ក្រុមមាន់ខ្នាយមាស ទទិនហេម ហតស្ពឺ (Tottenham Hotspur) ឬហៅកាត់ថា «ស្ពឺ» ខិតជិតផ្ទេរយកខ្សែប្រយុទ្ធក្រុមអ្នក​មានបុណ្យបាសេឡូណា (Barcelona) ដេវីដ វីឡា (David Villa) មកចូលរួមក្រុមហើយ បន្ទាប់ពីខ្សែប្រយុទ្ធរូបនេះ បាន​និយាយថា គាត់អាចនឹងផ្ទេរទៅកាន់ទឹកដីអង់គ្លេស ដើម្បីចង់លេងជាជម្រើស១១នាក់ដំបូង។ នេះបើតាម ហ្គោលដតខម (Goal.com) បានរាយការណ៏។

ដេវីដ វីឡា កីឡាករខ្សែរប្រយុទ្ធបាសេឡូណា។ (រូបថត Getty Images / All Over Press)

ខ្សែប្រយុទ្ធអេស្ប៉ាញរូបនេះ ជាគោលដៅធំទី១របស់ក្រុមស្ពឺ សម្រាប់រដូវក្តៅខាងមុខនេះ ខណៈដែលគ្រូបង្វឹកលោកអេនដ្រេ វីឡាសបូអាស (Andre Villas-Boas) ចង់បន្ថែមនូវខ្សែប្រយុទ្ធដែលមានបទពិសោធន៏ច្រើន និងមានសមត្ថភាពខ្ពស់មក​ចូលរួមក្រុមនៅរដូវកាលថ្មី។

កីឡាករវ័យ ៣១ឆ្នាំ បានព្រមព្រាងល័កខ័ណ្ឌផ្ទាល់ខ្លួនអស់ហើយ ជាមួយក្រុមស្ពឺ ហើយគាត់ថែមទាំងនិយាយថា គាត់ចង់​លេងនៅក្នុងក្រមខ័ណ្ឌព្រីមែលីក (Premier League) ទៀតផង។

សេចក្តីរាយការណ៏នោះដដែល បានឲ្យដឹងថា គ្រូបង្វឹក លោកវីឡាសបូអាស បានជជែកគ្នាក្រៅផ្លូវការតាមទូរស័ព្ទ ជាមួយ​វីឡាខ្លះៗដែរ ហើយអ្នកចាត់ការផ្នែកបច្ចេកទេសប្រចាំក្លិបលោក ហ្វ្រែនកូ បាលឌីនី (Franco Baldini) ក៏បានទាក់ទងជា​មួយនឹងភ្នាក់ងាររបស់កីឡាកររួចហើយដែរ។

ក្រុមស្ពឺ បានចចារគ្នាជាមួយវីឡា ខណៈដែលពួកគេធ្វើដំណើរទៅកាន់ប្រទេសប្រេស៊ីល ដើម្បីចុះកិច្ចសន្យាជាមួយខ្សែ​បម្រើក្រុមខូរីថែន (Corinthians) ផូលីញ៉ូ (Paulinho) ហើយក៏ឆ្លៀតពេលជួបវីឡាតែម្តងទៅ ស្របពេលដែលវីឡានៅទីនោះ​ស្រាប់។

ប៉ុន្តែទោះបីជាយ៉ាងណា វីឡាក៏មានក្រុមអ៊ីតាលីមួយ ហ្វឡរិនទីណា (Fiorentina) មានការចង់បានខ្លាំងដូចគ្នា ហើយ​ពួក​គេក៏កំពុងតែដុតដៃដុតជើង ដើម្បីប្រជែងជាមួយក្រុមស្ពឺដែរ។

ស្ពឺ សង្ឃឹមថានឹងមានការព្រមព្រាងគ្នាមួយ ជាមួយក្រុមបាសេឡូណា ក្នុងតម្លៃទាបជាង ១២លានផោន សម្រាប់ខ្សែ​ប្រយុទ្ធ​វីឡា ហើយពួកគេបានត្រៀមដេញថ្លៃដំបូង ក្នុងតម្លៃ ៨លានផោន ព្រោះវីឡា មានវ័យចាស់ហើយ ហើយថែមទាំងមាន​របួសរ៉ាំរ៉ៃទៀត។

ដេវីដ វីឡា នឹងធ្វើការសម្រេចចិត្តអនាគតរបស់គាត់ ថាគាត់នឹងទៅលេងនៅក្របខ័ណ្ឌណានៅរដូវកាលក្រោយ នៅពេល​ដែលត្រឡប់មកពីការប្រកួតខុនហ្វេដឺរ៉េសិនខាប់ (Confederations Cup) នាប្រទេសប្រេស៊ីលវិញ បន្ទាប់ពីក្រុមរបស់គាត់ (អេស្ប៉ាញ) បានចាញ់ក្រោមស្នាដៃក្រុមម្ចាស់ផ្ទះ កាលពីយប់មិញ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០១ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ