យ៉ង់ គឹមអេង៖ សម រង្ស៊ី មានឋានៈស្មើនាយករដ្ឋមន្រ្តី ខណៈកំណែទម្រង់មិនទៅមុខ
ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យ៉ង់ គឹមអេង បានបង្ហាញនូវការខកចិត្តខ្លះ បន្ទាប់ពីរាល់ការកែទម្រង់ធំៗ មួយចំនួន ដែលបានឯកភាពគ្នានាពេលកន្លងមក មិនទាន់ចេញជាផ្លូវការនៅឡើយ តែផ្ទុយទៅវិញ គេបែរជាឃើញ ការបែងចែកសិទ្ធិ និងអំណាច ឬអសនៈ ចេះតែបន្តកើតមានជាបន្តបន្ទាប់ រវាងគណបក្សទាំងពីរក្នុងស្ថាប័ននយោបាយ។
នៅក្នុងជំនួបសម្ងាត់មួយ រវាងលោក ហ៊ុន សែន និងលោក សម រង្ស៊ី កាលពីថ្ងៃទី២៨ ខែវិច្ឆិកា កន្លងទៅ បានសម្រេចឯកភាពគ្នាបីចំណុច ក្នុងនោះចំណុចទីពីរ បានអះអាងពីការឯកភាពឲ្យកែសម្រួលបទបញ្ជាផ្ទៃក្នុងរដ្ឋសភា បង្កើតឲ្យមានប្រធានក្រុមសម្លេងភាគតិច ដើម្បីមកជជែកជាមួយនាយករដ្ឋមន្ត្រី ក្នុងរឿងប្រទេសជាតិ។ សេចក្ដីសម្រេចរបស់មេដឹកនាំទាំងពីរ [...]