បុរសម្នាក់នៅរដ្ឋម៉ីស្សីស៊ីពី (Mississippi) ត្រូវបានឃាត់ខ្លួន ដោយបានជាប់ចោទពីបទ បានផ្ញើរសំបុត្រដែលមានផ្ទុកជាតិ​ពុលកម្រិតខ្លាំងមួយ ទៅប្រធានាធិបតីអាមេរិក បារ៉ាក់ អូបាម៉ា (Barack Obama) និងអ្នកនយោបាយអាមេរិកផ្សេងទៀត។

រូបតំណាងអោយការផ្ញើរសំបុត្រ។

ភ្នាក់ងារពិសេសខាងការស៊ើបអង្កេត អេហ្វប៊ីអាយ (FBI) ដែលទទួលខុសត្រូវលើសំនុំរឿង ដានីញ៉ែល ម៉ាកម៉ុយលែន (Daniel McMullen) បានអះអាងថា ជននេះត្រូវបានឃាត់ខ្លួន នៅរសៀលថ្ងៃពុធទី១៧ខែមេសា។ តែភ្នាក់ងារពិសេស អេហ្វប៊ីអាយ មិនបានបង្ហាញពីឈ្មោះរបស់ជនសង្ស័យ ថាជានរណាម្នាក់នោះឡើយ។

អាជ្ញាធរនៅរងចាំនៅឡើយ នូវលទ្ធផលជាស្ថាពរ នៃការវិភាគទៅលើសំបុត្រ ដែលបានផ្ញើរទៅអោយលោក អូបាម៉ា និង​ទៅព្រឹទ្ធសមាជិកម្នាក់ មកពីគណបក្សសាធារណរដ្ឋនៃរដ្ឋមីស្សីស៊ីពី លោក រ៉ូហ្សេ វិកគ័រ (Roger Wicker) ដែលបាន​ធ្វើ​ឲ្យមានការព្រួយបារម្ភដ៏ខ្លាំងមួយ នៅថ្ងៃពុធនេះ ជាពិសេសនៅពេលដែលភាពតានតឺង កំពុងបានកើនឡើងខ្លាំង ជុំវិញ​ភេវរកម្មនៅទីក្រុងប៊ូស្តុន។

កំណត់ត្រារបស់ភ្នាក់ងារអេហ្វប៊ីអាយ ដែលអ្នកកាសែតបានទទួលបាន អះអាងថា សំបុត្រទាំងពីរផ្ញើរចេញពី សង្កាត់​ម៉មហ្វីស (Memphis) នៅទីក្រុង ធេនេស៊ី (Tennessee)៕

-------------------------------------------------
ដោយ៖ សេក មនោរកុមារ - ប៉ារីស ថ្ងៃទី១៨ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ