កឹម សម្មាធីតា ហៅអ្នកគាំទ្រ ឲ្យមកកាន់បក្សសង្គ្រោះជាតិ?
យ៉ាងហោច សារចំនួនពីរ ត្រូវបានកញ្ញា កឹម សម្មាធីតា កូនស្រីលោក កឹម សុខា អនុប្រធាន (សព្វថ្ងៃជាប្រធានស្ដីទី) របស់គណបក្សសង្គ្រោះជាតិ បង្ហោះនៅលើគណនីហ្វេសប៊ុករបស់ខ្លួន នៅបន្ទាប់ពីហេតុការណ៍ ឃាត់រថយន្ដលោក កឹម សុខា និងការឡោមព័ទ្ធទីស្នាក់ការគណបក្សសង្គ្រោះជាតិ ពីសំណាក់កងកម្លាំងប្រដាប់អាវុធ នៅព្រឹកថ្ងៃទី២៦ ខែឧសភានេះ។
សារទីមួយ មានលក្ខណៈជាការបង្ហោះរូបភាព សរសេរថា៖ «ខណៈនេះ ក្រុមប្រដាប់អាវុធបានឡោមព័ទ្ធ រថយន្ដនិងស្នាក់ការគណបក្សសង្គ្រោះជាតិ។ សូមបងប្អូនអញ្ជើញ(មក)ជួបជុំគ្នា នៅស្នាក់ការកណ្ដាលគណបក្សសង្គ្រោះជាតិ។» ខណៈសារទីពីរ ដែលត្រូវបានបង្ហោះ នៅប៉ុន្មាននាទីក្រោយ មានសេចក្ដីថា៖ «សូមបងប្អូនអញ្ជើញ មកស្នាក់ការសង្គ្រោះជាតិ ដើម្បីគាំទ្រនិងលើកទឹកចិត្តដល់គណបក្ស»។
ការឃាត់រថយន្ដរបស់លោក កឹម សុខា បានធ្វើឡើង នៅត្រង់ចំណុច ក្បែរសាលាពញាហុក លើផ្លូវនរោត្តម [...]
