អាជ្ញាធរសុខភាពចិន បានប្រកាសនៅថ្ងៃសៅរ៍នេះ ថាក្មេងស្រីម្នាក់អាយុ៧ឆ្នាំ រស់នៅទីក្រុងប៉េកាំង បានផ្ទុកមេរោគ​ផ្ដាសាយ​បក្សី ដែលមានឈ្មោះជាអក្សរកាត់ថា H7N9។ ជាករណីប្រកាសជាផ្លូវការ លើកដំបូងគេបង្អស់ ដែលបាន​កើត​នៅ​ក្នុង​រដ្ឋធានី ខណៈដែលជម្ងឺនេះ បានកើតមានទៅលើបណ្ដាជនជាង ៤០នាក់រួចទៅហើយ នៅប៉ែកខាងកើតនៃ​ប្រទេស។

កសិដ្ឋានចិញ្ចឹមសត្វស្លាបមួយ នៅក្បែរទីក្រុងសៀងហៃ ប្រទេសចិន។

មេរោគ H7N9 នៃជម្ងឺផ្ដាសាយបក្សី ដែលរហូតមកដល់ពេលនេះ ចម្លងត្រឹមតែពីសត្វមកមនុស្សនេះ បានកើតមានទៅ​លើ​មនុស្សជាង៤០នាក់រួចមកហើយ នៅផ្នែកខាងកើតនៃប្រទេសចិន ជាពិសេសនៅទីក្រុងសៀងហៃ និងនៅតំបន់ជុំវិញ។ រីឯករណីទីមួយ ដែលទើបនឹងកើតនៅក្នុងរដ្ឋធានីនៃប្រទេស បានបង្ហាញពីសញ្ញានៃការរីករាលដាល របស់មេរោគនេះ ដ៏គួរអោយព្រួយបារម្ភ។

តុល្យភាពចុងក្រោយ ផ្ដល់ដោយអាជ្ញាធរចិន បានអោយដឹងថា មនុស្ស១១នាក់ស្លាប់ នឹងជម្ងឺនេះ។ ទីក្រុងសៀហៃ ដែល​ជាទីក្រុងសេដ្ឋកិច្ចរបស់ចិន បានចាត់វិធានការដ៏ខ្លាំងសម្បើមជាច្រើន ដើម្បីកំណត់ពីដែនសីមា និងបោសសំអាត តំបន់​ដែលទទួលរងឆ្លងជម្ងឺ បើទោះជាវិធានការនេះ បានប៉ះពាល់យ៉ាងសន្ធឹកសន្ធាប់ ទៅក្នុងវិស័យសេដ្ឋកិច្ច និងពាណិជ្ជកម្ម​យ៉ាងណាក៏ដោយ។ នៅក្នុងសប្ដាហ៍ចុងក្រោយនេះ សត្វស្លាបជាច្រើនពាន់ ម៉ឺនក្បាល ត្រូវបានគេយកទៅដុតកម្ទេច​​ចោល រីឯកន្លែងដែលសង្ស័យថាមានមនុស្សឆ្លងជម្ងឺ ត្រូវបានលាងសំអាត ឬបិតជាបណ្ដោះអាសន្ន។

តាមអង្គការសុខភាពពិភពលោក (OMS) គេនៅមិនទាន់រកឃើញថា មេរោគ H7N9 នេះ បង្កអោយមានការចម្លង​ពីមនុស្ស​ទៅមនុស្សនោះនៅឡើយ។ នាយកអង្គការពិភពលោកស្ដីពីសុខភាពសត្វ (OIE) លោកប៊ែរណា វ៉ាឡា (Bernard Vallat) បានវាយតម្លៃនៅថ្ងៃព្រហស្បត្តិ៍កន្លងមកថា វាជារឿង«ពិសេសបំផុត»មួយ ដែលស្ថានភាពជម្ងឺនៅលើមនុស្ស ត្រូវបាន​បង្ក​ពីមេរោគ H7N9 ព្រោះការរកឃើញពីមេរោគនេះ នៅក្នុងខ្លួនសត្វស្លាប មានភាពពិបាកណាស់។

លោកវ៉ាឡា បានបន្ថែមថា «តាមព័ត៌មានដែលទទួលបាន នៅថ្ងៃនេះ គឺយើងកំពុងប្រឈមនឹងស្ថានភាពមួយ យ៉ាងចម្លែក ព្រោះយើងដឹងថា មេរោគនេះ បានបង្កការចម្លងខ្សោយបំផុត សម្រាប់សត្វស្លាប តែវាបែជាមានសមត្ថភាព បង្កជម្ងឺដ៏ធ្ងន់​ធ្ងរ សម្រាប់មនុស្សដែលបានឆ្លងវាទៅវិញ»។

ជម្ងឹផ្ដាសាយបក្សី ដែលមានលក្ខណៈរួមជាងគេនោះ ជាជម្ងឺដែលកើតមកពីមេរោគ H5N1 ដែលបានធ្វើអោយមនុស្ស​ស្លាប់ជាង ៣៦០នាក់ រវាងពីឆ្នាំ២០០៣ មកដល់ខែមិនាឆ្នាំ២០១៣កន្លងទៅ។ អ្នកវិទ្យាសាស្ត្រ នៅតែព្រួយបារម្ភ ពីការ​បម្លែងខ្លួនណាមួយរបស់មេរោគ ដែលធ្វើអោយមានការឆ្លងពីមនុស្សទៅមនុស្សនោះ វានឹងធ្វើអោយមាន ជម្ងឺឆ្លងដ៏រង្គាល​មួយនៅក្នុងពិភពលោក៕

------------------------------------------------
ដោយ ៖ កេសរកូល - ភ្នំពេញ ថ្ងៃទី១៣ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ