និស្សិតអាមេរិកាំងមួយរូប ដែលបានចូលទៅលួចរូបថតស្រាត របស់ស្រីៗស្រស់ក្មេងស្អាតៗ នៅក្នុងម៉ាស៊ីនកំព្យូទ័ររបស់​ពួកនាង ដើម្បីរៀបគម្រោងចង់បរិហាកេរ្ត៍ ទៅថ្ងៃក្រោយនោះ នឹងបង្ហាញមុខនៅចំពោះចៅក្រម នៃតុលាការក្រុង​ឡូសអេនជឺឡេស នៅថ្ងៃចន្ទទី០៤ខែវិច្ឆិកានេះ។ ជាសំនុំរឿង ដែលបានធ្វើឲ្យផ្អើលនៅសហរដ្ឋអាមេរិក ដោយសារតែ​មាន​ករណីមួយពីក្នុងនោះ បានកើតចំលើបវរកញ្ញាស្រីស្អាតមួយរូប ដែលទើបនឹងជាប់តំណែងថ្មីៗ។

បវរកញ្ញាស្រីស្អាត នាង កាស៊ីឌី វូហ្វ៍ ដែលយុវនិស្សិតចូលទៅលួចរូបថតឯកជនរបស់នាង។ (រូបថត today.com)

បច្ចេកវិទ្យា - ចោរបច្ចេកវិទ្យាដែលមានគំនិតខិលខូច មិនយូរឡើយនឹងត្រូវប្រព័ន្ធយុត្តិធម៌ ចាប់បញ្ជូនមកដាក់នៅមុខ​តុលាការ​បែបនេះ។ ដោយទំនងជាមានវិប្បដិសារី នឹងអំពើរបស់ខ្លួន ឬប្រហែលជាបារម្ភនឹងការប្រឈមមុខ នឹងប្រព័ន្ធ​យុត្តិធម៌បែប​នេះ​ហើយ ទើបយុវនិស្សិតនេះបានមកបង្ហាញខ្លួនសារភាព កាលពីអំឡុងខែកញ្ញាកន្លងទៅ នៅការិយាល័យ​ស៊ើបអង្កេតសហព័ន្ធ អេហ្វប៊ីអាយ (FBI) ដោយខ្លួនឯង។

និស្សិតឈ្មោះ ចារ៉ែដ ជេម អាប្រាហាម (Jared James Abrahams) អាយុ១៩ឆ្នាំ នឹងពន្យល់ប្រាប់ចៅក្រមនៃ​តុលាការ​ក្រុង​ឡូសអេនជឺឡេស ពីអ្វីដែលខ្លួនបានធ្វើ និងជាពិសេសពីគម្រោងគម្រាមបរិហាកេរ្ត៍ ដែលខ្លួនត្រៀមនឹងធ្វើដាក់​ស្រីៗ​ស្រស់​ស្អាតទាំងនោះ បន្ទាប់ពីប្រមូលបានរូបថតស្រាត ពីក្នុងម៉ាស៊ីនកំព្យូទ័ររបស់ពួកនាងរួច។

តាមអ្វីដែលជាការបកស្រាយក្នុងជំហានដំបូង និស្សិតអាប្រាហាម បានប្រើប្រាស់កម្មវិធីមួយ ចូលទៅលួចប្រមូល នូវរូប​ភាពតាមវេបខេម (webcam) ដែលមិនមានពាក់ខោអាវ ឬខោអាវខ្លីស្ដើងរបស់នាងៗ។ បន្ទាប់មក និស្សិតរូបនេះនឹង​ផ្ញើរ​សារ​អេឡិចត្រូនិក (Mail) មួយទៅកាន់ម្ចាស់រូប ដោយមានភ្ជាប់រូបដែលខ្លួនលួចបាននោះទៅជាមួយផង ដើម្បីគម្រាមថា​នឹង​ផ្សាយរូបនេះជាសាធារណៈ ប្រសិនបើម្ចាស់រូបមិនផ្ញើរត្រឡប់មកវិញ នូវរូបថតឬវីដេអូដែលច្បាស់ជាងនេះ ឬប្រសិន​បើម្ចាស់រូប បដិសេធមិននិយាយជាមួយខ្លួន តាមប្រព័ន្ធស្កាយ (Skype)។

បវរកញ្ញាស្រីស្អាតអាមេរិក ធ្លាប់ជាជនរងគ្រោះរបស់និស្សិតចោរអាំងធើណែត

រវាងពីឆ្នាំ២០១២មកដល់ខែមិថុនាឆ្នាំ២០១៣នេះ មានយ៉ាងហោចនារីវ័យក្មេងចំនួន១២នាក់ ធ្លាប់ជាជនរងគ្រោះរបស់ យុវនិស្សិតដែលរៀនឯកទេស ខាងវិទ្យាសាស្ត្រកំព្យូទ័ររូបនេះ។ ស្ត្រីរងគ្រោះភាគច្រើន មានទីលំនៅនៅក្នុងរដ្ឋ​កាលីហ្វ័នីញ៉ា សហរដ្ឋអាមេរិក ប៉ុន្តែក៏មានផងដែរ ក្នុងប្រទេសកាណាដា ឬនៅប្រទេសរ៉ូស្សី។ ពីក្នុងចំណោមនោះ គេក៏​ឃើញមាននាងកាស៊ីឌី វូហ្វ៍ (Cassidy Wolf) ដែលទើបនឹងជាប់ជា រាជនីសម្ផស្សនៃបវរកញ្ញាស្រីស្អាត របស់អាមេរិក កាល​ពីខែសីហាកន្លងទៅនោះដែរ។

នាង កាស៊ីឌី បានបញ្ជូនទៅឲ្យអ្នកស៊ើបអង្កេត កាលពីខែមិនាកន្លងទៅ នូវទូរសាអេឡិចត្រូនិកនិងរូបថតមួយចំនួន ដែល​នាងទទួលបានពីយុវនិស្សិត។ យុវនិស្សិត បានសរសេរគម្រាមនាងនៅក្នុងទូរសានោះថា «បើអ្នកមិនធ្វើតាមដូចអ្វី​ដែល​បានបញ្ជាក់ខាងក្រោមនេះទេ ខ្ញុំនឹងផ្សព្វផ្សាយរូបថតទាំងនេះ (...) ហើយសុបិន្តរបស់អ្នក ដែលចង់ក្លាយជានារីបង្ហាញ​ម៉ូដ ដ៏ល្បីនោះ នឹងប្រែក្លាយដូចជាតួកុនថតស្រាត»។

ទោះជាយ៉ាងណាក៏ដោយ ចារ៉ែដ ជេម អាប្រាហាម បានទទួលស្គាល់នូវកំហុស ពីអ្វីដែលគេបានចោទប្រកាន់ទៅលើខ្លួន។ ជាមួយនឹងការប្រព្រឹត្តិនេះ អាប្រាហាម នឹងអាចប្រឈមនូវការជាប់ពន្ធនាគារ ពី២៧ទៅ៣៣ខែ អនុលោមទៅតាមច្បាប់​សហព័ន្ធជាធរមាន។ មិនត្រឹមតែប៉ុណ្ណោះ អាប្រាហាម នឹងត្រូវចាប់បង្ខំឲ្យបង់ប្រាក់ពិន័យចំនួន ១លានដុល្លាថែម​ទៀត។ យើងចាំមើលថ្ងៃចន្ទនេះ ថា អាប្រាហាម នឹងអាចរួចខ្លួន ឬត្រូវជាប់ទោសប៉ុណ្ណា។ នេះហើយ គេហៅថា «នៅ​មិននៅ យក​ជ័រព្នៅ មកត្បៀតក្លៀក»៕

សូមទស្សនាវីដេអូ ដែលថ្លែងរៀបរាប់បន្ថែមពីសាច់រឿងនេះ ដូចខាងក្រោម៖

ចារ៉ែដ ជេម អាប្រាហាម និងក្រុមគ្រួសាររបស់នាង។ (រូបថត ចម្លងពីអេក្រង់វីដេអូ)

--------------------------------------------------
ដោយ៖ សុបិន្ត - ថ្ងៃទី០២ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ