពារស្ថាប័នដែលត្រូវបានគណបក្សសង្រ្គោះជាតិបដិសេធមិនទទួលស្គាល់៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៣ ខែមករា ឆ្នាំ២០១៤