ឆ្កែ ដែលឆ្លង អេបូឡា នៅអេស្ប៉ាញ ត្រូវបានចាក់ថ្នាំសម្លាប់
- ដោយ: សេក មនោរកុមារ ដោយ សេក មនោរកុមារ (ទាក់ទង៖ info@monoroom.info) - ប៉ារីស ថ្ងៃទី០៩ តុលា ២០១៤
- កែប្រែចុងក្រោយ: October 09, 2014
- ប្រធានបទ: ជម្ងឺឆ្លង
- អត្ថបទ: មានបញ្ហា?
- មតិ-យោបល់
-
សត្វឆ្កែដ៏អភ័ព ត្រូវបានគេចាក់ថ្នាំសណ្ដំជាដំបូង ដើម្បីឲ្យវាដេក និងជួយបញ្ឈៀសវាពីការឈឺចាប់ មុននឹងចាក់ថ្នាំសម្លាប់។ ការចាក់សម្លាប់នេះ បានធ្វើឡើងនៅល្ងាចថ្ងៃពុធទី៨ ខែតុលា ក្នុងទីសត្វឃាតមួយ ផ្នែកខាងជើងនៃរាជធានី ម៉ាឌ្រីដ រាជាណាចក្រអេស្ប៉ាញ។ ស្វាមីរបស់គ្រូពេទ្យដែលរងគ្រោះឆ្លងមេរោគ អេបូឡា ដែលជាករណីឆ្លងជំងឺនេះដំបូងគេ ក្នុងទ្វីបអ៊ឺរ៉ុប បានធ្វើការតវ៉ាជាសាធារណៈ ជាមួយនឹងក្រុមមនុស្សជាច្រើន ប្រឆាំងនឹងការចាក់ថ្នាំសម្លាប់នេះ។
ការសិក្សាស្រាវជ្រាវ បានឲ្យដឹងថា សត្វឆ្កែអាចផ្ទុកនូវប្រព័ន្ធការពារមេរោគ ប្រឆាំងនឹងមេរោគ អេបូឡា ដែលគេអាចនិយាយបានថា សត្វឆ្កែទាំងនេះកំពុងផ្ទុកមេរោគ អេបូឡា ដោយមិនឲ្យរោគសញ្ញាអ្វីទាំងអស់។ ដូច្នេះ បើវាមានផ្ទុកមេរោគ អេបូឡា នៅលើខ្លួនវា វាអាចធ្វើការចម្លងមកមនុស្ស បានយ៉ាងងាយ នៅពេលមនុស្សយកវាមករស់នៅជាមួយ នៅក្នុងផ្ទះ។
ជាការសម្រេចចិត្តចាក់ថ្នាំសម្លាប់ ដ៏ប្រទាំងប្រទើស បង្កឲ្យមានប្រតិកម្មមកពីគ្រប់ទិសទី ជាពិសេសនៅលើបណ្ដាញសង្គម។ មនុស្សជាច្រើន បានសម្ដែងប្រតិកម្ម កុំឲ្យសម្លាប់សត្វឆ្កែមួយក្បាលនេះ មុននឹងគេដឹងថា តើវាពិតជាមានផ្ទុកមេរោគនេះឬយ៉ាងណា។
ហ្សាវីយ៉េ (Javier) ស្វាមីគ្រូពេទ្យ បានថ្លែងប្រាប់សារព័ត៌មានក្នុងស្រុកមួយ ថា «គេបាននិយាយប្រាប់ខ្ញុំថា ប្រសិនបើខ្ញុំមិនអនុញ្ញាតទេ ពួកគេនឹងស្នើទៅតុលាការ ដើម្បីប្រើកម្លាំងចូលផ្ទះខ្ញុំ ហើយសម្លាប់ឆ្កែ»។ លោកបានពន្យល់ទៀតថា គេបានអញ្ជើញលោក ឲ្យយកឆ្កែនេះ ទៅកាន់មន្ទីរពេទ្យសត្វណាមួយ តែទីបំផុត ឆ្កែរបស់លោក នៅតែត្រូវបាននាំចេញយកទៅ៕