អគ្គមេបញ្ជាការកងទ័ពថៃ លោកប្រាយុទ្ធ ចាន់អ៊ូឆា បានបដិសេធសារជាថ្មីទៀត នៅយប់ថ្ងៃព្រហស្បត្តិ៍ទី១២ខែធ្នូនេះ ថាកងទ័ពថៃនឹងមិនជួបមេដឹកនាំបាតុករ លោក ស៊ូថេប ថោងស៊ូបាន នោះទេ។ នេះជាការបញ្ជាក់លើកទីពីរ បន្ទាប់ពី​យប់ថ្ងៃពុធ ការសុំឲ្យមានជំនួបពីសំណាក់មេដឹកនាំបាតុកម្មនេះ ត្រូវបានមេបញ្ជាការកងទ័ពថៃ ច្រានចោលរួចហើយ ដោយបានចាត់ទុកថាមានគ្រោះថ្នាក់។

លោកស្រី យីងឡាក់ ស៊ីណាវ៉ាត្រា និងមេទ័ព លោកប្រាយុទ្ធ ចាន់អ៊ូឆា នៅពេលចុះជួយជនរងគ្រោះនឹងទឺកជំនន់ ក្នុងពេលកន្លងមក។ (រូបថត ឯកសារ)

នយោបាយថៃ - «អគ្គមេបញ្ជាការកងទ័ព នឹងមិនជួបលោក ស៊ូថេប ទេ នៅថ្ងៃនេះ» នេះជាសេចក្ដីថ្លែង នៅយប់ថ្ងៃ​ព្រហស្បត្តិ៍ទី១២ខែធ្នូនេះ របស់អ្នកនាំពាក្យកងទ័ពថៃ លោក វីនថៃ ស៊ូវ៉ារី (Winthai Suwari)ដោយថែមទាំង​បាន​ថ្លែង​ទៀតថា អគ្គមេបញ្ជាការទាំងអស់ ទាំងជើងគោង ជើងទឹក និងអាកាស នឹងមិនជួបក្រុមប្រឆាំងទាំងនេះដូចគ្នា។

អតីតឧបនាយករដ្ឋមន្ត្រី និងបច្ចុប្បន្នជាមេដឹកនាំបាតុករ លោក ស៊ូថេប ថោងស៊ូបាន បានប្រកាសកាលពីថ្ងៃពុធ ទី១១​ខែធ្នូ ថាលោកមានបំណងចង់ជួបជាមួយ អគ្គមេបញ្ជាការកងទ័ព និងអគ្គស្នងការនគរបាលថៃ នៅថ្ងៃព្រហស្បត្តិ៍ ស្អែក​ឡើងនេះ វេលាមុនម៉ោង៨យប់។ ជំនួបនេះ ត្រូវបានស្នើឡើង នៅក្នុងបរិបទដែលបាតុកម្ម​ដែលមានកម្លាំងខ្លាំង​របស់​លោកធ្វើតាំងពីជាងមួយខែមកហើយ នៅកណ្ដាលរាជធានីបាងកក សុំឲ្យ លោកស្រី យីងឡាក់ ស៊ីណាវ៉ាត្រា នាយក​រដ្ឋមន្ត្រីថៃ ចុះចេញពីតំណែង។

បើតាមលោក ស៊ូថេប ថោងស៊ូបាន ដែលបានប្រកាសតាំងខ្លួន ជាអគ្គលេខាធិការនៃក្រុមប្រឹក្សា«ប្រជាជន» សម្រាប់​កំណែទម្រង់តាមបែបប្រជាធិបតេយ្យ (PDRC) នោះ បានថ្លែងឲ្យដឹងទៀតថា ជំនួបជាមួយអ្នកទទួលខុសត្រូវកងទ័ព និងនគរបាលទាំងនេះ មានសារះសំខាន់ណាស់ ដើម្បីឲ្យអ្នកទាំងនេះយល់ពីគម្រោងកែទម្រង់ ដែលស្នើឡើងដោយ​ក្រុមប្រឹក្សារបស់លោក។

បន្ទាប់ការប្រកាសរបស់លោក ស៊ូថេប នៅក្នុងយប់ថ្ងៃពុធដដែល អគ្គមេបញ្ជាការកងទ័ពថៃ លោក ប្រាយុទ្ធ ចាន់អ៊ូឆា បាននិយាយថា មេបញ្ជាការកងទ័ពទាំងអស់ បានសម្រេចថាមិនជួបជាមួយនឹងមេដឹកនាំបាតុករទាំងនេះទេ។ លោក​បានបន្ថែមថា ជំនួបជាមួយមេដឹកនាំបាតុករនៅខណៈនេះ មានសភាពគ្រោះថ្នាក់សម្រាប់ប្រទេស ប្រសិនបើកងទ័ព​ត្រូវបានគេសង្ស័យថា បានលំអៀងទៅខាងណាមួយ ដោយសារតែបានរៀបចំកិច្ចប្រជុំដូចនេះ។

ដោយសារមានគំនាបខ្លាំងពីសំណាក់បាតុករ លោកស្រី យីងឡាក់ បានប្រកាសរំលាយសភា ហើយបានកំណត់​ឲ្យ​មាន​ការបោះឆ្នោតមុនកាលកំណត់មួយឡើងវិញ ដែលត្រៀមធ្វើនៅថ្ងៃទី០២ ខែកុម្ភះខាងមុខ។ អ្នកតាមដាន​សភាពការណ៍​នយោបាយថៃ បានរំពឹងថា លោកស្រី នឹងនៅតែជាប់ឆ្នោត ហើយត្រៀមដឹកនាំប្រទេសថៃ នៅអណត្តិ​ក្រោយទៀត។

នៅថ្ងៃព្រហស្បត្តិ៍នេះដែរ ក្រុមបាតុករមួយក្រុម បានសម្រុកចូលទៅក្នុងអគារការិយាល័យ របស់នាយករដ្ឋមន្ត្រី​កណ្ដាលរាជធានីបាងកក តែបានចាកចេញមកវិញនៅប៉ុន្មាននាទីក្រោយមក។ សូមបញ្ជាក់ថា រហូតមកថ្ងៃនេះ ចំនួន​បាតុករប្រឆាំងបានថយចុះ តែគោលដៅរបស់បាតុកម្មមិនបានថមថយទៅជាមួយទេ។ ពួកគេទាមទារ​ឲ្យ​ខាង​តែបាន ឲ្យនាយករដ្ឋមន្ត្រី លោកស្រី យីងឡាក់ លាលែងពីតំណែង ចង់លាងសម្អាតប្រទេសថៃ ពីឥទ្ធិពលរបស់​គ្រួសារ «ស៊ីណាវ៉ាត្រា» និងចង់បង្កើតឲ្យមានឡើង នូវក្រុមប្រឹក្សា«ប្រជាជន»មួយ ដែលមិនចាំបាច់ធ្វើការបោះឆ្នោត។

អតីត​នាយករដ្ឋមន្ត្រី ថាក់ស៊ីន ស៊ីណាវ៉ាត្រា ដែលត្រូវកងទ័ពធ្វើរដ្ឋប្រហារមួយ កាលពីឆ្នាំ ២០០៦ បណ្ដេញចេញពី​អំណាច​នោះ ត្រូវបានគេចោទប្រកាន់ថា ស្ថិតនៅពីក្រោយប្អូនស្រីរបស់លោក លោកស្រី យីងឡាក់ ស៊ីណាវ៉ាត្រា ដែលជា​នាយករដ្ឋមន្ត្រីបច្ចុប្បន្ន។ លោកស្រី យីងឡាក់ បានជាប់ឆ្នោតចូលកាន់តំណែង តាមបែបប្រជាធិបតេយ្យ កាលពីឆ្នាំ​២០០១​កន្លង​ទៅ ហើយកាលពីថ្ងៃព្រហស្បត្តិ៍ ទី២៨ខែវិច្ឆិកានេះ លោកស្រីត្រូវបានរដ្ឋសភាថៃផ្ដល់សេចក្ដី​ទុកចិត្តជាថ្មី​ទៀត៕

------------------------------------------------
ដោយ ៖ កេសរកូល - ភ្នំពេញ ថ្ងៃទី១២ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ