អនុប្រធាន CNRP ចេញមុខសុំទោសជំនួសកូន រឿង«កឹម សុខា កុហក ហ៊ុន សែន»
អនុប្រធានគណបក្សប្រឆាំងធំជាងគេ លោក អេង ឆៃអ៊ាង ដែលមានកូនប្រុសឈ្មោះ អេង រតនៈ បានប្រកាសសុំទោសកាលពីម្សិលម៉ិញ នៅចំពោះអ្នកគាំទ្រគណបក្សទាំងអស់ ដោយបានពន្យល់ថា កូនប្រុសរបស់លោក មានបញ្ហាសុខភាព ក្នុងមួយសប្ដាហ៍កន្លងទៅនេះ។ ការសុំទោសនេះ ធ្វើឡើងបន្ទាប់ ពីកូនប្រុសរបស់លោក បានបង្ហោះសារមួយឃ្លា នៅលើគណនីរបស់ខ្លួន សរសេរថា៖ «កឹម សុខា បានកុហក ហ៊ុន សែន បីលើក លើកទីបីនាយករដ្ឋមន្ត្រី ចាប់ឲ្យសារភាព!»។
លោក អេង ឆៃអ៊ាង ដែលកំពុងស្ថិតនៅក្រៅប្រទេស បានសរសេរនៅលើទំព័រហ្វេសប៊ុករបស់លោក ដូច្នេះថា៖ «សូម[ការ]អភ័យទោស (...) [ពីសំណាក់] អ្នកគាំទ្រគណបក្សសង្គ្រោះជាតិ ទាំងក្នុង និងក្រៅប្រទេស ជំនួសកូនប្រុសរបស់ខ្ញុំ ដែលបានសរសេរ និងឆ្លើយឆ្លង ដោយចោទប្រកាន់មិនត្រឹមត្រូវ លើលោកប្រធាន កឹម សុខា នៅក្នុងគណនីហ៊្វេសប៊ុករបស់គាត់។»។
អនុប្រធានគណបក្ស ដែលជាមនុស្សជំនិត របស់អតីតប្រធានគណបក្ស លោក សម រង្ស៊ី [...]
