អ្នកវិភាគ៖ សម រង្ស៊ី អង្ទង«ចិន»ដើម្បីស្រាយវិបត្តិ បង្កប់ន័យនយោបាយ
នៅពេលនេះគណបក្សសង្រ្គោះជាតិ បានលាតត្រដាងយ៉ាងប្រាកដឲ្យសាធារណៈជនបានដឹងថា មានតែប្រទេសចិនទេ ដែលមានលក្ខណៈសម្បត្តិល្អបំផុត ក្នុងការទម្លុះទម្លាយភាពជាប់គាំងនយោបាយនៅកម្ពុជា បានដោយសន្តិវិធី។ តែសម្រាប់អ្នកវិភាគបានលើកឡើងថា ការលើកឡើងរបស់គណបក្សសង្រ្គោះជាតិ មានបង្កប់ន័យនយោបាយច្រើន ហើយវាក៏មិនមែនជាប្រផ្នូលល្អទេ ដែលចង់ឲ្យប្រទេសចិន មកដោះស្រាយវិបត្តិនយោបាយនៅកម្ពុជា ខណៈប្រទេសនេះប្រកាន់នូវលិទ្ធិប្រជាធិបតេយ្យ រីឯចិនជាប្រទេសកុំមុយនីស្តនោះ។
លោក សម រង្សី រូបថតនៅក្នុងបណ្ដាញហ្វេសប៊ុក របស់លោក។
នយោបាយកម្ពុជា - កន្លងទៅថ្មីៗនេះក្នុងកិច្ចសម្ភាស ជាភាសារអង់គ្លេសជាមួយទូរទស្សន៍ចិន ដែលមានវិសាលភាពផ្សាយទូទាំងពិភពលោក ប្រធានគណបក្សសង្រ្គោះជាតិ លោក សម រង្ស៊ី បានអត្ថាធិប្បាយថា ចិនជាប្រទេសមានឥទ្ធិពល ហើយថែមទាំងទទួលបានការគោរព និងការគាំទ្រពីគណបក្សសង្រ្គោះជាតិ និងរដ្ឋាភិបាលកម្ពុជាដែលដឹកនាំដោយលោកនាយករដ្ឋមន្រ្តី ហ៊ុន សែន ដូច្នេះមានតែប្រទេសចិនទេ ដែលអាចមានលទ្ធភាពជួយសម្រុះសម្រួល និងស្វែងរកដំណោះស្រាយដោយសន្តិវិធីណាមួយ ដើម្បីឆ្លើយតបទៅនឹងបញ្ហានយោបាយដែលកំពុងកើតមានឡើងនៅកម្ពុជា។
ក្នុងកិច្ចសម្ភាសជាមួយទូរទស្សន៍ចិនដដែលនោះ ប្រមុខគណបក្សជំទាស់ដដែលនេះ មិនត្រឹមតែលើកពីបញ្ហានយោបាយនៅកម្ពុជាតែប៉ុណ្ណោះទេ គឺថែមទាំងបានសម្តែងការរិះគន់ រាល់បណ្តាប្រទេសដែលមានចេតនាទាមទារចង់បានកោះដែលកំពុងការពារដោយចិន ហើយបានសម្តែងការគាំទ្រដល់ប្រទេសចិន ដែលខិតខំប្រឹងប្រែងការពារដែនកោះនៅសមុទ្រចិនខាងត្បូង។
លោក សម រង្ស៊ី បញ្ជាក់ថា៖ «យើងចាត់ទុកចិនមិនមែនត្រឹមតែជាមិត្តនោះទេ តែខ្ញុំអាចនិយាយថា ជាសម្ព័ន្ធមិត្ត។ គណបក្សរបស់ខ្ញុំ គាំទ្រចិនចំពោះការការពារ ដែនសមុទ្រនៅក្នុងសមុទ្រចិនខាងត្បូង ហើយចំពោះកោះដែលចិនកំពុងការពារនៅពេលនេះ គឺពិតជាត្រឹមត្រូវ និងស្ថិតនៅក្នុងទឹកដីរបស់ចិនពិតប្រាកដមែន។»
ជុំវិញករណីនេះទស្សនាវដ្តីមនោរម្យព័ងអាំងហ្វូ មិនអាចទាក់ទងមន្រ្តីរដ្ឋាភិបាលកម្ពុជា ដើម្បីធ្វើការអត្ថាធិប្បាយបាននៅឡើយ។ តែបើយោងលើអ្នកតាមដានស្ថានការណ៍នយោបាយឯករាជ្យកម្ពុជា បានកត់សម្គាល់ថា កន្លងមករដ្ឋាភិបាលនៃគណបក្សប្រជាជនកម្ពុជា ជានិច្ចជាកាលមិនសូវមានទំនាក់ទំនងល្អ ជាមួយប្រទេសលោកខាងលិច (ប្រទេសប្រជាធិបតេយ្យ) នោះទេ តែបែរជាមានទំនាក់ទំនងល្អ និងជិតស្និតជាមួយប្រទេសកុំមុយនិស្ត ដែលមានចិន និងវៀតណាមជាដើម។
លោក ហង្ស ពុទ្ធា នាយកប្រតិបត្តិនៃគណៈកម្មាធិការឃ្លាំមើលការបោះឆ្នោតមួយនៅកម្ពុជា និងជាអ្នកវិភាគឯករាជ្យដែរនោះ បានពន្យល់ថា កាលដែលអ្នកនយោបាយ ចង់ឲ្យមានមហាអំណាចជួយអន្តរាគន៍ ក្នុងជម្លោះនយោបាយកម្ពុជាសព្វថ្ងៃ គឺជារឿងប្រសើរ តែអ្វីដែលគួរកត់សម្គាល់និងត្រូវព្រួយបារម្ភនោះ គឺប្រទេសចិនជាប្រទេសកុំមុយនិស្ត ហើយក៏មិនដែលមានការបោះឆ្នោត តាមបែបសេរីពហុបក្សផងដែរ។
ទាក់ទងនឹងការសម្តែងការគាំទ្ររបស់លោក សម រង្ស៊ី ដល់ប្រទេសចិន ក្នុងជម្លោះសមុទ្រចិនខាងត្បួង លោក ហង្ស ពុទ្ធា បញ្ជាក់ថា៖ «ខ្ញុំជឿថាសម្តីរបស់គាត់(សម រង្ស៊ី) មានបង្កប់ន័យនយោបាយច្រើន ក្នុងនោះក៏ប្រហែលជាចង់បន្ទន់ចិត្តដើម្បីឲ្យភាគីចិន យកចិត្តទុកដាក់ដល់ការជាប់គាំងនយោបាយនៅកម្ពុជា(...)។ នេះក៏ប្រហែលជាយុទ្ធសាស្រ្តរបស់គណបក្សសង្រ្គោះជាតិ ដែលមើលឃើញចិនមានឥទ្ធិពលមកលើកម្ពុជា។»
ផ្ទុយពីជំហរដែលគណបក្សសង្គ្រោះជាតិ ចង់ឲ្យមហាយក្សចិន លូកដៃចូលមកសម្រួលជម្លោះនយោបាយកម្ពុជានេះ សម្តេចព្រះរាជបុត្រី ព្រះអានុជ នរោត្តម អារុណរស្មី ព្រះប្រធានគណបក្សហ្វុនស៊ីនប៊ិច ដែលមិនបានមួយកៅអីក្នុងសភានិតិកាលទី៥ និងធ្លាប់ជាមិត្តជិតស្និតនឹងចិនដែរនោះ បែរជាទ្រង់លិខិតចង់យាងព្រះមហាក្សត្រកម្ពុជា ឲ្យជួយដោះស្រាយបញ្ហា ដែលនៅជាប់គាំងសព្វថ្ងៃនេះទៅវិញ។
នៅក្នុងលិខិតមួយ ចុះថ្ងៃទី៨ ខែមករា ឆ្នាំ២០១៤ របស់សម្ដេចព្រះអនុជ មានសរសេរជាអាថ៌ថា៖ «ក្នុងកាលៈទេសៈនៃអាយុជីវិតជាតិនេះ មានតែព្រះបរមរាជា តម្រិះរបស់ព្រះមហាក្សត្រ ជាទីសក្ការៈនៃប្រជានុរាស្ត្រកូនចៅទាំងអស់គ្នាទេ ទើបអាចធ្វើឲ្យមានការសម្របសម្រួល ឬការចរចានយោបាយមួយ សម្រាប់រក្សាបាននូវស្ថេរភាពនិងសន្តិភាពជាតិ កត្តាចម្បងនៃសាមគ្គីជាតិ និងឯកភាពជាតិខ្មែរ ដែលមានព្រះករុណាព្រះមហាក្សត្រ ព្រះអង្គកំពុងគង់ជានិម្មិតរូបនិងជាម្លប់ដ៏ត្រជាក់សម្រាប់ជាតិទាំងមូល។» តែការដង្ហោយហៅរកការចូលអន្តរាគមន៍ ពីព្រះមហាក្សត្រកម្ពុជានេះ ទំនងជាមិនមានលទ្ធផលប៉ុន្មានទេ ដោយសារតែព្រះអង្គធ្លាប់បានយាង ទៅបើករដ្ឋសភា«ឯកបក្ស»របស់គណបក្សប្រជាជនកម្ពុជាម្ដងរួចមកហើយ បង្កឲ្យក្រុមអ្នកស្និតនឹងគណបក្សប្រឆាំងសម្ដែងការខឹងសម្បារមិនតិចទេ៕
--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១០ ខែមករា ឆ្នាំ២០១៤