ធាតុអាកាសទំនងជា«មូលហេតុ»នៃការធ្លាក់យន្ដហោះនៅឡាវ ស្លាប់៤៩នាក់
មនុស្ស៤៩នាក់បានស្លាប់ នៅក្នុងព្រឹត្តិការណ៍ដ៏សោកសៅ នៃការធ្លាក់យន្ដហោះមួយគ្រឿង របស់ក្រុមហ៊ុនអាកាសចរណ៍រដ្ឋឡាវ ធុនអាតេអ៊ែ ៧២-៦០០ (ATR 72-600) ដែលទំនងជាបណ្ដាលមកពីមូលហេតុ «អាកាសធាតុអាក្រក់»។ រហូតមកដល់ម៉ោងនេះ មិនមានសេចក្ដីរាយការណ៍មកថា មានជនជាតិខ្មែរណាម្នាក់ ជិះនៅលើយន្ដហោះនេះទេ។
យន្ដហោះ ធុនអាតេអ៊ែ ៧២-៦០០ របស់ក្រុមហ៊ុនអាកាសចរណ៍រដ្ឋឡាវ។ (រូបថត wikimedia.org)
រាជធានីភ្នំពេញ - គេកំពុងស្វែងរកឲ្យឃើញពីមូលហេតុ ដែលបង្កឲ្យមានជាគ្រោះថ្នាក់ដ៏សោកសៅ នៅមិនឆ្ងាយប៉ុន្មាន ពីព្រលានយន្ដហោះ នៃទីក្រុងប៉ាក់សេ (Pakse) ដែលជាទីក្រុងទេសចរណ៍មួយយ៉ាងសំខាន់ នៅផ្នែកខាងត្បូងនៃប្រទេសកុម្មុយនីសឡាវ។
អាកាសធាតុអាចជាមូលហេតុ?
ប្រាកដហើយ វាជាមូលហេតុ ដែលត្រឹមត្រូវជាងគេ។ ជើងយន្ដហោះដែលហោះចេញពីរដ្ឋធានី វៀងចន្ទ នៅម៉ោង ២និង៤៥នាទីរសៀល នឹងត្រូវចំណាយពេលតែជាងមួយម៉ោងប៉ុណ្ណោះ ដើម្បីមកចុះចតនៅទិសដៅរបស់វានាព្រលានយន្ដហោះនៃទីក្រុងប៉ាកសេ។ ប៉ុន្តែយន្ដហោះ បានធ្លាក់ខូចខាតនៅលើទន្លេមេគង្គ នៅមុនការចុះចតរបស់វាតែបន្តិច។
បើតាមការសែតបាងកងប៉ុស្ដ៍ របស់ថៃបាននិយាយថា យន្ដហោះបានរងនូវសម្ពាធខ្លាំងមួយ នៅពេលដែលវាព្យាយាមចុះចត ខណៈដែលតំបន់ទាំងមូល ត្រូវបានហ៊ុំព័ទ្ធដោយឥទ្ធិពលព្យុះ ណារី បណ្ដោយឲ្យភ្លៀងធ្លាក់យ៉ាងជោគជាំ នៅក្នុងរយៈពេលប៉ុន្មានថ្ងៃចុងក្រោយនេះ។ ចំណែកឯការសែតថៃមួយទៀត ឈ្មោះថា ឌឺណេស៊ិន បានរាយការណ៍ថា ការិយាល័យត្រួតពិនិត្យផ្លូវហោះហើរ បានប្រាប់ឲ្យអ្នកបើកបរយន្ដហោះ កុំឲ្យចុះចតឲ្យសោះ ដោយហេតុមកពីមើលផ្លូវមិនសូវច្បាស់។ ប៉ុន្តែអាកាសយានិកមិនបានស្ដាប់តាមការស្នើនោះទេ ហើយបានបង្ខំចុះចត និងចុះចតខុសផ្លូវ ដោយបានបញ្ជាយន្ដហោះ ទៅបុកថ្មប៉ប្រះទឹកមួយ នៅកណ្ដាលទន្លេ។
ក្រុមហ៊ុនអាកាសចរណ៍របស់ឡាវ ក៏បានប្រកាសដែរថា «នៅពេលដែលព្យាយាមចុះចត យន្ដហោះបានជួបប្រឈមនឹងលក្ខខ័ណ្ឌអាកាសធាតុដ៏អាក្រក់»។
នរណាខ្លះរងគ្រោះ?
បើតាមបញ្ជីមួយ ដែលមិនទាន់ប្រកាសជាផ្លូវការនៅឡើយ បាននិយាយថា អ្នកដំណើរភាគច្រើនពីចំណោមនោះ សុទ្ធសឹងជាជនជាតិបរទេស ក្នុងនោះមានបារាំង អាមេរិកាំង កាណាដា កូរ៉េខាងត្បូង តៃវ៉ាន់ វៀតណាម និងម៉ាឡេស៊ី។ ជនជាតិបារាំង៧នាក់ កាណាដាម្នាក់ ត្រូវបានអះអាងថាបានរងគ្រោះដល់ជីវិត ដោយក្រសួងការបរទេសរបស់ប្រទេសផងខ្លួន។ រដ្ឋមន្ត្រីការបរទេសបារាំង លោក ឡូរ៉ង់ ហ្វាប៊ីយូស (Laurent Fabius) បានថ្លែងថា «ខ្ញុំបានស្នើសុំទៅមន្ត្រីស្ថានទូតបារាំង ប្រចាំនៅទីក្រុងវៀងចន្ទ ឲ្យធ្វើដំណើរទៅកាន់កន្លែងកើតហេតុ នោះជាបន្ទាន់»។
ទីភ្នាក់ងារសារព័ត៌មានបារាំង អាអេហ្វប៉េ (AFP) បានរាយការណ៍ថា មានមនុស្សតែ៤៤នាក់ប៉ុណ្ណោះ។ តែអាកាសចរណ៍ឡាវ បានសរសេរនៅលើទំព័រហ្វេសប៊ុក របស់ខ្លួនថា មនុស្សនៅក្នុងយន្ដហោះមានចំនួន៤៩នាក់៖ អ្នកដំណើរ ៤៤នាក់ និង៥នាក់ផ្សេងទៀតជាអ្នកបម្រើការនៅលើយន្ដហោះ។
តើគ្រោះថ្នាក់អាចមកពីតួយន្ដហោះទេ?
មិនអាចជាអញ្ចឹងទេ។ «តួយន្ដហោះនេះ ទើបនឹងត្រូវបានបញ្ជូនទៅដល់ក្រុមហ៊ុនអាកាសចរណ៍ នៅខែមិនាឆ្នាំ២០១៣កន្លងទៅថ្មីៗ» នេះបើតាមការឲ្យដឹង នៅក្នុងសេចក្ដីប្រកាសព័ត៌មានមួយ របស់ក្រុមហ៊ុនផលិតយន្ដហោះ អាតេអ៊ែរ ដែលមានទីតាំងនៅទីក្រុងទូលូ ប្រទេសបារាំង៕
------------------------------------------------
ដោយ ៖ កេសរកូល - ថ្ងៃទី១៧ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ