«កឹម សុខា នឹងត្រូវ ហ៊ុន សែន បង្ខំចិត្តដោះលែងឆាប់ៗនេះដែរ»
ការដោះលែង ក្រុមមន្ត្រី និងសកម្មជនគណបក្សសង្គ្រោះជាតិ កាលពីយប់ម៉ិញ ទទួលបានការអបអរសាទរ ពីសំណាក់លោក សម រង្ស៊ី អតីតប្រធានគណបក្សនេះ ជាមួយនឹងពាក្យពេជន៍ លើកសរសើរ ពី«វីរភាព» នៃអស់លោកទាំងនោះ ដែលបានបង្ហាញ នូវ«ភាពក្លាហាន ភាពអត់ធ្មត់ និងភាពស្មោះត្រង់» របស់ពួកគេ ចំពោះគណបក្សសង្គ្រោះជាតិ និងចំពោះប្រជារាស្ត្រខ្មែរ ដែលមេដឹកនាំប្រឆាំងរូបនេះ ស្រដីអះអាងថា កំពុង«ទាមទារ ឲ្យបញ្ចប់របបផ្តាច់ការសព្វថ្ងៃ»។
ប្រធានចលនាសង្គ្រោះជាតិ បានអះអាងដឹងច្បាស់ ថាមិនយូរប៉ុន្មាន ក្នុងពេលខាងមុខ លោក ហ៊ុន សែន ក៏ត្រូវបង្ខំចិត្ត ដោះលែងលោក កឹម សុខា ដែរ។ លោក សម រង្ស៊ី បានថ្លែងថា៖ «លោក កឹម សុខា ក៏នឹងត្រូវលោក ហ៊ុន សែន បង្ខំចិត្តដោះលែង ក្នុងពេលឆាប់ៗ ខាងមុខនេះផងដែរ ក្រោមសម្ពាធអន្តរជាតិ ដែលបានដាក់កាលបរិច្ឆេទ ឲ្យលោក ហ៊ុន សែន ដោះលែង អ្នកទោសនយោបាយទាំងអស់ ជាបន្ទាន់ និងដោយឥតលក្ខខណ្ឌ»។
[...]
