សារមន្ទីរសិល្បៈនៃទីក្រុងញ៉ូយក បានប្រកាសពីថ្ងៃសុក្រទី០៣ខែមេសានេះ ថាខ្លួននឹងសងទៅកម្ពុជាវិញ នូវរូបចម្លាក់ខ្មែរ​ចំនួនពីរ ចំណាស់តាំងពីសតវត្សន៍ទី១០។ ទីក្រុងភ្នំពេញបាននិយាយថា រូបចម្លាក់ទាំងពីរនេះ ត្រូវបានលួចចេញពីប្រាសាទ​ដើមរបស់វាមួយ នៅកណ្ដាលព្រៃ។

ផ្នែកមួយដែលតាំងសុទ្ធតែចម្លាក់មកពីទ្វីបអាស៊ី របស់សារមន្ទីរសិល្បៈនៃទីក្រុងញ៉ូយក។

សារមន្ទីរអាមេរិកាំង បានបញ្ជាក់ថា រូបចម្លាក់ចំនួនពីរធ្វើពីថ្មភក់ នៃរចនាបទ«កោះកែរ» នឹងត្រូវបញ្ជូនសងទៅឲ្យកម្ពុជាវិញ បន្ទាប់ពីបានដាក់តាំងពិព័ណ៌អស់រយះពេល ២០ឆ្នាំកន្លងមក នៅក្នុងផ្នែកមួយនៃសិល្បៈចម្លាក់អាស៊ីរបស់សារមន្ទីរ។

» សូមអានអត្ថបទដែលទាក់នឹងប្រធានបទនេះឡើងវិញ ដោយចុចលើទីនេះ។

រូបចម្លាក់ទាំងពីរ ត្រូវបានប្រគល់មកអោយសារមន្ទីរនេះ ដាច់ដោយឡែកពីគ្នា នៅចុងទសវត្សន៍ឆ្នាំ៨០ និងទសវត្សន៍​ឆ្នាំ​៩០ ហើយត្រូវបានចាត់ទុកនៅពេលនោះ ដូចជាបូរាណវត្ថុស្របច្បាប់។ នៅក្នុងសេចក្ដីប្រកាសព័ត៌មានមួយ​របស់សារមន្ទីរ​ចេញផ្សាយនៅថ្ងៃដដែលនេះ បាននិយាយជាអាថ៌ថា «ក្នុងរយៈកាលកន្លងមក សារមន្ទីរបានទទួលនូវឯកសារស្រាវជ្រាវថ្មីៗ​ជាច្រើន ដែលមិនបានបញ្ជាក់អោយច្បាស់ ពីដំណើរដើមទងនៃការទទួលបូរាណវត្ថុទាំងនេះ»។

រូបចំលាក់ពីថ្មភក់ មានឈ្មោះហៅថា «អ្នកការពារលុតជង្គង់»

នាយកសារមន្ទីរ លោកថូម៉ាស កំប៊ែល (Thomas Campbell) បានបញ្ជាក់បន្ថែមថា «សារមន្ទីរសូមធ្វើការរំលឹក ពីការ​អនុវត្តន៍​នូវលក្ខតិក្កៈដ៏តឹងតែងរបស់ខ្លួន ទៅលើប្រភពនៃការទទួលយកបូរាណវត្ថុថ្មីៗ តែក៏បានសិក្សា​តាំងពីយូរណាស់​មក​ហើយដែរ ទៅលើសំនុំឯកសារដែលទាក់ទង នឹងវត្ថុទាំងឡាយនៅក្នុងឃ្លាំងរបស់ខ្លួន ជាមួយនឹងការខិតខំប្រឹងប្រែងជាប្រចាំ ដើម្បីស្វែងយល់អោយបានច្រើនបំផុត ពីប្រវត្តិរបស់ម្ចាស់វត្ថុទាំងនេះ»។

លោកបានបន្ថែមថា «នៅក្នុងករណី ដែលព័ត៌មានថ្មីៗទាក់ទងនឹងរូបចម្លាក់ មិនបានបង្ហាញពីភស្ដុតាងច្បាស់លាស់ នៅ​ពេលទទួលយករូបចម្លាក់ វាបានធ្វើអោយសារមន្ទីរ ធ្វើការសម្រេចចិត្តដូចនឹងអ្វី ដែលយើងបានប្រកាសនៅថ្ងៃនេះ»៕

រូបចម្លាក់វីស្នុ ក្នុងរចនាបទកោះកែរ ដែលត្រូវបញ្ជូនសងមកកម្ពុជាវិញដូចគ្នា។

-------------------------------------------------
ដោយ ៖ កេសរកូល - ភ្នំពេញ ថ្ងៃទី០៣ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ