ខណៈពេលដែលក្រុមបាតុករប្រឆាំងរដ្ឋាភិបាល (ក្រុមអាវលឿង) ទាមទារឲ្យមានការចាប់ខ្លួន នាយករដ្ឋមន្ត្រី​ថៃ​ពី​បទ«ក្បត់»នោះ ក្រុមអ្នកស្មោះស្ម័គ្រនឹងលោកស្រី យីងឡាក់ ស៊ីណាវ៉ាត្រា វិញ ដែលត្រូវបានគេស្គាល់ថា ជា​ក្រុម​អាវក្រហម បានព្រមានថានឹងរៀបចំបាតុកម្មប្រឆាំង នឹងបាតុកម្មរបស់ក្រុមអាវលឿងទាំងនោះវិញ។

នាយករដ្ឋមន្ត្រីថៃបច្ចុប្បន្ន លោកស្រី យីងឡាក់ ស៊ីណាវ៉ាត្រា។ (រូបថត Reuter)

នយោបាយថៃ - បើទោះជាការបោះឆ្នោតមុនកាលកំណត់ ត្រូវបានកំណត់ធ្វើនៅខែកុម្ភះខាងមុខនេះក៏ដោយ ក៏ក្រុមអ្នកតវ៉ា ដែលបានជួបធ្វើបាតុកម្មតាំងពីជាងមួយខែមកហើយ ប្រឆាំងរដ្ឋាភិបាលរបស់លោកស្រី យីងឡាក់ ស៊ីណាវ៉ាត្រា នៅមិនទាន់អស់ចិត្តនៅឡើយ។ លោក ស៊ូថេប ថោងស៊ូបាន បានថ្លែងនៅថ្ងៃពុធទី១១ ខែធ្នូនេះ​ថា​ ស្នើសុំឲ្យមានការចាប់ខ្លួននាយករដ្ឋមន្ត្រី លោកស្រី យីងឡាក់ យកទៅវិនិច្ឆ័យទោស។

លោកប្រកាសថា «ខ្ញុំស្នើសុំទៅកងកម្លាំងនគរបាល ឲ្យចាប់ខ្លួនយីងឡាក់ ពីបទ"ក្បត់" ដោយសារតែគាត់មិនបាន​ធ្វើតាមបញ្ជារបស់យើង»។ «បញ្ជារបស់យើង» ទំនងជាលោក ស៊ូថេប ចង់និយាយសំដៅទៅរកឱសានវាទ ដែល​លោកបានដាក់កំហិតឲ្យ លោកស្រីយីងឡាក់ ត្រូវតែលាលែងពីតំណែង ក្នុងរយៈពេល២៤ម៉ោង។

លោកបានឲ្យដឹងមុននេះថា «បើអ្នកមិនស្ដាប់បង្គាប់របស់យើងទេ កម្លាំងបាតុកម្មរបស់យើង នឹងកើនឡើង​កាន់​តែ​ខ្លាំង រហូតដល់អ្នក និងគ្រួសារត្រកូល ស៊ីណាវ៉ាត្រា ទាំងមូល មិនអាចទ្រាំទ្របាន។ តើរយៈពេលប៉ុន្មាន ដែលអ្នក​អាចទ្រាំទ្របាន បើសិនជាមានមនុស្សស្ដោះ ដាក់រថយន្ដរបស់អ្នក រាល់ថ្ងៃនោះ?»

នាយករដ្ឋមន្ត្រីបច្ចុប្បន្ន លោកស្រី យីងឡាក់ ស៊ីណាវ៉ាត្រា ជាប្អូនស្រីបង្កើត របស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ដែលត្រូវបានបណ្ដេញពីអំណាច ដោយរដ្ឋប្រហារមួយ កាលពីឆ្នាំ ២០០៦។ លោក ថាក់ស៊ីន​ នេះ ជាដើមចម​នៃបាតុកម្មរបស់ក្រុមប្រឆាំង នៅកណ្ដាលរាជធានីបាងកក រហូតមកដល់ថ្ងៃនេះ និងជាជំហានទៅរក​ការទាមទារឲ្យ លោកស្រី យីងឡាក់ នាយករដ្ឋមន្ត្រីជាប់ឆ្នោតតាមបែបប្រជាធិបតេយ្យ លាលែងពីតំណែង។ ប៉ុន្តែ​នៅម៉ោងនេះ លោកស្រី យីងឡាក់ នៅមិនទាន់បានបង្ហើបពីបំណងណាមួយ ដែលចង់លាលែងពីតំណែង តាមការ​ទាមទារនោះនៅឡើយ។

អ្នកតាមដាននយោបាយថៃ មិនបានសង្ស័យទេ ថាលោកស្រី យីងឡាក់ នឹងឈ្នះឆ្នោតជាថ្មីទៀត ហើយនឹងនៅតែ​ត្រៀម​លក្ខណៈដើម្បីដឹកនាំរដ្ឋាភិបាល នៅក្នុងអាណត្តិក្រោយទៀត។

ដោយឡែក ក្នុងអ្នកស្មោះស្ម័គ្រនឹងលោកស្រី ដែលគេស្គាល់ថា ជាក្រុមមេដឹកនាំអាវក្រហម (UDD) នោះ បាន​ប្រកាសតបទៅនឹងការលើកឡើងរបស់ក្រុមអាវលឿងថា​ ពួកគេបានត្រៀមខ្លួនរួចជាស្រេច សម្រាប់ធ្វើបាតុកម្មមួយ​ដើម្បីការពារ លោកស្រី យីងឡាក់។ មេដឹកនាំមួយរូបរបស់ក្រុមនេះ លោក ចាទូពន ព្រំផាត់ (Jatuporn Promphan) បានព្រមានថា «យើង UDD មានតួនាទីប្រមែប្រមូល មហាជនអាវក្រហម និងអ្នកស្នេហាលិទ្ធិប្រជាធិបតេយ្យ ដែល​មិនយល់ស្របតាមការចង់បានរបស់លោក ស៊ូថេប។ យើងនឹងមានមនុស្សមកចូលរួម ច្រើនជាងក្រុមរបស់លោក​ស៊ូថេប ដែលបានជួបជុំគ្នានេះ។»

ការព្រមាននេះ បានបង្កឲ្យមានការព្រួយបារម្ភ ពីការប្រឈមមុខគ្នាខ្លាំងក្លាមួយ រវាងក្រុមទាំងពីរ បើទោះជាលោក ចាទូពន ព្រំផាត់ បានអះអាងថា ការជួបជុំជាយថាហេតុរបស់ក្រុមលោក នឹងធ្វើឡើង ក្នុងករណីដែលក្រុមលោក ស៊ូថេប បង្កអំពើហិង្សាដើម្បីដណ្ដើមអំណាច តែប៉ុណ្ណោះក៏ដោយ៕

------------------------------------------------
ដោយ ៖ កេសរកូល - ភ្នំពេញ ថ្ងៃទី១១ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ