សម រង្ស៊ី ស្នើ ហ៊ុន សែន កុំ​មាន​ចរិត​ដូច​«ក្មេង​ពាល»

សង្គ្រាមសំដី កំពុងផ្ទុះ! ប្រធានចលនាសង្គ្រោះជាតិ លោក សម រង្ស៊ី បានបង្ហោះសារនៅមុននេះបន្តិច ស្នើឲ្យលោក ហ៊ុន សែន ប្រកាន់ចរិតចាស់ទុំ ថ្លៃថ្នូរ និងកុំឲ្យមានចរិត ដូចក្មេងពាល។
សម រង្ស៊ី ស្នើ ហ៊ុន សែន កុំ​មាន​ចរិត​ដូច​«ក្មេង​ពាល»
ពីឆ្វេងទៅស្ដាំ៖ លោក ហ៊ុន សែន និងលោក សម រង្ស៊ី។ (រូបថតលើហ្វេសប៊ុក)
Loading...
  • ដោយ: មនោរម្យ.អាំងហ្វូ ([email protected]) - ប៉ារីស ថ្ងៃទី២៤ សីហា ២០១៨
  • កែប្រែចុងក្រោយ: August 24, 2018
  • ប្រធានបទ: នយោបាយ​ខ្មែរ
  • អត្ថបទ: មានបញ្ហា?
  • មតិ-យោបល់

កាលពីមុននេះបន្តិច លោក សម រង្ស៊ី មេដឹកនាំប្រឆាំង បានស្នើសុំឲ្យប្រមុខ​ដឹកនាំកម្ពុជា លោក ហ៊ុន សែន ឲ្យប្រកាន់ចរិតចាស់ទុំ និងថ្លៃថ្នូរ ក្នុងន័យអ្វីមួយ ដែលមេដឹកនាំប្រឆាំង បានអះអាងថា កុំឲ្យលោក ហ៊ុន សែន មានចរិតដូចក្មេងពាល។

ការប្រើពាក្យខ្លាំងៗ របស់លោក សម រង្ស៊ី ទំនងជាចង់សំដៅ ទៅលើការប្រែប្រួលណាមួយ នៃជំហររបស់លោក ហ៊ុន សែន ដែលប្រកាសកាលពីម្សិលម៉ិញ ថាលោកអាចនឹងបន្ថែមលក្ខខណ្ឌ ទៅលើគម្រោងលើកលែងទោស ជាលក្ខណៈទ្រង់ទ្រាយធំ ឲ្យដល់ទណ្ឌិតនយោបាយ ដែលកំពុងជាប់ឃុំ​ក្នុងពន្ធនាគារ ប្រសិនជាមានការលើកឡើងថា លោកធ្វើនេះ ព្រោះរងសម្ពាធ​ពីអន្តរជាតិ។

ប្រធានចលនាសង្គ្រោះជាតិ បានថ្លែងឡើង នៅលើបណ្ដាញសង្គមថា៖ «ខ្ញុំស្នើឲ្យលោក ហ៊ុន សែន ប្រកាន់ចរិតចាស់ទុំ និងថ្លៃថ្នូរបន្តិចទៅ គឺស្នើកុំឲ្យគាត់ មានចរិតដូចក្មេងពាល»។

លោកបន្តថា៖ «បើអ្នកនយោបាយ ចាស់ទុំ និងថ្លៃថ្នូរ ណាម្នាក់ ត្រូវធ្វើ ឬ មិនត្រូវធ្វើអ្វីមួយ គេសម្រេចតាមគោលការណ៍របស់គេ និងតាមការគិតគូរ ស៊ីជម្រៅរបស់គេ។ គេមិនដើរនិយាយ​ប៉ាតណា​ប៉ាតណី​ថា គេនឹងធ្វើនេះ ឬធ្វើនោះ ឬក៏មិនធ្វើនេះ មិនធ្វើនោះ អាស្រ័យតែអ្នកនេះ ឬអ្នកនោះ និយាយយ៉ាងម៉េចយ៉ាងម៉ានោះទេ។»។

កាលពីព្រឹកម្សិលម៉ិញ ថ្លែងនៅចំពោះកម្មករ-កម្មការិនី ជាច្រើនពាន់នាក់ នាយករដ្ឋមន្ត្រីចាំផ្ទះកម្ពុជា លោក ហ៊ុន សែន បានប្រកាស ពីគម្រោងលើកលែងទោស ជាលក្ខណៈទ្រង់ទ្រាយធំ ក្នុងពេលខាងមុខ ជាមួយនឹងការព្រមានទុកជាមុន ប្រឆាំងការធ្វើអត្ថាធិប្បាយទាំងឡាយណា ដែលអះអាងថា ការលើកលែងទោសនេះ បណ្ដាលមកពីការគាបសង្កត់ របស់អន្តរជាតិ។ លោកថា លោកអាចនឹងបន្ថែមលក្ខខណ្ឌ ប្រសិនជាមានការលើកឡើង បែបនោះ។

មេដឹកនាំកម្ពុជា បានថ្លែងឡើងថា៖ «បើសិនជា ខ្ញុំត្រូវឲ្យពួកអ្នក [ដែលត្រូវលើកលែងទោស] ធ្វើការសុំទោស អ្នកបានធ្វើលិខិតរួចហើយ ក៏ប៉ុន្តែបើសិនជាអ្នកណាមួយ ធ្វើអត្ថាធិប្បាយអំពីការគាបសង្កត់អន្តរជាតិ ខ្ញុំតម្រូវ ខ្ញុំទុកសិន ទុករហូត​ទៅដល់អ្នក​ដែល​ធ្វើលិខិត​សុំនេះ ធ្វើការថ្កោលទោស ចំពោះអ្នកដែលនិយាយ បានខ្ញុំព្រម»។

ប៉ុន្តែ នៅវេលាល្ងាច ក្នុងថ្ងៃម្សិលម៉ិញដដែល លោក សម រង្ស៊ី បានចេញមកអះអាង​ដោយពេញៗមាត់ថា ការលើកលែងទោសណាមួយនោះ គឺបណ្ដាលមកពីលោក ហ៊ុន សែន កំពុង​«ទាល់ច្រក» និងកំពុង​«រងសម្ពាធ» ពីសហគមន៍អន្តរជាតិ។ ការថ្លែងឡើងដូច្នេះ របស់មេដឹកនាំប្រឆាំង ត្រូវបានប្រព័ន្ធឃោសនា របស់របបក្រុងភ្នំពេញ ដកស្រង់យកមកផ្សាយ ក្នុងថ្ងៃនេះ ដោយចាត់ទុកសំដីខាងលើ ថាជា«ការផ្គើន» និងមាន«ចេតនាទុច្ចរិតញុះញង់»។

«រោងចក្រ​ផលិតព័ត៌មាន» ដ៏ល្បីមួយ ថែមទាំងធ្វើអត្ថាធិប្បាយ ស្របទៅនឹងបំណងរបស់លោក ហ៊ុន សែន ដោយធ្វើជាផ្ដល់«ទស្សនទាន» ដល់លោក កឹម សុខា លោក អ៊ុំ សំអាន លោក មៀច សុវណ្ណារ៉ា រួមនិងសកម្មជនគណបក្សសង្គ្រោះជាតិដទៃទៀត ក៏ដូចជាក្រុមគ្រួសាររបស់ពួកគេផង ថា«គួរណាស់ធ្វើលិខិតថ្កោលទោសទណ្ឌិត សម រង្ស៊ី ចំពោះទង្វើគឃ្លើន និងបង្អាក់ការមានសេរីភាពឡើងវិញ របស់អ្នកទាំងអស់គ្នា»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...