យន្ដហោះងើបខ្លួនពីដីមិនបានព្រោះ... កណ្ដុរមួយក្បាល
ហេតុអ្វី ក៏ដល់ថ្នាក់នេះ? ចម្លើយសមញ្ញ និងងាយយល់៖ ព្រោះសត្វចតុបាតដ៏តូចនោះ ចេះលេងបិទពួន ជាមួយនឹងក្រុមអ្នកស្វែងរក ដែលសុទ្ធសឹងជាមន្ត្រីជំនាញ ខាងបោសសម្អាតយន្ដហោះ ហើយក្រុមអ្នកជំនាញនេះ បានប្រើរយៈពេលជាច្រើនម៉ោង ទើបអាចរកឃើញ សត្វចតុបាតដ៏ចង្រៃ ដែលជាសត្វកណ្ដុរដ៏តូចមួយក្បាល។
ជើងយន្ដហោះ «AF373» នឹងត្រូវហោះចេញ ពីព្រលានយន្ដហោះអន្តរជាតិ នៃរដ្ឋធានី បាម៉ាកូ (Bamako របស់ប្រទេសម៉ាលី ក្នុងទ្វីបអាហ្វ្រិកកណ្ដាល) ឆ្ពោះទៅកាន់រដ្ឋធានី ប៉ារីស របស់ប្រទេសបារាំង កាលពីយប់ថ្ងៃសុក្រ ចូលមកថ្ងៃសៅរ៍ សប្ដាហ៍មុន។ ប៉ុន្តែជើងហោះហើរនេះ ត្រូវបានរំខាន ដោយសារវត្តមាន នៃ«អ្នកដំណើរល្មើស»មួយក្បាល ដែលចូលទៅក្នុងយន្ដហោះ ទាំងមិនទានបានឆ្លងកាត់ការត្រួតពិនិត្យជាមុន។
ការប្រើរយៈពេលយូរពេក ក្នុងការរុករកសត្វដ៏ចម្រៃនោះ បានបង្កភាពងោកងុយ ល្ហិតល្ហៃ អស់កម្លាំង ដល់ក្រុមបម្រើការនៅលើយន្ដហោះ [...]
