ការប៉ះទង្គិចគ្នារវាងរថភ្លើងដឹកអ្នកដំណើរពីរខ្សែ នៅតំបន់ជាយក្រុងប៊ុយណូស៍អ៊ែរ (Buenos Aires) ប្រទេសអាហ្សង់ទីន បានបង្កឲ្យយ៉ាងហោចណាស់មនុស្សបីនាក់ស្លាប់ និងច្រើនជាង២០០នាក់រងរបួស  ខណៈពេលមានមនុស្សជិះពេញប្រៀប នៅវេលាព្រឹកថ្ងៃទី១៣ខែមិថុនានេះ។

(រូបថត Enrique Marcarian/Reuters)

ជាគ្រោះថ្នាក់កើតនៅលើខ្សែរថភ្លើងដដែល ដែលរដ្ឋាភិបាលបានដាក់ក្នុងការឃ្លាំមើល ក្រោយពីគ្រោះថ្នាក់ដ៏ធំមួយ កាល​ពីឆ្នាំកន្លងទៅ ដែលធ្វើឲ្យមានមនុស្សស្លាប់៥១នាក់។ រថភ្លើងទាំងពីរបានបុកគ្នានៅវេលាម៉ោង ៧និង៧នាទី រវាងស្ថានីយ៍​ម៉ូរ៉ុង (Moron) និងកាស្ទើឡា (Castelar) នៅលើខ្សែរត់ សាមីអេនតូ (Sarmiento) ដែលភ្ជាប់តំបន់ជាយក្រុង​ខាងលិចនៃ​ទីក្រុងប៊ុយណូស៍អ៊ែរ ទៅកាន់ស្ថានីយ៍មួយនៅកណ្ដាលក្រុង។

ភ្នាក់ងារអយស្ម័យ​យានជាតិបានបញ្ជៀសមូលហេតុបច្ចេកទេស ដែលអាចបណ្ដាលមកពីចាប់ហ្វ្រាំងមិនស៊ី ប៉ុន្តែទំនងជា​បានទម្លាក់កំហុស ទៅលើអ្នកបើកបររថភ្លើងនោះខ្លួនឯង។

ភ្នាក់ងារអយស្ម័យ​យានបានពន្យល់ទៀតថា រូបភាពពីលើអាកាសបានបង្ហាញថា រថភ្លើងបានចាប់ហ្វ្រាំងធម្មតា នៅស្ថានីយ​សំចតរបស់ខ្លួនដំបូងមួយ មុនពេលដែលវាបានជ្រុលល្បឿនរបស់វា ហួសការផ្ដល់សញ្ញាចំនួនបួនលើកផ្ទួនគ្នា ដោយ​មិន​បានឈប់រហូតដល់មានការជល់គ្នាជាមយយនឹងរថភ្លើងមួយទៀត នៅចន្លោះស្ថានីយសំចត។

អ្នកបើករថភ្លើង និងអ្នកជំនួយការ បានរួចរស់មានជីវិត តែមិនទាន់អាចនិយាយអ្វីបាននៅឡើយ។ រដ្ឋមន្ត្រីក្រសួងដឹកជញ្ជូន ផ្លរ៉ងស៊ីយ៉ូ រ៉ង់ដាស៊ូ (Florencio Randazzo) បានអំពាវនាវទៅប្រជាជនឲ្យរក្សាការស្ងប់ស្ងៀម និងទន្ទឹងរងចាំក្នុងពេល​ដែល​អាជ្ញាធរកំពុងដឹកនាំការស៊ើបអង្កេត។

សាក្សីបានឲ្យដឹងថា ហេតុការណ៍បានកើតឡើង ឮសម្លេងដូចជាការផ្ទុះមួយ បង្កការរញ្ជួយដល់ជញ្ជាំងផ្ទះនៅក្បែរនោះ ហើយទូរថភ្លើងជាច្រើន បានរត់ចេញពីផ្លូវ។ អ្នកដំណើរមួយចំនួនបានបំបែកកញ្ចក់ទូរថភ្លើង រំដោះខ្លួនចេញ ហើយ​ដើរ​តាមបណ្ដោយផ្លូវដែក តែអ្នកដំណើរភាគច្រើនសុខចិត្តរងចាំ រហូតដល់ការជួយសង្គ្រោះបានមកដល់។

អាជ្ញាធរបានអះអាងថា យ៉ាងហោចណាស់មនុស្សបីនាក់បានស្លាប់បាត់បង់ជីវិត ហើយមន្ទីរពេទ្យចំនួនបួននៅក្នុងតំបន់ បានទទួលមនុស្សរបួសច្រើនជាង២០០នាក់។ អ្នករបួសមួយចំនួនធំ បានរងគ្រោះនឹងការប៉ះពាល់សន្លាក់ ឬឆ្អឺង។ ប៉ុន្តែ​ក្នុង​ចំណោមនោះ អ្នករបួសចំនួនប្រាំនាក់ ស្ថិតនៅក្នុងសភាពធ្ងន់ធ្ងរ និងយុវជនម្នាក់ បានបាក់ជើងរបស់ខ្លួនមួយចំហៀង៕

សូមទស្សនាវីដេអូព័ត៌មាន ស្ដីពីហេតុការណ៍នេះដូចតទៅ៖

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី១៣ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ