កងទ័ពកូរ៉េខាងជើង បានប្រកាសយ៉ាងប្រញ៉ាប់ប្រញ៉ាល ថាខ្លួនបានទទួលភ្លើងខៀវ ដើម្បីផ្ទុះអាវុធប្រឆាំងនឹង​សហរដ្ឋ​អាមេរិក រួមទាំងការប្រើប្រាស់ អាវុធនុយក្លេអ៊ែរផង។ សហរដ្ឋអាមេរិកបានចាត់ទុក ការគម្រាមទាំងឡាយ របស់កូរ៉េខាង​ជើងថា ជាដំណឹងបានការ ហើយគ្រោងនឹងដាក់ពង្រាយ នូវប្រព័ន្ធប្រឆាំងម៊ីលស៊ីល នៅក្នុងមូលដ្ឋានយោធារបស់ខ្លួន ស្ថិតលើកោះហ្គាម (Guam)។

អគ្គមគ្គុទេសវ័យក្មេង គឹម ជុង អ៊ុន ដែលចោមរោមដោយ កងទ័ពស្ត្រីជាច្រើន។

នៅក្នុងសេចក្ដីប្រកាសព័ត៌មានមួយ របស់ភ្នាក់ងារព័ត៌មានផ្លូវការ របស់កូរ៉េខាងជើង KCNA មេបញ្ជាការកងទ័ព​ប្រទេស​នេះ បានប្រកាសប្រាប់ទីក្រុងវ៉ាស៊ីនតោន អោយដឹងថា ការគម្រាមរបស់អាមេរិកទាំងអស់ នឹងត្រូវវាយបំបាក់ដោយ «មធ្យោបាយប្រយុទ្ធតាមអាវុធនុយក្លេអ៊ែរ»។ សេចក្ដីប្រកាសព៏ត៌មាន ដែលបានផ្សាយក្នុងថ្ងៃព្រហស្បត្តិ៍ទី០៤មិនានេះ បាននិយាយបន្ថែមថា ប្រិតបត្តិការសឹកដ៏អស្ចារ្យ របស់កងកម្លាំងទ័ពកូរ៉េខាងជើង ត្រូវបានដាក់អោយ«សាកល្បង និង​កែលម្អ»រួចហើយ។

មុននេះមួយថ្ងៃ មន្ទីប៉ង់តាហ្គោនអាមេរិក បាននិយាយអោយដឹងដូចគ្នា ថាខ្លួននឹងដាក់ពង្រាយប្រព័ន្ធម៊ីស៊ីល ប្រឆាំង​ម៊ីស៊ីលមួយមានឈ្មោះថា ថាអាដ (THAAD) នៅលើកោះហ្គាម ដែលមូលដ្ឋានយោធាយ៉ាងសំខាន់របស់អាមេរិក មាន​ទីតាំង​នៅទីនោះ។ ការដាក់ពង្រាយនេះ មានបំណងទប់ទល់នឹងការវាយប្រហារ ជាយថាហេតុណាមួយ ដែលធ្វើឡើង​ ដោយ​ការ​គម្រាមរបស់ប្រទេសកូរ៉េខាងជើង ក្នុងរយះពេលចុង​ក្រោយនេះ។

សូមបញ្ជាក់ថា ប្រជុំកោះហ្គាម ជាផ្នែកមួយនៃទឹកដីអាមេរិក ស្ថិតនៅកណ្ដាលមហាសមុទ្រប៉ាស៊ីភិក ខាងកើតប្រទេស​ហ្វីលីពីន។ មូលដ្ឋានយោធាអាមេរិកនៅទីនោះ មានទាហានប្រមាណជា ៦០០០នាក់ នាវាចម្បាំងផ្ទុកយន្ដហោះ នាវា​ជ្រមុជទឹក និងយន្ដហោះទម្លាក់គ្រាប់បែក B-52 ដែលបានហោះទៅក្រវិលជុំវិញកូរ៉េខាងត្បូង កាលពីសប្ដាហ៍មុន។

ប្រព័ន្ធម៊ីស៊ីល ប្រឆាំងម៊ីស៊ីល ថាអាដ ត្រូវបានកងទ័ពអាមេរិក យកមកបំពាក់អោយខ្លួន នៅឆ្នាំ២០០៨ ហើយមាន​សមត្ថភាព អាចចាប់ម៊ីស៊ីលចម្ងាយមធ្យម និងនៅរយះកំពស់ដ៏ខ្ពស់បាន។ ប្រព័ន្ធនេះ ត្រូវគេតម្លើងនៅលើរថយន្ដធុនធំ មានផ្ទុកម៊ីស៊ីលដែលសម្រាប់ចាប់ម៊ីស៊ីល ប្រព័ន្ធរ៉ាដាចាប់រលកសញ្ញា និងប្រព័ន្ធបញ្ជាបាញ់ ដែលមិនខុសប៉ុន្មាន​ពីប្រព័ន្ធ​ម៊ីស៊ីល ប្រឆាំងម៊ីស៊ីល ប៉ាទ្រីយ៉ូត (Patriot) នោះទេ។

សេចក្ដីប្រកាសព័ត៌មាន របស់ក្រសួងការពារជាតិអាមេរិក បាននិយាយបន្ងែមថា «សហរដ្ឋអាមេរិក ស្ថិតនៅក្នុងសភាព​ប្រុងប្រយ័ត្ន នៅចំពោះការបង្កហេតុរបស់កូរ៉េខាងជើង ហើយត្រៀមខ្លួនរួចជាស្រេច ក្នុងការការពារទឹកដីអាមេរិក សម្ព័ន្ធមិត្ត និងផលប្រយោជន៍ជាតិរបស់យើង»។ ដោយឡែក លោកឆូក ហាហ្គែល (Chuck Hagel) រដ្ឋមន្ត្រីការពារជាតិ​អាមេរិក បានបញ្ចាក់ថា «ឥឡូវនេះ ជនជាតិកូរ៉េខាងជើង មានសមត្ថភាព ផលិតអាវុធនុយក្លេអ៊ែរ និងកាំជ្រួចបញ្ជា​ពី​ចម្ងាយបាន ហើយវានឹងធ្វើឲ្យមានគ្រោះថ្នាក់ដ៏ធ្ងន់ធ្ងរ និងបង្កើតអោយមាន នូវការគម្រាមមួយ ទៅដល់ផលប្រយោជន៍ នៃសម្ព័ន្ធមិត្តរបស់យើង នៅក្នុងតំបន់»។

លោករដ្ឋមន្ត្រីបានចង្អុលបង្ហាញថា ប្រទេសលោក «កំពុងធ្វើការជាមួយ ចិន និងអ្នកដទៃទៀត ដើម្បីស្រាយបន្ទុក ដែល​មានទៅលើស្ថានភាព ក្នុងឧបទ្វីបកូរ៉េ» ហើយលោកថា បានជជែកជាមួយនឹងដៃគូរសន្ទនា ជាជនជាតិចិនរបស់លោក លោកឧត្តមសេនីយ៍ ឆង់ វានហ្គ័ន (Chang Wanquan)៕

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី០៤ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ