ទំព័រហ្វេសប៊ុកមួយដែលទើបនឹងពន្លេចខ្លួនឡើង កាលពីពេលថ្មីៗនេះ បានបញ្ឆេះចម្ងល់ទៅដល់ អ្នកប្រើប្រាស់​បណ្ដាញ​សង្គមហ្វេសប៊ុកទាំងឡាយ ថាតើទំព័រនេះអាចជាទំព័រពិត និងផ្ទាល់របស់លោកនាយករដ្ឋមន្ត្រី ហ៊ុន សែន ឬយ៉ាងណា? ទំព័រដែលបានបណ្ដែតខ្លួនរហូតមកដល់ថ្ងៃទី១០ ខែមករា ឆ្នាំ២០១៤នេះ តែបានពន្លិចខ្លួនបាត់ទៅវិញ​នៅថ្ងៃបន្ទាប់។

រូបថត ផ្ដិតចេញពីអេក្រង់របស់ទំព័រហ្វេសប៊ុកថ្មីនោះ ដែលដាក់ខ្លួនឯងជាលោក ហ៊ុន សែន។

បណ្ដាញសង្គម - ទំព័រហ្វេសប៊ុកនោះ ទើបតែត្រូវបានបង្កើតឡើង កាលពីថ្ងៃទី០៨ ខែមករា ឆ្នាំ២០១៤នេះប៉ុណ្ណោះ។ ម្ចាស់ទំព័របានដាក់ប្រវត្តិរូបរបស់ខ្លួន ដូចទាំងស្រុងទៅនឹងលោកនាយករដ្ឋមន្ត្រីហ៊ុន សែន ដូចជាមានស្រុក​កំណើត​នៅក្រុងកំពង់ចាម និងស្រុកកំពង់ចាម និងពេលបច្ចុប្បន្នមានទីលំនៅក្នុងរាជធានីភ្នំពេញ ព្រមទាំងដាក់កំរិតវប្បធម៌​ថាបានសិក្សានៅវត្ត នោះជាដើម។ មិនត្រឹមតែដូច្នេះទេ ម្ចាស់ទំព័រថែមទាំងបានប្រើប្រាស់ពាក្យពេចន៏ជាច្រើន ក្នុង​នាមលោក ហ៊ុន សែន ផ្ទាល់ ដើម្បីបង្ហាញនូវសារមួយចំនួន ជូនចំពោះអ្នកប្រើប្រាស់បណ្ដាញហ្វេសប៊ុកទាំងអស់។

សារដែលគួរឲ្យចាប់អារម្មណ៍ចំនួនបី ដែលម្ចាស់ទំព័រហ្វេសបុកនោះ តាំងនាមជាលោក ហ៊ុន សែន នាយករដ្ឋមន្ត្រី​កម្ពុជា បានសរសេរ​ដាក់លើ«ជញ្ជាំង»ទំព័រដែលទើបបង្កើតថ្មីនេះគឺ៖

«ខ្ញុំដឹងច្បាស់ណាស់ ថាអ្នកទាំងអស់គ្នាចង់បានអ្វី តែខ្ញុំពិតជាសោកស្តាយណាស់ ដែលមិនអាចបំពេញ​បំណង​អ្នក​ទាំងអស់គ្នាបាន ! សង្ឃឹមថាអ្នកទាំងអស់គ្នានឹងយល់នាថ្ងៃណាមួយមិនខាន ពីខ្ញុំ ហ៊ុន សែន» សារនេះត្រូវបាន​សរសេរភ្ជាប់ជាមួយ នឹងរូបភាពក្បួនដង្ហែរបាតុកម្មមួយ របស់គណបក្សសង្គ្រោះជាតិ។

ចំណែកប្រយោគបន្ទាប់មកទៀត ហាក់បានស្តែងពីទឹកចិត្តនៃការបើកចំហ របស់លោកនាយករដ្ឋមន្ត្រី ចំពោះសិទ្ធិ​សេរីភាព​ក្នុងការបញ្ចេញមតិ ដែលមានជាអាថ៌ថា «ចាប់ពីពេលនេះទៅខ្ញុំរៀនប្រើ ហ្វេសប៊ុក ដើម្បីឆ្លើយតបរាល់​សំណូមពររបស់ពលរដ្ឋ ដើម្បីធ្វើការស្ថាបនា រាល់ទង្វើនៃការដឹកនាំរបស់ខ្ញុំ បងប្អូនជនរួមជាតិចង់បញ្ចេញមតិអ្វី ក៏​បញ្ចេញមកចុះ ខ្ញុំរីករាយចាំស្តាប់និងវិភាគ»។

ប៉ុន្តែឃ្លានេះ អ្នកដែលបានអានហើយ ច្បាស់ជាអត់ទ្រាំមិនសរសើរថាពិតជា«ពិរោះស្ដាប់»មែន តែ«មិនពិរោះឃើញ»​នោះទេ ដោយសារនៅពេលបច្ចុប្បន្ន  អាជ្ញាធរក្រោមការដឹកនាំរបស់លោក នាយករដ្ឋមន្ត្រីរូបនេះ បានចេញការហាម​ប្រាមមិនឲ្យមានការជួបជុំគ្នា ឬធ្វើការសម្ដែងមតិជាសាធារណៈអ្វីឡើយ។

រីឯឃ្លាដំបូងដែលម្ចាស់ហ្វេសប៊ុកដដែលបានសរសេរ ហើយដែលគេធ្លាប់បានលឺលោក ហ៊ុន សែន ផ្ទាល់ធ្លាប់និយាយ​នោះ៖ «ខ្ញុំ ហ៊ុន សែន តែងតែទទួលបាននូវការគាំទ្រ ស្រឡាញ់ និងជឿទុកចិត្តរាល់សកម្មភាពនៃការដឹកនាំប្រទេស អស់រយៈពេលជាង២០ឆ្នាំ វាស្ទើតែពាក់កណ្តាលនៃជីវិតរបស់ខ្ញុំទៅហើយ ពីសំណាក់ប្រជាពលរដ្ធទូទាំងប្រទេស។ តែដោយសារមន្ត្រីថ្នាក់ក្រោមមួយចំនួន បានបំផ្លិចបំផ្លាញ់ស្ទើខ្ទិចខ្ទីអស់ ប្រព្រឹត្តនូវទង្វើអមនុស្សធម៍ទៅលើប្រជាជន ជាហេតុធ្វើឲ្យប៉ះពាល់ដល់កេត្តរិ៍ឈ្មោះ និងការដឹកនាំរបស់ខ្ញុំ ដែលបានខិតខំប្រឹងប្រែងកន្លងមក។ ទង្វើអាក្រក់របស់​អ្នកទាំងអស់គ្នា ហាក់ដូចជាដុតរូបខ្ញុំទាំងរស់ បើអ្នកពិតជាស្រឡាញ់ គាំទ្រខ្ញុំ សូមបញ្ឈប់រាល់ទង្វើទាំងនោះជាបន្ទាន់ ខ្ញុំការពារអ្នកបើអ្នកការពារខ្ញុំ! ខ្ញុំនឹងបំផ្លាញអ្នកបើអ្នកមិនគោរពខ្ញុំនិងប្រជាជនខ្ញុំ! កំណែទម្រង់ស៊ីជុំរៅ នឹងធ្វើឲ្យអ្នក​ស្តាយ​ក្រោយអស់មួយជីវិត។»

ខណៈអ្នកសារព័ត៌មានរបស់ទស្សនាវដ្ដីមនោរម្យព័ងអាំងហ្វូ កំពុងតាមដានទំព័រហ្វេសប៊ុកមួយនេះ យ៉ាងយកចិត្តទុក​ដាក់នោះ ស្រាប់តែនៅថ្ងៃទី១១ ខែមករានេះ ទំព័រដ៏គួរឲ្យសង្ស័យ ត្រូវបានបិទចោលលែងមានដំណើរការតទៅទៀត។ ប៉ុន្តែយ៉ាងណាក៏ដោយ ក៏គេនៅមិនទាន់មានអំណះអំណាងណាមួយ មកបញ្ជាក់ថាទំព័រមួយនេះ ជាទំព័រផ្ទាល់របស់​លោកនាយករដ្ឋមន្ត្រី ហ៊ុន សែន នោះឡើយ។ ម្យ៉ាងទៀត នៅលើទំព័រថ្មីនេះ គេសង្កេតឃើញសំណេរ​ដែលបាន​បង្ហាញនៅលើ«ជញ្ជាំង» ពោរពេញទៅដោយកំហុសអក្ខរាវិរុទ្ធ សឹងរាប់មិនអស់ ដែល​ធ្វើឲ្យមន្ទិលសង្ឃ័យពីការបន្លំ​គណនី ជាលោកនាយករដ្ឋមន្ត្រីកាន់តែច្បាស់។

កន្លងមក លោក ហ៊ុន សែន ខ្លួនឯងក៏បានធ្លាប់បដិសេធដែរ ថាលោក មិនមានហ្វេសប៊ុកផ្ទាល់ខ្លួននោះទេ ហើយក៏​មិនបានប្រើប្រាស់បណ្ដាញសង្គមមួយនេះ ដើម្បីផ្សាយសារអ្វីដែរ។ ប៉ុន្តែសម្រាប់មជ្ឈដ្ឋានអ្នកប្រើប្រាស់ហ្វេសប៊ុក​ទូទៅ និងក្រុមអ្នក​សារព័ត៌មាន បានយកចិត្តទុកដាក់ទៅលើទំព័រមួយទៀត ដែលគ្រប់ៗគ្នានិយាយថា យ៉ាង​ហោច​ណាស់ វាជាទំព័ររបស់អ្នកដែលនៅស្និតបំផុតនឹងលោក ហ៊ុន សែន ដែរ។ ទំព័រនោះគឺ «Samdech Hun Sen, Cambodian Prime Minister» ដែលរហូតមកដល់ពេលនេះ មានអ្នកចូលចិត្តប្រមាណជាង ១សែន៥ម៉ឺននាក់៕

--------------------------------------
ដោយ ក. សេងហុង (ទំនាក់ទំនង៖ [email protected]) - ភ្នំពេញ ថ្ងៃ១០ ខែមករា ឆ្នាំ ២០១៤