ថៃ៖ ក្រុមប្រឆាំងនឹងចូលក្នុងកិច្ចប្រជុំរបស់រដ្ឋាភិបាល ដើម្បីស្រាយវិបត្តិ
តំណាងបីរូបនៃក្រុមប្រឹក្សា«ប្រជាជន»ដើម្បីកំណែទម្រង់តាមបែបប្រជាធិបតេយ្យ (PDRC) ដែលជាសម្ព័ន្ធមួយនៃក្រុមជាច្រើនផ្សេងទៀតប្រឆាំងនឹងរដ្ឋាភិបាលថៃ នឹងចូលរួមនៅក្នុងកិច្ចប្រជុំុជាសកលមួយ រៀបចំដោយរដ្ឋាភិបាលនៅថ្ងៃអាទិត្យទី១៥ខែធ្នូនេះ។ នេះបើតាមការឲ្យដឹងរបស់ក្រុមប្រឹក្សា នៅយប់ថ្ងៃសុក្រមុនថ្ងៃប្រជុំពីរថ្ងៃ។
នាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត្រា ថ្លែងដោយទឹកភ្នែកថា លោកស្រីមិនលាលែងពីតំណែងទេ។ (រូបថត Reuter)
នយោបាយថៃ - លេខានៃខុទ្ទកាល័យនាយករដ្ឋមន្ត្រី លោក ទង់ថោង ចាន់តារាំងស៊ូ (Tongthong Chantharangsu) បានថ្លែងឲ្យដឹងថា កិច្ចប្រជុំនាថ្ងៃអាទិត្យទី១៥ខែធ្នូ ដែលនឹងនិយាយដល់កំណែទម្រង់នយោបាយរបស់ប្រទេសថៃ ស្នើឡើងដោយនាយករដ្ឋមន្ត្រី លោកស្រី យីងឡាក់ ស៊ីណាវ៉ាត្រានោះ នឹងប្រមូលតំណាងប្រមាណជា១០០នាក់ ពីគ្រប់ផ្នែកសាធារណៈ រដ្ឋនិងឯកជន។
លោក ទង់ថោង ដែលទទួលបន្ទុកការរៀបចំកិច្ចប្រជុំនេះ បានបន្ថែមឲ្យដឹងទៀតថា «ច្បាស់ជាងនេះ អ្នកតំណាងទាំងនេះនឹងមកពីអង្គការពាណិជ្ជកម្ម ក្រសួង ប្រព័ន្ធផ្សព្វផ្សាយ គណបក្សនយោបាយ ព្រឹទ្ធសភា សកលវិទ្យាល័យ ក្រុមប្រឹក្សាប្រជាជន និងក្រុមតំណាងរបស់ពួកអាវក្រហម»។ ក្រុមប្រឹក្សាប្រជាជន ដែលកើតចេញពីបាតុកម្មប្រឆាំងរដ្ឋាភិបាល រីឯក្រុមអាវក្រហម ដែលមាននិន្នាការគាំទ្ររដ្ឋាភិបាល។
កិច្ចប្រជុំនេះ បានបង្កើតឡើងដើម្បីស្វែងរកដំណោះស្រាយ ឲ្យប្រទេសថៃចេញពីវិបត្តិបច្ចុប្បន្ន នៅមុនឆ្នាំថ្មី ខណៈពេលដែលការបោះឆ្នោតសកល ត្រូវបានកំណត់នៅថ្ងៃទី០២ខែកុម្ភះខាងមុខ។ នេះជាការចង្អុលបន្ថែម របស់អ្នកទទួលខុសត្រូវរូបនេះ។
រីឯក្រុមប្រឹក្សាប្រជាជនវិញ តាមរយៈអគ្គលេខារបស់ខ្លួន លោក ស៊ូថេប ថោងស៊ូបាន បានប្រកាសថា បានគ្រោងនឹងរៀបចំកិច្ចប្រជុំុំមួយដែរ នៅថ្ងៃសៅទី១៤ខែធ្នូនេះ ហើយបានបញ្ជាក់ថា ពួកខ្លួនចង់បានកិច្ចព្រមព្រៀងមួយ ដើម្បីដាក់ឲ្យធ្វើកំណែទម្រង់ នៅមុនថ្ងៃបោះឆ្នោត ឬអាចស្នើឲ្យមានការលើកថ្ងៃបោះឆ្នោតនេះ ទៅមុខទៀត។
កាលពីថ្ងៃពុធទី១១ខែធ្នូកន្លងមក លោក ស៊ូថេប រូបនេះ បានសុំជួបនិយាយជាមួយ មេដឹកនាំកងទ័ព និងនគរបាល នូវអ្វីដែលលោក ស៊ូថេប និយាយថា ចង់ឲ្យកងទ័ពនិងនគរបាល យល់ពីការចង់បានរបស់ក្រុមប្រឹក្សា«ប្រជាជន»របស់លោក។ ប៉ុន្តែសំណើរនេះត្រូវបានបដិសេធដោយ អគ្គមេបញ្ជាការកងទ័ព និងអគ្គស្នងការនគរបាលជាតិថៃ ដោយពួកគេយល់ថា ការជួបជជែកណាមួយជាមួយក្រុមបាតុករប្រឆាំងនៅពេលនេះ អាចនាំគ្រោះថ្នាក់ធ្ងន់ធ្ងរដល់ប្រទេសថៃ៕
------------------------------------------------
ដោយ ៖ កេសរកូល - ភ្នំពេញ ថ្ងៃទី១៣ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ