«ខ្ញុំជឿថា ការដាក់ញត្តិទៅ អង្គការសហប្រជាជាតិ នឹងបានយកទៅជជែកពិភាក្សា ព្រមទាំងដាក់សំពាធកាន់តែខ្លាំង លើរដ្ឋាភិបាលដែលដឹកនាំដោយលោក ហ៊ុន សែន ដើម្បីជំរុញអោយឈប់ជាបន្ទាន់ ការបំភិតបំភ័យប្រើហិង្សា​លើ​ប្រជាពលរដ្ឋ»។ នេះជាការបញ្ជាក់ របស់លោក ស មួរ៉ា ប្រធានសហពន្ធ័សហជីពកម្មករចំណីនិងសេវាកម្ម ទៅកាន់​អ្នកសារព័ត៌មាននៅថៃ្ងទី១៣ ខែមករា ឆ្នាំ២០១៤។

លោក ស មួរ៉ា ប្រធានសហពន្ធ័សហជីព​កម្មករ​ចំណី​ និងសេវាកម្ម នៅមុខការិយាល័យឧត្តម​ស្នងការអង្គការសហប្រជា​ជាតិ ប្រចាំកម្ពុជា ថ្ងៃទី១៣ ខែមករា ឆ្នាំ២០១៤។ (រូបថត MONOROOM.info/ O.Vary)

វិបត្តិការងារ - ក្នុងបទសំភាសន៍ជាមួយអ្នកកាសែតជាច្រើននាក់ លោក ស មួរ៉ា ប្រធានសហពន្ធ័សហជីព​កម្មករ​ចំណី​ និងសេវាកម្ម និងជាតំណាងផ្ទះសាមគ្គី រួមជាមួយក្រុមការងារដែលធ្វើការផ្នែកសិទ្ធិមនុស្ស បានមកដាក់ញតិ្ត​ជូនឧត្តម​ស្នងការអង្គការសហប្រជាជាតិទទួលបន្ទុកសិទ្ធិមនុស្ស បានពន្យល់ថា ការដាក់ញត្តិនេះ គឺដើម្បីអោយ​មានការ​ដោះ​លែងសកម្មជនសិទ្ធិមនុស្ស លោក វន់ ពៅ និង កម្មករទាំង២២នាក់ដទៃទៀត។

លោក មួរ៉ា ក៍បានអះអាងដែរថា ប្រសិនជាបញ្ហាមិនមានការដោះស្រាយ និងដោះលែងសកម្មជនទាំងនោះទេ លោក និងក្រុមការងារសិទ្ធិមនុស្សនៅបន្តជួបជុំ ធ្វើយុទ្ធនាការយកញត្តិជូនស្ថានទូតអន្តរជាតិ និងប្រទេសមហាអំណាច រាល់​៣ថៃ្ងម្តងៗ ក្នុងគោលបំណងអោយស្ថាប័នទាំងនោះ ជួយធ្វើអន្តរាគមន៍ និងយកចិត្តទុកដាក់លើបញ្ហាសិទ្ធិមនុស្ស​នៅ​កម្ពុជា។

ជុំវិញការដាក់ញត្តិនេះ លោក ចាន់ សូវេត មន្ត្រីមកពីសមាគមការពារសិទ្ធិមនុស្សអាកហុក បានយល់ឃើញថា នេះ​ជាបែបបទនៃ​ការតស៊ូ​មតិ និងជានិតិវិធីសមរម្យសំរាប់សង្គមប្រជាធិបតេយ្យ ជាមួយការចរចាដោយសន្តិវិធី និងមិន​ប្រើទេកងកំលាំងប្រដាប់​អាវុធមកដោះស្រាយ។ លោកបានអោយឧទាហរណ៍ដែរថា ការទាមទារមានច្រើន​បែប​ដូច​ជាខាងសហជីពទាមទារ​អោយដំឡើងប្រាក់ខែសមរម្យ ខាងគណបក្សសង្គ្រោះជាតិទាមទារអោយ បោះឆ្នោត​ឡើង​វិញ និងខាងសង្គមស៊ីវិលតម្រូវអោយមានការបើកចំហព័ត៌មាន និងគោរពសិទ្ធិប្រជាពលរដ្ឋ ហើយកង្វល់​ទាំងនេះ​គឺ​ទាមទារអោយមាន​ដំណោះ​ស្រាយផងដែរ។

ទស្សនាវដ្តីមនោរម្យព័ងអាងហ្វូ នៅមិនអាចសុំការបញ្ជាក់ពីបញ្ហាខាងលើនេះ ដោយមន្រ្តីរាជរដ្ឋាភិបាល​បាននៅ​ឡើយ​ នៅថ្ងៃអង្គារទី១៤ ខែមករានេះ។ តែលោក ជាម យៀម មន្រ្តីជាន់ខ្ពស់នៃគណបក្សប្រជាជនកម្ពុជា ក្នុងកិច្ច​សម្ភាសជាមួយទស្សនាវដ្តីតាមទូរស័ព្ទកាលពីថ្ងៃទី១០ ខែមករា កន្លងមកបានបញ្ជាក់ថា «ដោយសារតែមានការ​ប្រើ​នូវហឹង្សា ទើបមានការចាប់ខ្លួនទាំងនេះ»។ លោកបានបន្តរថា ការស្នើសុំឲ្យមានការដោះលែង ជាលទ្ធភាព​របស់​តុលាការ ដើម្បីធ្វើការស្រាវជ្រាវ និងប្រមូលផ្តុំនូវរាល់ឯកសារដែលពាក់ព័ន្ធទាំងអស់។ លោកបានបញ្ជាក់​ដោយខ្លី​យ៉ាងដូច្នេះថា «លែង មិនលែង ជាសិទ្ធិរបស់តុលាការ។ (…) អ្នកណាមានទោស អ្នកណាដែលត្រូវរួចខ្លួន​យ៉ាងណា​នោះ ស៊ីសងលើតុលាការ។»

សូមរម្លឹកដែរថា កាលពីថ្ងៃទី ០២ ខែមករា សប្តាហ៍មុន លោក វន់ ពៅ ប្រធានសមាគមប្រជាធិបតេយ្យ​ឯករាជ្យ​នៃ​សេដ្ឋកិច្ចក្រៅប្រព័ន្ធ បានដឹកនាំកម្មករប្រមាណជាង ១០០ នាក់ ធ្វើការតវ៉ាទាមទារប្រាក់ខែគោល ១៦០ ដុល្លារ តែត្រូវ​ទទួលការបង្ក្រាប់ពីកងកម្លាំងយ៉ាងចាស់ដៃ ដែលអង្គការជាតិ និងអន្តរជាតិសំដែងប្រតិកម្មដោយចាត់ទុកថា ជាការ​ដើរផ្ទុយលទ្ធិប្រជាធិបតេយ្យ និងរំលោភសិទ្ធិមនុស្សយ៉ាងធ្ងន់ធ្ងរ៕

--------------------------------------
ដោយ ក. ស៊ន សុខឃៀង (ទំនាក់ទំនង៖ [email protected]) - ភ្នំពេញ ថ្ងៃទី១៤ ខែមករា ឆ្នាំ២០១៤