នៅក្នុងសមាជលើកទីមួយ របស់គណៈបក្សសង្គ្រោះជាតិ កាលពីម្សិលម៉ិញ គេឃើញមានវត្តមានរបស់​ព្រះអង្គ​ម្ចាស់ ស៊ីសុវត្ថិ ធម្មិកោ យាងមកចូលរួម និងទទួលបានការតែងតាំង ជាសមាជិកគណកម្មាធិការនាយករបស់គណបក្ស។ នេះជា​ការអះអាង អោយកាន់តែច្បាស់បន្ថែមទៀត ខណៈប្រព័ន្ធផ្សព្វផ្សាយក្នុងស្រុកជាទូទៅ បានរាយការណ៍ ក្នុងប៉ុន្មាន​ថ្ងៃចុង​ក្រោយនេះ ពីការយាងចូលធ្វើនយោបាយរបស់ព្រះអង្គ ជាមួយគណបក្សប្រឆាំង។

ព្រះអង្គម្ចាស់ ស៊ីសុវត្ថិ ធម្មិកោ ក្នុងសមាជរបស់គណបក្សសង្គ្រោះជាតិ កាលពីថ្ងៃទី០៧ខែមេសា។

សូមបញ្ជាក់ថា ព្រះអង្គម្ចាស់ ស៊ីសុវត្ថិ ធម្មិកោ  ត្រូវបានសារធារណៈជនស្គាល់ថា ជាលេខាផ្ទាល់ នៃអតីតព្រះមហាវីរៈ​ក្សត្រ​នរោត្តម សីហនុ ព្រះបរមរតនកោដ្ឋ និងជាសមាជិកស្ថាបនិកនៃគណបក្សហ្វុនស៊ីនប៉ិច ដែលមានព្រះអង្គម្ចាស់អរុណរស្មី (បុត្រីពៅព្រះបរមរតនកោដ្ឋ) ជាព្រះប្រធានក្នុងពេលបច្ចុប្បន្ន។

ជុំវិញជម្រើសរបស់ព្រះអង្គ ក្នុងការចូលរួមក្នុងជាមួយ គណបក្សសង្គ្រោះជាតិ មនោរម្យព័ងអាំងហ្វូ សូមលើកយកកិច្ច​សម្ភាសជាមួយលោក ប៉ុល ហំម ប្រធានគណៈកម្មាធិការនាយក នៃគណបក្សនេះ មកជម្រាបជូនដូចតទៅ៖

មនោរម្យព័ងអាំងហ្វូ៖ តើការយាងចូលរួមរបស់ព្រះអង្គម្ចាស់ ស៊ីសុវត្ថិ ធម្មិកោ ជាការអញ្ជើញពីគណបក្ស​សង្គ្រោះជាតិ​ឬយ៉ាងណា?

លោក ប៉ុល ហំម៖ ការចូលរួមនេះជាការស្មគ្រ័ព្រះទ័យរបស់ព្រះអង្គផ្ទាល់។ លោក (ព្រះអង្គម្ចាស់ ស៊ីសុវត្ថិ ធម្មិកោ) ធ្លាប់​មានទំនាក់ទំនង ជាមួយឯកឧត្តម សម រង្សីផង ជាមួយ ឯកឧត្តមកឹម សុខាផង ជាចុងក្រោយគណបក្សសង្គ្រោះជាតិ បាន​សម្រេចថ្វាយព្រះអង្គជា សមាជិកគណៈកម្មាធិការនាយក នៃគណបក្សសង្គ្រោះជាតិ។

មនោរម្យព័ងអាំងហ្វូ៖ តើលោកអាចជំរាបបានទេថា តើការចូលរួមរបស់ព្រះអង្គមានការកំណត់លក្ខខ័ណ្ឌ ឬការសន្យា​ណាមួយទេ?

លោក ប៉ុល ហំម៖ ឥតមានលក្ខខ័ណ្ឌ ឬការសន្យាអ្វីទេ។ ព្រះអង្គមកចូលរួមដោយទ្រង់មើលឃើញថា មានតែគណៈបក្ស​សង្គ្រោះជាតិ ដែលអាចជួយផ្លាស់ប្តូរមុខមាត់ ឬស្ថានភាពខ្មែរយើងបាន។ ដោយសារេព្រះអង្គមិនសព្វព្រះទ័យ នឹងការ​គ្រប់គ្រងសព្វថ្ងៃ ព្រោះព្រះអង្គធ្លាប់បានលើកឡើងថា មានការអភិវឌ្ឍន៍កន្លែងណា មានទឹកភ្នែកនៅកន្លែងហ្នឹង ហូរឈាម​កន្លែងហ្នឹង។ នេះជាសិទ្ធិរបស់លោក (ព្រះអង្គម្ចាស់ ស៊ីសុវត្ថិ ធម្មិកោ) ដែលលោកអាចមកចូលរួមជួយ ដើម្បីកែប្រែ​ស្ថានភាពស្រុកខ្មែរ ពីអាក្រក់ទៅជាល្អឡើងវិញ។

មនោរម្យព័ងអាំងហ្វូ៖ ចំពោះគណបក្សលោកផ្ទាល់ យល់យ៉ាងម៉េចដែរ ដែលកន្លងមកយើងដឹងថាព្រះអង្គម្ចាស់ ស៊ីសុវត្ថិ ធម្មិកោ ជាសមាជិកស្ថាបនិកនៃគណបក្សហ្វុនស៊ីនប៉ិច ហើយព្រះអង្គបែរជាមកចូលរូម ជាមួយនឹងគណបក្ស​សង្គ្រោះជាតិ​ទៅវិញ?

លោក ប៉ុល ហំម៖ ប្រហែលជាគណបក្សហ្វុនស៊ីនប៉ិច មានគោលការណ៍អ្វីមួយ ខុសពីព្រះទ័យព្រះអង្គហើយ បានជា​លោកមិននៅជាមួយ (គណបក្សហ្វុនស៊ីនប៉ិច) ហើយមកគាំទ្រគណបក្សសង្គ្រោះជាតិ។ ព្រះអង្គមុខជាយល់ថា គណបក្ស​សង្គ្រោះជាតិ អាចធ្វើកិច្ចការជូនចំពោះជាតិ។ ម្យ៉ាងទៀតគណបក្សសង្គ្រោះជាតិ មានគោលនយោបាយបើកចំហរ អ្នក​ណា​ក៏អាចមកចូលរួមជាមួយដែរ។

មនោរម្យព័ងអាំងហ្វូ៖ តើការចូលរួមរបស់ព្រះអង្គ សម្រាប់ការបោះឆ្នោតថ្នាក់ជាតិ នាថ្ងៃទី២៨ ខែកក្តដា ខាងមុខនេះ អាច​បង្កើននូវកម្លាំង នៃការគាំទ្រពីប្រជាពលរដ្ឋ ឬយ៉ាងណា?

លោក ប៉ុល ហំម៖ ការចូលរួមរបស់ព្រះអង្គម្ចាស់ ស៊ីសុវត្ថិ ធម្មកោ នេះមានសារៈសំខាន់ណាស់ ព្រោះជាការបង្ហាញ​ឲ្យ​ឃើញជាក់ច្បាស់ពីជំហរ និងគោលការណ៍របស់គណបក្សសង្គ្រោះជាតិ មិនប្រឆាំងនឹងរបបរាជានិយមទេ គាំទ្ររបប​រាជានិយមអាស្រ័យរដ្ឋធម្មនុញ្ញ ដែលមានចែងក្នុងច្បាប់រដ្ឋធម្មនុញ្ញស្រាប់។

មនោរម្យព័ងអាំងហ្វូ៖ អង្គសម្តេចឪមុនពេលសោយទីវង្គត ចង់ឲ្យរាជវង្សានុវង្ស នៅអមព្រះរាជបល្ល័ង មិនចង់ឲ្យមាន​ការ​ចូលរួមធ្វើនយោបាយ។ តើការចូលរួមធ្វើនយោបាយរបស់ព្រះអង្គ ជាការប្រឆាំងនឹងព្រះរាជតំរិះ របស់ព្រះបរមរតនកោដ្ឋ​ឬទេ?

លោក ប៉ុល ហំម៖ ក្នុងរដ្ឋធម្មនុញ្ញឥតមានចែង មិនឲ្យព្រះរាជវង្សានុវង្សធ្វើនយោបាយទេ។ នេះជាសិទ្ធិរបស់ព្រះអង្គម្ចាស់ ស៊ីសុវត្ថិ ធម្មិកោ។ ថ្វីត្បិតលោកជាសមាជិករាជវង្សានុវង្ស លោកមានសិទ្ធិក្នុងការគិតគូរ ជួយដល់ស្រុកទេសរបស់​លោក​ដែរ។ បើអ្នកនយោបាយធ្វើនយោបាយមិនល្អ ប្រទេសជាតិចុះអាប់ឱន ព្រះរាជវង្សានុវង្សក៏អាប់ឱនដែរ។ នេះជាការ​សម្រេចព្រះទ័យរបស់ព្រះអង្គ។

មនោរម្យព័ងអាំងហ្វូ៖ ការចូលរួមក្នុងឆាកនយោបាយ របស់ព្រះអង្គម្ចាស់ ស៊ីសុវត្ថិ ធម្មិកោ ក្នុងគណបក្សសង្គ្រោះជាតិ ហើយស្របគ្នានេះដែរ ព្រះអង្គម្ចាស់អរុណរស្មី ដែលជាបុត្រីពៅរបស់ព្រះបរមរតនកោដ្ឋ ឈរជាប្រធានបក្សហ្វុនស៊ីនប៉ិច។ តើអាចជាទំនាស់ ក្នុងសែរាជវង្សានុវង្សឬទេ?

លោក ប៉ុល ហំម៖ ប្រទេសមួយ ប្រកាន់នូវរបបប្រជាធិបតេយ្យសេរីពហុបក្ស។ មិនចាំបាច់ថា គ្រប់សមាជិកនៃព្រះរាជវង្សា​នុវង្ស ទៅរួមនៅក្នុងគណបក្សតែមួយទើបប្រពៃនោះទេ នេះក៏មិនមែនជាការមានទំនាស់រវាងព្រះអង្គ ជាមួយព្រះអង្គ​ម្ចាស់​អរុណរស្មីនោះដែរ។ វាជាសិទ្ធិនៃការយល់ឃើញផ្សេងៗគ្នា ក្នុងការចូលរួមធ្វើនយោបាយ។ មិនថាតែរាជវង្សានុវង្សទេ ប្រជាពលរដ្ឋទូទៅ ក៏មានសិទ្ធិដូចគ្នានេះដែរ។

មនោរម្យព័ងអាំងហ្វូ៖ សម្រាប់ការបោះឆ្នោតតំណាងរាស្រ្តអាណត្តិទីប្រាំ ថ្ងៃទី២៨ ខែកក្កដា ខាងមុខនេះ តើលោករំពឹងថា នឹងមានលទ្ធផលយ៉ាងណាដែរ?

លោក ប៉ុល ហំម៖ លោកសម រង្សី ធ្លាប់បានលើកឡើងថា ទោះបីជាមានការបាត់បង់បញ្ជីឈ្មោះ ក៏នៅរំពឹងថាឈ្នះដែរ អាចឈ្នះតិចតួច។ តែបើសិនជាមានការរៀបចំ ការបោះឆ្នោត ឲ្យបានត្រឹមត្រូវ ដោយសេរី និងយុត្តិធម៌។ ឯ គ.ជ.ប (គណកម្មាធិការជាតិរៀបចំការបោះឆ្នោត) រៀបឲ្យបានល្អប្រសើរ ប្រកាន់ជំហរអព្យាក្រិត្យ និងបញ្ជីឈ្មោះអ្នក​បោះឆ្នោត​ធ្វើឲ្យបានត្រឹមត្រូវ សង្ឃឹមថា នឹងអាចឈ្នះដាច់តែម្តង។ មើលទៅឃើញថាមានសង្ឃឹមទើបព្រះអង្គម្ចាស់ ស៊ីសុវត្ថិ ធម្មិកោ ចូលរួមដើម្បីកែរមុខមាត់ស្រុកទេសយើង។

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី៨ មេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ