ការត្រៀមខ្លួនរបស់ក្រុមម៉ូណាកូ (Monaco) សម្រាប់រដូវកាល ២០១៣-២០១៤ នៅតែបន្ត ដោយក្រុមដែលទើបតែឡើង​មក​លីក១ថ្មីនេះ បានទិញខ្សែការពារកណ្តាលរីកាដូ កាវ៉ាល់ហូ (Ricardo Carvalho) ពីក្រុមរៀលម៉ាឌ្រីដ (Real Madrid) កាល​ពីថ្ងៃអង្គារ៏ម្សិលមិញ ក្នុងកិច្ចសន្យារយះពេល១ឆ្នាំ។

ខ្សែការពារកណ្តាលរីកាដូ កាវ៉ាល់ហូ នឹងផ្លាស់មកនៅក្នុងក្រុមម៉ូណាកូ។

កីឡាករអន្តរជាតិព័រទុយហ្គាល់វ័យ៣៥ឆ្នាំ បានផ្ទេរពីក្រុមឆែលស៊ី (Chelsea) ទៅកាន់ក្រុមរៀលម៉ាឌ្រីដ កាលពីឆ្នាំ២០១០។ ហើយធ្លាប់បានឈ្នះពានរង្វាន់ឆែមពានលីក (Champions League) ១លើក ក្រោមការដឹកនាំរបស់លោកជូសេ ម៉ូរីញ៉ូ (Jose Mourinho) កាលពីគាត់លេងឲ្យក្រុមប៉តូ (Porto) ឆ្នាំ២០០៤។

ក្រុមម្ចាស់ជើងឯកលីក២ (Ligue 2) បានប្រកាសជាផ្លូវការនៅលើគេហទំព័ររបស់ខ្លួន (asm-fc.com) ថា ក្លឹបបានយល់​ព្រម​នាំយកកាវ៉ាល់ហូ ពីក្រុមរៀលម៉ាឌ្រីដ ដោយឥតគិតថ្លៃ បន្ទាប់ពីកីឡាករវ័យចំណាស់រូបនេះ បង្ហាញខ្លួនក្នុងក្រុម​អធិរាជស បានត្រឹមតែ៨លើកតែប៉ុណ្ណោះ ក្នុងរដូវកាលនេះ។

ក្រុមបាល់ទាត់ម៉ូណាកូ ឡើងមកលីកកំពូលលើកនេះ មានមហិច្ឆតាដ៏ធំ ពោលគឺចង់ឈ្នះពានរង្វាន់លីក១ (Ligue 1) នៅ​រដូវកាលថ្មីខាងមុខនេះតែម្តង។ ហើយកាលពីសប្តាហ៏មុន ក្លឹបមួយនេះ ទើបតែទិញបានខ្សែបម្រើ ចៅ ម៉ូធីញ៉ូ (Joao Moutinho) និងជេម រ៉ូឌ្រីកេ (James Rodriguez) ពីក្រុមប៉តូ ដោយចំណាយទឹកប្រាក់សរុបអស់ ៧០លានអ៊ឺរ៉ូ (៨៩.៩៩​លាន​ដុល្លា)។

អតីតកីឡាករឆែលស៊ី (កាវ៉ាល់ហូ) បាននិយាយថា «ខ្ញុំពិតជារីករាយខ្លាំងណាស់ ដែលបានមកចូលរួមជាមួយក្រុមអាអេស ម៉ូណាកូ (AS Monaco) ហើយនឹងក្លាយទៅជាផ្នែកមួយនៃដំណើរផ្សងព្រេងថ្មីនេះ។»

ជាងនេះទៅទៀត មហាសេដ្ឋីរុស្ស៊ីលោក ឌីមីឌ្រី រីបុឡុលឡីវ (Dmitry Rybolovlev) ដែលទើបតែមកកាន់កាប់ក្លឹប​កាល​ពី​ឆ្នាំ២០១១នោះ ចង់ទិញខ្សែប្រយុទ្ធកូឡុំប៊ី រ៉ាដាមែល ហ្វាលខាវ (Radamel Falcao) ពីក្រុមអាត្លិកទិកូ ម៉ាឌ្រីដ (Atletico Madrid) ម្នាក់ទៀត ដែលតម្លៃត្រូវបានគេដឹងថា នឹងក្លាយជាកំណត់ត្រាថ្មីមួយខ្ពស់បំផុត ក្នុងប្រវត្តិសាស្ត្រ​បាល់ទាត់ប្រទេស​បារាំង។

កាសែតក្នុងស្រុកអេស្ប៉ាញ បានរាយការណ៏កាលពីព្រឹកមិញថា ខ្សែប្រយុទ្ធហ្វាលខាវ នឹងធ្វើការចចារ ជាមួយក្លឹបម៉ូណាកូ នៅថ្ងៃពុធនេះ ដែលមានតម្លៃខ្លួនប្រហែល ៧៥.១លានដុល្លាសហរដ្ឋអាមេរិក៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៩ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ