អ្នកចូលរួមធ្វើបាតុកម្មថ្ងៃទី០៩ខែមិថុនានេះ ជាទូទៅបានសម្តែងនូវការមិនពេញចិត្តចំពោះសំដីលោក កឹម សុខា ហើយ​បានថ្កោលទោស​យ៉ាង​ដាច់អហង្កា និងមិនមានការលើកលែងណាមួយឲ្យប្រសើរឡើយ បើលោក កឹម សុខា មិនធ្វើការ​សុំទោសនោះ។ តែក្នុង​ចំណោមនោះ ក៏មានប្រជាពលរដ្ឋមួយចំនួនទៀត ដែលបានចូលរួមនោះ បានត្អូញថា ពួកគាត់​មក​ទាំងបង្ខំចិត្តទេ។

បាតុកម្មប្រឆាំងប្រធានស្ដីទីគណបក្សសង្គ្រោះជាតិ លោក កឹម សុខា។ (រូបថត MONOROOM.info/ O.Vary)

មនោរម្យព័ងអាំងហ្វូ សូមលើកយកពាក្យត្អូញត្អែររបស់បាតុករកំសត់ទាំងនោះ មកជម្រាបជូនដូចតទៅ៖

លោកអុំ ផា រុំ មកពីខេត្តកំពុងស្ពឺ ក្នុងសម្លៀកបំពាក់អាវផ្ទៃមេឃ មួកព៌ណស ដែលកាន់បដាសរសេរថា «កឹម សុខា ជា​មនុស្សកំសាកជាងឌុច» បានបញ្ជាក់ថា លោកក៏មានបងប្អូនឪពុកម្តាយ បានស្លាប់នៅជំនាន់ប៉ុលពតនោះដែរ។ លោក​បន្តថា «ខ្ញុំមិនមានការខឹងសម្បាអ្វីនោះទេ ព្រោះខ្ញុំយល់ថា ទាំងនេះជាល្បែងនយោបាយរបស់ អ្នកកនយោបាយទាំង នោះ ក្នុងការវាយប្រហារគ្នា ដើម្បីសន្លឹកឆ្នោតតែប៉ុណ្ណោះ»។ លោកថា នេះមិនមែនជាលើកទីមួយនោះទេ វាមានច្រើនលើក ច្រើនសារណាស់មកហើយ គ្រាន់តែវាស្ថិតក្នុងរូបភាពទីទៃពីគ្នាប៉ុណ្ណោះ។ ម្យ៉ាងទៀតវាជាក់ស្តែងណាស់ ត្រង់ជា​វេលា​មួយ​កៀកទៅនឹងថ្ងៃបោះឆ្នោតតែម្តង។ ឯការចូលរួមនេះវិញ មកទាំងបង្ខំចិត្តទេ។

ឯអ្នកមីង ជា វន្ធី មកពីខេត្តតាកែវ អង្គុយកាន់រូបកុមារីដែលជាប់ទោសនៅគុកទួលស្លែង ក្នុងរបបខ្មៃរក្រហម ក៏បាន​និយាយ​ប្រហែលគ្នានេះដែរ។ មីង វន្ធី បញ្ជាក់ថា ក្នុងភូមិរបស់មីង គេបាននាំគ្នាមកចូលរួមក្នុងបាតុកម្មនេះអស់ហើយ ហើយការ​មកនេះមិនមានការបង្ខំឡើយ ព្រោះគេបានរៀបចំទាំងការញុំ ទាំងការធ្វើដំណើរទៅមក ព្រមទាំងចែកថវិការដល់អ្នក ដែល​បានចូលរួមក្នុងម្នាក់ពីរម៉ឺនរៀលទៀត។ មីងបានបង្ហាញនូវហេតុផលថា ការរស់នៅក្នុងសង្គមមួយ ដែលមិនមានការគោរព​ច្បាប់ច្បាស់លាស់ ការអាងលើអំណាច បុណ្យសក្តិ របស់អ្នកធំ និងអ្នកមានឥទ្ធិពល ឯយើងជាពលរដ្ឋត្រូវធ្វើយ៉ាងណា? មិនត្រូវចេះបត់បែនតាមកាលៈទេសៈ បើមិនដូច្នេះទេ មុខជាមានទុកព្រួយរាល់ថ្ងៃមិនខាន ដល់ពេលនោះគ្មានអ្នកណាម្នាក់ ដែលអាចជួយយើងក្រៅពីខ្លួនឯងនោះទេ។

អាវព៌ណទឹកក្រូច ក្នុងដៃមានកាន់ទឹកសុទ្ធ លោក ពូ ចាន់ រិទ្ធី មកពីខេត្តកណ្តាល បាននិយាយថា «ខ្ញុំមកនេះមិនមែន​ដើម្បី​ទាមទារ រកចាញ់ឈ្នះនោះទេ ហើយក៏មិនដើម្បីអ្នកណាម្នាក់ដែរ គឺដើម្បីតែខ្លួនឯង និងគ្រួសារបានសុខប៉ុណ្ណោះ»។ លោក​ពូបន្តថា ការដែលមកនេះ ណាមួយចង់មើលពីការធ្វើបាតុកម្មនេះវាយ៉ាងណា និងមានការរៀបចំយ៉ាងម៉េចខ្លះ!។ លោកពូ​និយាយហាក់ដូចជាអស់សំណើចថា «បើគេមកអស់ហើយ យើងមិនមកដូចជាមិនល្អមើលទេ និងមិនសមផង ត្រូវតែមក ម្យ៉ាងទៀតមានទៅអស់លុយកាក់ឯណា គេចេញឲ្យហ្នឹង»!

ទោះជាយ៉ាងនេះក្តីក៏មានប្រជាពលរដ្ឋមួយចំនួនទៀតពិតជា មកក្នុងនាមអ្នកដែលទទួលរងនូវការឈឺចាប់ ក្នុងរបបខ្មែរ​ក្រហមដែលបានសម្លាប់មនុស្សអស់ចិតបីលាននាក់ ក្នុងរយៈកាលតែបីឆ្នាំ ប្រាំបីខែ និងម្ភៃថ្ងៃប៉ុណ្ណោះ។ ហើយពួក​គាត់​ពិតជាចង់ឃើញ នូវការសុំទោសបីលោក កឹម សុខា ណាស់។ ពួកគាត់បន្តថា វាមិនមែនជាការធ្ងន់ធ្ងរនោះទេ គ្រាន់តែ​ពាក្យសុំទោសមួយម៉ាត់នោះ ហើយការសុំទោសរបស់គាត់អាចធ្វើឲ្យប្រជាពលរដ្ឋ មានការធូរស្បើយក្នុងអារម្មណ៍ និងអាច​បន្តគិតលើគោលនយោបាយជាបន្តទៀត សម្រាប់ការបោះឆ្នោតខាងមុខ។ ពួកគាត់ចាត់ទុកថា ការឃោសនារកសម្លេង​គាំទ្ររបស់លោក កឹម សុខា គឺធ្វើឡើងដោយអចេតនាទៅចុះ បើមានការទទួលសុំទោសនោះ។ ប៉ុន្តែផ្ទុយមកវិញ បើមិន​មានការសុំទោសទេ បើជាសម្លេងពិត មានន័យថាជាចេតនាអាក្រក់ក្នុងការធ្វើនយោបាយ ហេតុដូចម្តេចបានជា​មិនគិតពី​ផលប៉ះពាល់ពាល់ ជាពិសេសជាមួយទឹកចិត្តប្រជាពលរដ្ឋ ដែលទើបនឹងរួចផុតពីភ្នក់ភ្លើងសង្គ្រាម និងមានគ្រួសារមួយ​ចំនួនបានស្លាប់ស្ទើរផុតពូជទៅហើយនោះ។

ព្រះតេជគុណ លួន សុវ៉ាត ជាអ្នកអង្កេតការគោរពសិទ្ធិមនុស្សនៅកម្ពុជា មកពីខេត្តសៀមរាបបានមានសង្ឃដីកាថា ខ្មែរ​ជាពូជមហានគរ មានវប្បធម៌ល្អ ពូជល្អ ត្រូវចេះថែរក្សា ចេះជួយគោរព និងស្រលាញ់គ្នា ព្រោះពូជយើងតែមួយ និងមាន​ព្រះពុទ្ធសានាជាអ្នកនាំផ្លូវ។ ចំពោះការធ្វើបាតុកម្មនេះ ព្រះតេជគុណមានសង្ឃដីកាគាំទ្រ ឲ្យមានសិទ្ធិ សេរីភាព និង​យុត្តិធម៌។ តែព្រះអង្គបន្តថា អ្នកដឹកនាំខ្មែរគួតែយកសិល្ប សម្មាធិ បញ្ញា មកដឹកនាំប្រទេស រួមគ្នាកសាង​ទឹកដី ព្រៃប្រឹក្សា តាមគោលការណ៍ច្បាប់ដែលមានចែងជាធរមាន និងតាមលិទ្ធិប្រជាធិបតេយ្យសេរីពហុបក្ស ដោយជ្រក​ក្រោមបាវចនា ជាតិ សាសនា ព្រះមហាក្សត្រ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៩ មិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ