អ្នកទទួលខុសត្រូវមួយរូបបានថ្លែងឲ្យដឹងថា យន្ដហោះមួយគ្រឿង របស់ក្រុមហ៊ុន ឡាយអន អ៊ែរ (Lion Air) របស់ប្រទេស​ឥណ្ឌូនេស៊ី បានហោះទៅបុក«គោ»មួយក្បាល ដែលឈរនៅលើផ្លូវឈប់សំចតរបស់យន្ដហោះ នៅព្រលានយន្ដហោះ​មួយផ្នែកខាងលិចនៃប្រទេស។

យន្ដហោះឡាយអនអ៊ែរ ដែលចុះចតទៅបុកសត្វគោ។ (រូបថត Antara/Adiwinata Solihin)

អ្នកដំណើរ១១៧នាក់ ដែលនៅលើយន្ដហោះប្រភេទ ប៊ូអ៊ីញ ៧៣៧-៨០០ នេះ មិនមាននរណាម្នាក់រងរបួសនោះទេ បើ​ទោះជាគ្រោះថ្នាក់បង្កការខូចខាតយន្ដហោះខ្លះៗក៏ដោយ ។ ជើងហោះហើរប្រមាណជា ១០០ផ្សេងទៀត ត្រូវបានលប់​ចោល ធ្វើឲ្យអ្នកដំណើរច្រើនរយនាក់ផ្សេងទៀត ជាប់គាំងធ្វើដំណើរទៅណាមិនរួច សម្រាប់បុណ្យឈប់សម្រាក​សាសនា​មួយ។

គ្រោះថ្នាក់បានកើតឡើងនៅយប់ថ្ងៃអង្គារ នៅពេលដែលយន្ដហោះព្យាយាមចុះចត នៅព្រលានយន្ដហោះ ចាឡាលូដាំង (Jalaluddin) ក្នុងខេត្តហ្គូរ៉ុងតាឡូ (Gorontalo)។ នេះជាការបញ្ជាក់ថារបស់អ្នកនាំពាក្យក្រសួងដឹកជញ្ជូន លោក បំបង អេវ៉ង់ (Bambang Ervan)។ លោក បានលំអិតថាថា អ្នកដំណើរមាន១១០នាក់ រួមនឹងបុគ្គលិកបម្រើការលើយន្ដហោះ ៧នាក់ទៀត។

លោក អេវ៉ង់ បានគូសបញ្ជាក់ដែរថា គោចំនួនបីក្បាល បានដើរឆ្លងកាត់ផ្លូវយន្ដហោះចុះចត ហើយយន្ដហោះបាន​ប៉ះ​យ៉ាង​ហោចណាស់ គោមួយក្បាលពីចំណោមនោះ បន្ទាប់មកបានវេចង្កូតបាត់លំនឹង មុននឹងឈប់នៅស្ងៀម។

ការស៊ើបអង្កេតមួយ ត្រូវបានបើកធ្វើឡើងដើម្បីស្វែងរកការពិតពីហេតុការណ៍នេះ។

តំណាងម្នាក់របស់ព្រលានយន្ដហោះ បានអះអាងពីការលប់ចោលជើងហោះហើរជាច្រើន ប៉ុន្តែនិយាយថា ការចុះចតបាន​បើកដំណើរការឡើងវិញនៅថ្ងៃពុធនេះ។

សូមរំឮកថា កាលពីខែមេសាកន្លងមក យន្ដហោះមួយគ្រឿងទៀតរបស់ក្រុមហ៊ុន ដដែល ហើយបានធ្លាក់ទៅក្នុងសមុទ្រ ក្រោយពីបានខកខានក្នុងការចុះចតនៅព្រលានយន្ដហោះ នៃទីក្រុងបាលី។ គ្រោះថ្នាក់នោះ មិនបានធ្វើឲ្យអ្នកដំណើរ​១០៨នាក់​រងគ្រោះអ្វីឡើយ។ ក្រុមហ៊ុនអាកាសចរណ៍ ឡាយអន អ៊ែរ របស់ឥណ្ឌូនេស៊ី ត្រូវបានចារក្នុងបញ្ជីក្រហមរបស់​បស្ចឹមលោក ដែលហាមមិនឲ្យហោះចូលទៅកាន់លំហរមេឃនៃប្រទេសទាំងនោះ៕

រូបថត និងវីដេអូមួយចំនួន៖

------------------------------------------------
ដោយ ៖ កេសរកូល - ភ្នំពេញ ថ្ងៃទី០៧ ខែសីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ