យន្ដហោះដឹកអ្នកដំណើរ របស់ក្រុមហ៊ុនអាកាសចរណ៍ ទ្រីហ្គាណាអ៊ែរ ដែលមានមនុស្សជិះ ៥៤នាក់ នៅ​ជា​មួយ បានបាត់ដំណឹងសូន្យឈឹង ពីកញ្ចក់ត្រួតពិនិត្យរលកអាកាស នៅរសៀលថ្ងៃអាទិត្យ ទី១៦ ខែសីហានេះ នៅខណៈពេលយន្ដហោះ បានហោះពីលើខេត្តប៉ាពូអាស៊ី ភាគខាងកើត នៃប្រទេសឥណ្ឌូនេស៊ី។ យន្ដហោះ​ប្រភេទ ATR 42 បានបាត់ដំណឹង ពីប្រព័ន្ធតាមដានអាកាស នៅវេលាម៉ោងប្រមាណជា ១៥ បន្ទាប់ពីបាន​ហោះ​ចេញ ពីព្រលានយន្ដហោះ សេនតានី (Sentani) ដែលស្ថិតក្នុងក្រុងធំមួយ នៃខេត្ត ចាយ៉ាពូរ៉ា (Jayapura)។ នេះបើតាមការឲ្យដឹង របស់ផ្នែកអ្នកជួយសង្គ្រោះ នៅបណ្ដាញសង្គមទ្វីសធើរ។

ហោះឆ្ពោះទៅកាន់ក្រុង អូកសីប៊ិល (Oksibil) យន្ដហោះដែលប្រើប្រាស់កង្ហាមួយនេះ មានដឹកអ្នកដំណើរ ៤៤​នាក់ ជាមនុស្សធំ ៥នាក់ ជាកុមារ និង៥នាក់ទៀត ជាក្រុមបុគ្គលិបម្រើលើយន្ដហោះ។ បន្ទាប់ពីបានងើបខ្លួន ពីព្រលានយន្ដហោះ យន្ដហោះបានហោះ ក្នុងរយៈពេលជាង៣០នាទី មុននឹងបាត់ដំណឹងឈឹង។

ដំណឹងចុងក្រោយ ដែលទើបនឹងធ្លាក់មកដល់មុននេះ (ខណៈអត្ថបទនេះ កំពុងសរសេរ) បានឲ្យដឹងថា អ្នក​ស្រុកនៃខេត្ត ប៉ាពូអាស៊ី បានអះអាងថា ពួកគេបានរកឃើញតួយន្ដហោះ នៅក្នុងតំបន់ព្រៃភ្នំដ៏ក្រាសឃ្មឹក នៃ​តំបន់នេះ។ នាយកផ្នែកអាកាសចរណ៍ស៊ីវិល របស់ប្រទេសឥណ្ឌូនេស៊ី បានថ្លែងថា ក្រុមការងាររបស់លោក កំពុងធ្វើការត្រួតពិនិត្យ ពីដំណឹងនេះ ថាតើអាចយកជាការបាន ឬយ៉ាងណា។

ស្ថានភាពឧត្តុនិយម... អាក្រក់

អ្នកនាំពាក្យរបស់ក្រសួងដឹកជញ្ជូនឥណ្ឌូនេស៊ី បានអះអាងថា យន្ដហោះបានបាត់ការទាក់ទង ជាមួយនឹង​ប្រព័ន្ធ​ត្រួតពិនិត្យ ផ្លូវអាកាស។ អ្នកនាំពាក្យបានថ្លែងទៀតថា៖ «យើងមិនទាន់ដឹងថា តើមានរឿងអ្វីកើត​ឡើង ចំពោះយន្ដហោះនេះ នៅឡើយ។ យើងកំពុងទាក់ទង និងធ្វើការជាមួយអាជ្ញាធរ នៅក្នុងតំបន់ ពីករណី​នេះ។»

ប៉ុន្តែមន្ត្រីអ្នកនាំពាក្យដដែល បានបញ្ជាក់បន្ថែមថា៖ «ស្ថានភាពឧត្តុនិយមមានលក្ខណៈអាក្រក់ខ្លាំងណាស់ នៅទីនោះ។ ជានិច្ចជកាល ទីនោះមិនសូវមានពន្លឺទេ ហើយសម្បូរទៅដោយពពក។ ស្ថានភាពនេះ ក៏បង្ក​ភាព​លំបាក ដោយការរុករកដែរ ជាពិសេស វាស្ថិតនៅក្នុងតំបន់ភ្នំទៅទៀត។»

ប្រទេសឥណ្ឌូនេស៊ី ជាប្រទេសដែលគ្រោះថ្នាក់យន្ដហោះ បានកើតឡើងជាញឹកញាប់ ធ្វើឲ្យមន្ទិលពី​សុវត្ថិភាព ផ្លូវអាកាសរបស់ប្រទេសនេះ ថាមិនមានលក្ខណៈគ្រប់គ្រាន់។ កាលពីខែធ្នូទៅម៉ិញ យន្ដហោះមួយគ្រឿង​នៃ​ក្រុមហ៊ុន អ៊ែរអេសៀ ដែលចេញដំណើរពីក្រុង ស៊ូរ៉ាបាយ៉ា (Surabaya) ឆ្ពោះទៅប្រទេសសិង្ហបូរី បានធ្លាក់នៅ​លើសមុទ្រ ហ្សាវ៉ា បង្កឲ្យអ្នកដំណើរ១៦២នាក់ បានស្លាប់បាត់បង់ជីវិត៕