កាសែតស្កាយស្ពត (Sky Sports) បានរាយការណ៏ថា ក្លិបរៀលម៉ាឌ្រីដ (Real Madrid) បានធ្វើការដេញថ្លៃមួយ ក្នុងតម្លៃ​បំបែក​កំណត់ត្រាពិភពលោក ៨៥លានផោន សម្រាប់ខ្សែបម្រើប្រយុទ្ធក្រុមទតិនហេម (Tottenham) ហ្គារែត ប៊េល (Gareth Bale)។ ហើយការដេញថ្លៃនេះ គ្មានការដោះដូរកីឡាកររៀលម៉ាឌ្រីដ រូបណាមួយនោះទេ ពោលគឺជាកញ្ចប់ ទឹក​ប្រាក់សុទ្ធសាធ។

កីឡាករ ហ្គារែត ប៊េល ពេលនៅទាត់ឲ្យក្រុមទតិនហេម។

ម្ចាស់ក្លិបទតិនហេម បច្ចុប្បន្នកំពុងតែនៅក្នុងទីក្រុងម៉ៃអាមី (Miami) ហើយគាត់បានប្រាប់មកពីចម្ងាយថា កីឡាករ​អន្តរជាតិវ៊ែល របស់គាត់ មិនមែនសម្រាប់លក់នោះទេ ហើយគាត់ក៏ពុំផ្លាស់ប្តូរចិត្តនោះដែរ។

រីឯប៊េល នៅតែរក្សារភាពស្ងៀមស្ងាត់ជាបន្ត ដោយគាត់ពុំដែលនិយាយជាសាធារណៈថា គាត់ចង់ចេញ ឬក៏ចង់នៅ​បន្ត​នោះទេ។ ក្រុមទតិនហេម និងកីឡាករប៊េល ទើបតែត្រឡប់មកពីហុងកុង ហើយពួកគេនឹងធ្វើការហ្វឹកហាត់ឡើងវិញ នៅ​ថ្ងៃពុធនេះ។

អតីតកីឡាករក្រុមទតិនហេម និងជាអ្នកវិភាគបាល់ទាត់ នៅក្នុងទូរទស្សន៏ស្កាយស្ពត លោក ជេមី រ៉េដណែប (Jamie Redknapp) បាននិយាយថា៖ «តើពួកគេអាចបដិសេធ ដោយរបៀបណា? ខ្ញុំជឿថា ក្លិបទតិនហេមជាក្លិបដែលលក់ ព្រោះ​យើង​ធ្លាប់ឃើញហើយ ក្នុងពេលកន្លងមក ដូចជា កីឡាករមីឆែល ខារីក (Michael Carrick), លូកា ម៉ូឌ្រីក (Luka Modric) និងខ្សែប្រយុទ្ធ ឌីមីតា បឺបាតូវ (Dimitar Berbatov) ពួកគេតែងតែលក់ នៅពេលដែលត្រូវថ្លៃគ្នា។»

កាលពីថ្ងៃអង្គារ៏ម្សិលមិញ កីឡាករប្រធានក្រុមរៀលម៉ាឌ្រីដ អ៊ីហ្គឺ កាសីលឡាស (Iker Casillas) ក៏បានជំរុញឲ្យក្លិប​ប្រញ៉ាប់ទិញ ហ្គារែត ប៊េលដែរ។

អ្នកចាំទីអេស្ប៉ាញរូបនេះ បាននិយាយថា៖ «យើងកំពុងតែពិភាគ្សាអំពីកីឡាករម្នាក់ ដែលល្អបំផុតក្នុងចំណោមកីឡាករ៣ ឬ៤នាក់ នៅតំបន់អ៊ឺរ៉ុប ហើយយើងយកឈ្មោះរបស់គាត់មកនិយាយនេះ ព្រោះគាត់ជាកីឡាករបាល់ទាត់ម្នាក់ ដែល​មាន​សមត្ថភាពខ្លាំង ហើយពួកយើងត្រូវការ។»

កាលពីថ្ងៃអង្គារ៏ម្សិលមិញផងដែរ កាសែតអេស្ប៉ាញម៉ាកា (Marca) បានចេញផ្សាយចំណងជើងធំៗ នៅទំព័រមុខថា ម្ចាស់​ក្លិបទតិនហេម លោកដាឌីញ៉ែល ឡេវី (Daniel Levy) ត្រូវការ ១២៦លានផោន ដែលជាតម្លៃមួយ​បំបែកកំណត់ត្រា​ពិភពលោកចាស់របស់កីឡាករគ្រីស្ទែណូ រ៉ូណាល់ដូ (Cristiano Ronaldo) ដែលផ្ទេរពីម៉ែនញូ មករៀលក្នុងតម្លៃ ៨០លាន​ផោន កាលពីឆ្នាំ២០០៩។

ទោះជាយ៉ាងណា តម្លៃចចាររវាងក្លិបទាំង២ ហាក់ដូចជាមានគម្លាតដាច់ឆ្ងាយពីគ្នាខ្លាំង ខណៈដែលរៀលហ៊ានឲ្យ ៨៥​លានផោន ឯក្លិបទតិនហេមកាត់ថ្លៃកប់ក្តោង ១២៦លានផោនទៅវិញ។ ប៉ុន្តែការផ្ទេរដ៏ធំមហិមាមួយនេះ អាចកើតឡើង ឬយ៉ាងណា យើងនឹងរងចាំមើលជាបន្តទៀត ហើយនឹងដឹងក្នុងពេលឆាប់ៗ ខាងមុខនេះ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី៣១ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ