កម្ពុជា វៀតណាម ថៃ៖ ច្រើនជាង១៥០នាក់ស្លាប់នឹងគ្រោះទឹកជំនន់
មនុស្សច្រើនជាង ១៥០នាក់ បានរងគ្រោះដល់បាត់បង់ជីវិត តាំងពីខែកញ្ញាឆ្នាំ២០១៣នេះមក នៅក្នុងព្រឹត្តិការណ៍គ្រោះទឹកជំនន់ នៅក្នុងតំបន់អាស៊ីផ្នែកអាគ្នេយ៍ ជាពិសេសនៅប្រទេសកម្ពុជា ថៃ និងប្រទេសវៀតណាម។ នេះបើតាមរបាយការណ៍ផ្លូវការបានផ្សាយឲ្យដឹង នៅថ្ងៃចន្ទទី០៧ខែតុលានេះ។
ទឹកជំនន់ឡើងដល់រនាបផ្ទះ៖ សង្ឃឹមថាមិនមានរលកមកទេ ! (រូបថត REUTERS/Erik de Castro)
រាជធានីភ្នំពេញ - នៅប្រទេសកម្ពុជា តុល្យភាពចុងក្រោយ បានផ្សាយឲ្យដឹងថា ប្រទេសនេះមានចំនួនជនរងគ្រោះច្រើនជាងគេ រហូតដល់ទៅ៨៣នាក់ដែលបានស្លាប់ ក្នុងនោះអ្នកស្លាប់ជាកុមារមានចំនួនជិតពាក់កណ្ដាល។ របាយការណ៍ក៏បាននិយាយដែរថា មនុស្សច្រើនជាង១០ពាន់គ្រួសារ ត្រូវបានជម្លៀសចេញទៅរកទីទួលសុវត្ថិភាព។
ភ្លៀងធ្លាក់ដ៏ជោគជាំនៅប៉ុន្មានថ្ងៃចុងក្រោយនេះ បានបង្កឲ្យដើមឈើដែលមានកំពស់ខ្ពស់ជាង៣០ម៉ែត្រ ដួលរលំទៅលើផ្នែកមួយនៃប្រាសាទព្រះខ័ន បង្កឲ្យមានការខូតខាតតិចតួចមួយ។
នៅប្រទេសថៃ តុល្យភាពចុងក្រោយ បានបញ្ជាក់ថា មានមនុស្សចំនួន៣៤នាក់ស្លាប់ និងមនុស្សច្រើនជាង១,៩លាននាក់ រងគ្រោះដោយសារតែទីលំនៅនៃពួកគេត្រូវបានលិចលង់ និងទទួលរងការខូចខាត។
ចំណែកឯប្រទេសវៀតណាមវិញ បានរងគ្រោះនឹងខ្យល់ព្យុះ វូទីព (Wutip) កាលពីចុងខែកញ្ញាកន្លងមកនេះ ធ្វើឲ្យមនុស្ស៤០នាក់ស្លាប់។ ប៉ុន្តែតួលេខនេះ បានបួករួមបញ្ចូលទាំងគ្រោះទឹកជំនន់ ដែលប្រទេសនេះបានរងការប៉ះពាល់ តាំងពីពាក់កណ្ដាលខែកញ្ញាកន្លងមក៕
------------------------------------------------
ដោយ ៖ កេសរកូល - ថ្ងៃទី០៧ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្