គោលដៅចំបងរបស់ក្រុមអធិរាជស រៀលម៉ាឌ្រីដ (Real Madrid) ដែលជាគ្រូបង្វឹករបស់ក្រុមប៉ារីស ហ្សិន ជឺម៉ិន (Paris St Germain) លោកកាឡូ អេនសេឡូទី (Carlo Ancelotti) និងខ្សែបម្រើរបស់ក្រុមម៉ាឡាហ្គា (Malaga) អ៊ីស្កូ (Isco) ជិតបានមកចូលរួមជាមួយក្លិបហើយ។ នេះជាសម្តីរបស់លោកហ្វឡរ៉ិនទីណូ ប៉េរែស (Florentino Perez) ម្ចាស់ក្លិប​រៀលម៉ាឌ្រីដ និយាយទៅកាន់អ្នកសារព័ត៌មាន។

លោកកាឡូ អេនសេឡូទី គ្រូបង្វឹករបស់ក្រុមប៉ារីស ហ្សិន ជឺម៉ិន។ (រូបថត JEFFROY GUY/SIPA)

ក្លិបម្ចាស់ជើងឯកពានរង្វាន់កំពូលរបស់អ៊ឺរ៉ុប ៩សម័យកាល នឹងតែងតាំងលោកអេនសេឡូទី ជាគ្រូបង្វឹកថ្មី ជំនួស​ដំណែងលោកជូសេ ម៉ូរីញ៉ូ (Jose Mourinho) ដែលបានចាកចេញទៅដឹកនាំក្រុមឆែលស៊ី (Chelsea) កាលពីចុងរដូវ​កាលមុន។ ជាងនោះទៅទៀត ក្លិបនឹងបន្ថែមសមាជិកវ័យក្មេងថ្មី អ៊ីស្កូ ដើម្បីជួយពង្រឹងក្រុមនៅរដូវកាលថ្មីខាងមុខ។

លោកប៉េរែស បានប្រាប់ដល់កាសែតក្នុងស្រុកមួយ នៃប្រទេសអេស្ប៉ាញថា៖ «ពេលនេះ អេនសេឡូទី មិនទាន់បាន​ចុះកិច្ចសន្យានៅឡើយទេ។ ចំពោះពេលវេលា វាអាស្រ័យទៅលើក្រុមប៉ារីស ក្នុងការព្រមព្រាងគ្នា​ជាមួយលោក​អេនសេឡូទី និងការប្រកាសគ្រូបង្វឹកថ្មីរបស់គេ លោកឡូរ៉ង់ ប្លង់ (Laurent Blanc)។ យើងបានព្រមព្រៀងគ្នាអស់​ហើយ ជាមួយក្លិបប៉ារីស ដូច្នេះខ្ញុំគ្រាន់តែដឹងច្បាស់ថា លោកអេនសេឡូទី ជាគ្រូបង្វឹកថ្មី សម្រាប់ក្រុមខ្ញុំ។»

អតីតគ្រូបង្វឹកក្រុមជម្រើសជាតិបារាំង លោកប្លង់ បាននិយាយកាលពីថ្ងៃអាទិត្យថា គាត់ជិតក្លាយជាគ្រូបង្វឹកថ្មី របស់​ក្រុមម្ចាស់ជើងឯកបារាំងហើយ ដើម្បីជំនួសដំណែងលោកអេនសេឡូទី ដែលកំពុងតែទទូចសុំចាកចេញពីក្លិប។

បុរសសញ្ជាតិអ៊ីតាលី វ័យ៥៤ឆ្នាំ ហាក់ដូចជាមានទំនោរ ចង់ទៅដឹកនាំក្រុមយក្សរបស់អេស្ប៉ាញខ្លាំងណាស់ បន្ទាប់​ពី​ដឹងថាលោកម៉ូរីញ៉ូ បានចាកចេញ។

ខ្សែបម្រើឆ្នើមវ័យក្មេង អាយុក្រោម២១ឆ្នាំរបស់អេស្ប៉ាញ អ៊ីស្កូ ជាគោលដៅដ៏សំខាន់មួយរបស់ក្រុមរៀលម៉ាឌ្រីដ និង​ក្រុមម៉ែនឆេស្ទើ ស៊ីធី (Manchester City) បន្ទាប់ពីកីឡាកររូបនេះ បង្ហាញពីទម្រង់លេងគួរឲ្យស្ងើចសរសើរ ២រដូវ​កាល​ចុងក្រោយ ជាមួយនឹងក្រុមម៉ាឡាហ្គា និងបានជួយឲ្យក្រុមឡើងដល់វគ្គ ១ភាគ៤ផ្តាច់ព្រ័ត្រឆែមពានលីក (Champions League) កាលពីរដូវកាលមុន។

ជាពិសេសកីឡាកររូបនេះ ជាតួរអង្គសំខាន់របស់ក្រុមជម្រើសជាតិអេស្ប៉ាញ អាយុក្រោម២១ឆ្នាំ ដែលបានជួយ​ឲ្យ​អេស្ប៉ាញ លើកពានអ៊ឺរ៉ូ អាយុក្រោម២១ឆ្នាំ (Euro Under-21) នៅប្រទេសអ៊ីស្រាអែល កាលពីថ្ងៃទី១៨ មិថុនា កន្លង​ទៅថ្មីៗនេះ។

អតីតគ្រូបង្វឹកក្រុមម៉ាឡាហ្គា លោកម៉ាញ៉ូអែល ប៉េឡេហ្គ្រីនី (Manuel Pellegrini) ដែលបានទៅដឹងនាំក្រុម​ម៉ែនស៊ីធី​នោះ ចង់នាំយកអតីតកូនក្រុមរបស់លោក ទៅកាន់ប្រទេសអង់គ្លេសដែរ ប៉ុន្តែហាក់ដូចជាមានការយឺតយ៉ាវ​ជាង​ក្រុម​អេស្ប៉ាញ (រៀលម៉ាឌ្រីដ) បន្តិច។

លោកប៉េរែស បានបន្ថែមថា៖ «អ៊ីស្កូ ជាកីឡាករមួយរូបល្អបំផុត នៅក្នុងក្រុមជម្រើសជាតិអេស្ប៉ាញ ហើយយើងជឿ​ថាគាត់ប្រាកដជាមានសមត្ថភាពគ្រប់គ្រាន់ លេងឲ្យក្រុមរៀលម៉ាឌ្រីដ។ ខ្ញុំដឹងថា គាត់ចង់មកទីនេះខ្លាំងណាស់ ហើយ​ខ្ញុំក៏ចង់ឲ្យគាត់មកចូលរួមជាមួយពួកយើងខ្លាំងដែរ។»

កាសែតក្នុងស្រុកប្រទេសអេស្ប៉ាញ បានរាយការណ៏ថា រៀលម៉ាឌ្រីដ បានព្រមឲ្យតម្លៃ ៣០លានអ៊ឺរ៉ូ (៣៩.២៨លាន​ដុល្លា) ទៅក្រុមម៉ាឡាហ្គា ដើម្បីនាំយកអ៊ីស្កូ មកកាន់ទីក្រុងម៉ាឌ្រីដ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៥ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ