គណបក្សសង្គ្រោះជាតិព្រឹកថ្ងៃទី២៩ខែកក្កដា ច្រានចោលនូវលទ្ធផលបណ្តោះអាសន្ននេះ និងបានទាមទារ ឲ្យបង្កើត​គណៈកម្មការចម្រុះមួយជាបន្ទាន់ ដែលមានការចូលរួមពីគណបក្សធំទាំងពីរ គ.ជ.ប និងអង្គការសង្គមស៊ីវិលពាក់ព័ន្ធ ដើម្បីធ្វើការស៊ើបអង្កេតរួមគ្នា ពីភាពប្រក្រតីទាំងឡាយ ដែលកើតមានក្នុងពេលដំណើរការបោះឆ្នោត។

នៅពេលចាំផ្ដើមរាប់សន្លឹកឆ្នោត ដែលបោះឆ្នោតហើយនៅម៉ោង៣រសៀល ថ្ងៃទី២៨ខែកក្កដា ឆ្នាំ២០១៣ នៅមណ្ឌលវត្តវង្គត្តបូរី។ (រូបថត MONOROOM.info/ U.Bory)

ប្រតិកម្មរបស់គណបក្សប្រឆាំងនេះ បានធ្វើឡើងក្នុងសន្និសិតសារព័ត៌មាន បន្ទាប់ក្រោយមួយថ្ងៃ ពីការប្រកាសលទ្ធផល​បឋម ជាបណ្ដោះអាសន្ន ដែលឲ្យគណបក្សប្រជាជនកម្ពុជារបស់នាយករដ្ឋមន្ត្រីចាំផ្ទះ លោក ហ៊ុន សែន ទទួលបាន៦៨​អាសនៈ ខណៈគណបក្សសង្រ្គោះជាតិទទួលបានតែ៥៥អាសនៈ នៅក្នុងការបោះឆ្នោតមួយកាលពីថ្ងៃអាទិត្យ។ គណបក្ស​ប្រឆាំងបានចោទថា មានភាពមិនប្រក្រតីជាច្រើន បានកើតឡើងក្នុងការបោះឆ្នោតនោះ។ គណៈកម្មធិការចម្រុះនេះ នឹង​ធ្វើការងាររបស់ខ្លួនចាប់ពីពេលនេះតទៅ និងត្រូវផ្ដល់លទ្ធផលនៃការស៊ើបអង្កេតនេះ មិនឲ្យលើសថ្ងៃទី៣១ ខែសីហា ឆ្នាំ២០១៣ខាងមុខ។

ទាក់ទងនឹងព្រឹត្តិការណ៍របត់នយោបាយថ្មីនេះ លោក កែម ឡី អ្នកវិភាគឯករាជ្យពីស្ថានការណ៍នយោបាយនៅកម្ពុជា បាន​ហៅ«ការស្មើរនេះ គឺជាការត្រឹមត្រូវ»មួយ។ នៅក្នុងកិច្ចសម្ភាស ជាមួយទស្សនាវដ្តីមនោរម្យព័ងអាំងហ្វូ អ្នកវិភាគរូបនេះ បានពន្យល់ថា ការស្នើសុំនេះ «ដើម្បីរកឃើញភាពខ្វះចន្លោះ»ទាំងឡាយ ដែលបានកើតមាន នៅក្នុងការបោះឆ្នោតកន្លង​មក តែថាការស្នើសុំនេះអាចបង្កើតទៅរួច ឬអត់ វាអាស្រ័យលើគណបក្សប្រជាជនកម្ពុជា និងលោក ហ៊ុន សែន។

លោកបន្តថាប្រសិនបើការបោះឆ្នោតនេះមានភាពត្រឹមត្រូវ គ្មានអាថ៌កំបាំងនោះ​គណបក្សប្រជាជននឹងយល់ព្រម។ ផ្ទុយ​មកវិញបើការបោះឆ្នោតនេះ គ្មានភាពត្រឹមត្រូវមានអាថ៌កំបាំងច្រើននោះ គណៈបក្សប្រជាជនប្រាកដជា​មិនចង់បង្កើត​នោះ​ទេ។

ក្នុងសន្និសីតសារព័ត៌មាន នៅស្នាក់ការកណ្តាលរបស់គណបក្សសង្គ្រោះជាតិ ស្ថិនៅសង្កាត់ចាក់អង្រែ លោក កឹម សុខា ដែលជាអនុប្រធានគណបក្សសង្រ្គោះជាតិ បានថ្លែងប្រាប់អ្នកសរព័ត៌មានថា៖ «លទ្ធផលវាមានភាពប្រកិតប្រកើយ ហើយ​ប្រសិនបើធ្វើឲ្យត្រឹមត្រូវជាងនេះបន្តិច គណបក្សសង្រោះជាតិ ប្រាកដជាឈ្នះ»។

នៅក្នុងសេចក្ដីថ្ងៃងការណ៍របស់ខ្លួន ចេញផ្សាយនៅយប់ថ្ងៃទី២៨ខែកក្កដា គណបក្សប្រជាជនកម្ពុជា ដែលជាគណបក្ស​កាន់អំណាច បានជូនដំណឹងពីជ័យជំនះរបស់ខ្លួន ក្នុងការបោះឆ្នោតជាតិនីតិកាលទី៥នេះ និងបាន​អំពាវនាវឲ្យ​អ្នក​បោះ​ឆ្នោតឲ្យគណបក្ស រក្សាភាពស្ងៀមស្ងាត់ ដើម្បីរងចាំលទ្ធផលជាផ្លូវការ ប្រកាសដោយគជបក្នុងពេលខាងមុខ។

នៅព្រឹកថ្ងៃដដែលនេះ សន្និសិតអន្តរជាតិនៃគណបក្សនយោបាយនៅអាស៊ី (ICAPP) និង ចលនាអ្នកប្រជាធិបតេយ្យ​និយមកណ្តាលអាស៊ី-ប៉ាស៊ីហ្វិក (CAPDI) ដែលជាភ្ញៀវរបស់គណៈកម្មាធិការជាតិរៀបចំការបោះឆ្នោត (គ.ជ.ប) បាន​ប្រកាសជាផ្លូវការ វាយតម្លៃការបោះឆ្នោនេះ ថាជាការបោះជំហានរបស់កម្ពុជា ទៅរកលទ្ធិប្រជាធិបតេយ្យ និងចាត់ទុក​ដំណើរការបោះឆ្នោតនេះមានសេរីភាព ឆន្ទៈ យុត្តិធម៌ ត្រឹមត្រូវ តម្លាភាព និងគ្មានអំពើហិង្សា។

​ដោយឡែកសហរដ្ឋអាមេរិក តាមរយៈអ្នក​នាំពា​ក្ស​ស្ថានទូត​របស់ខ្លួន​ប្រចាំនៅ​កម្ពុជា បាន​សាទរ​ការបោះឆ្នោត​នេះ ​ដោយ​ចាត់ទុកថា វា​ជាការ​បោះជំហាន​ជាប្រវត្តិសាស្ត្រ​មួយ តែបានស្នើអោយ​គណៈកម្មាធិការ​ជាតិ​រៀបចំ​ការបោះឆ្នោត ធ្វើការ​ស៊ើបអង្កេត​ នូវរាល់​ភាពមិនប្រក្រតី ដែល​ត្រូវបាន​គេ​រាយការណ៍​ថា កើតមាន​ឡើងនៅក្នុងពេល​ដំណើរការ​បោះឆ្នោត​។

ឯប្រធានគណបក្សសង្រ្គោះជាតិ លោក សម រង្ស៊ី វិញ បានស្មើរដល់អ្នកគាំទ្ររបស់ខ្លួន ឲ្យបន្តរក្សាភាពស្ងៀមស្ងាត់ និង​បានសន្សានឹងសហការជាមួយ អង្គការសហប្រជាជាតិ អ្នកជំនាញ និងដៃគូរដែលពាក់ព័ន្ធនានា ដើម្បីធ្វើការស៊ើបអង្កេត ស្វែងរកលទ្ធផលមួយដែលមានភាពយុត្តិធម៌៕

--------------------------------------------------------
ដោយៈ អ៊ុំ បូរី - ភ្នំពេញថ្ងៃទី២៩ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ