ស្ត្រីជនជាតិម៉ុងតែនេគ្រូ ជាសកម្មជនអង្គការមួយរូប ដែលបានស្ទុះទៅអោបភ្នាក់ងារនគរបាល ខណៈពេលមាន​បាតុកម្ម​ប្រឆាំងអាជ្ញាធរនៅរដ្ឋធានីប៉ូហ្គូរីកា (Podgorica) នោះ ត្រូវបានផ្ដន្ទាទោស អោយបង់ប្រាក់ចំនួន៥៥០អ៊ឺរ៉ូ។ អ្នកស្រី វ៉ានចា កាឡូវិច (Vanja Calovic) នាយិការអង្គការក្រៅរដ្ឋាភិបាលមួយ បានថ្លែងពីការដាក់ទោសនោះថា ប្រព័ន្ធយុត្តិធម៌របស់​ប្រទេសម៉ូងតេនេគ្រូ បានវាយតម្លៃពីការ«អោប»របស់នាង ថាបានរំខានទៅដល់ដំណើរការងារ របស់ភ្នាក់ងារនគរបាល​រូបនោះ។

អ្នកស្រី វ៉ានចា កាឡូវិច (អាវលឿង) ក្នុងពេលអោបភ្នាក់ងារនគរបាល។

អ្នកស្រីកាឡូវិច (Calovic) បានថ្លែងថា «ជាសាលក្រមដ៏អាក្រក់ជាទីបំផុតមួយ នៅក្នុងតំបន់ និងនៅក្នុងសហគមន៍អ៊ឺរ៉ុប ដែលខ្ញុំមិនដែលលឺនិងជួបប្រទះ»។ «ពួកគេមិនទៅតាមដានស៊ើបអង្កេតពីឃាតករ ឬបទឧក្រិដ្ឋអ្វីនោះទេ តែបែជា​មក​អង្កេតខ្ញុំ​ពីបទ​"ថើប"មួយទៅវិញ»។

អ្នកស្រីបានពន្យល់ថា អ្នកស្រីបានអោបភ្នាក់ងារនគរបាលម្នាក់នោះ ដោយសារអ្នកស្រីមិនចង់អោយមានភាពតានតឹង នៅ​ពេល​មានបាតុកម្មកាលពីឆ្នាំមុន ដែលពេលនោះសភាពប្រឈមមុខគ្នា ចេះតែកើនឡើងខ្លាំងទៅៗ រវាងបាតុករនិង​ក្រុម​ភ្នាក់ងារនគរបាល។

«ហើយការរថើបរបស់ខ្ញុំ វាបានទទួលផ្លែផ្ការបស់វាអញ្ចឹងមែន ព្រោះបន្ទាប់មកសភាពស្ងប់ស្ងៀមបានត្រឡប់មកវិញ» អ្នកស្រី​បានបញ្ជាក់។

ដោយល្បីថាជាសកម្មជនរិះគន់មិនសំចៃមាត់ ទៅលើអាជ្ញាធរនៃប្រទេសម៉ុងតេនេគ្រូផងនោះ អ្នកស្រីកូឡូវិច បានចាត់ទុក​ថាសាលក្រមនេះ ជាការគាបសង្កតមួយមកលើអង្គការរបស់អ្នកស្រី។ តែនេះមិនមែនជាលើកទីមួយទេ ព្រោះមុននេះ​អ្នកស្រីក៏ត្រូវបានគេពិន័យឲ្យបង់ប្រាក់៦០០អ៊ឺរ៉ូម្ដងមុនរួចហើយដែរ ពីបទបានបិតក្រដាសផ្សាយ នៅលើអាគារក្រុមប្រឹក្សា​ធម្មនុញ្ញក្នុងរដ្ឋធានី កាលពីពេលធ្វើបាតុកម្មមួយផ្សេងទៀត៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី១៩ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ