ក្រុមបាល់ទាត់នៃប្រទេសអង់គ្លេស វែសហេម យូណៃធីត (West Ham United) បានធ្វើការអបអរសាទរ ជាប្រវត្តិសាស្រ្ត​ថ្មីមួយ កាលពីថ្ងៃសុក្រ ម្សិលមិញ បន្ទាប់ពីសេចក្តីសម្រេចរបស់ អភិបាលក្រុងឡុងដ៍ លោក បូរីស ចនសិន (Boris Johnson) យល់ព្រមឲ្យពួកគេយកកីឡាដ្ឋាន អូឡាំពិក (Olympic Stadium) ធ្វើជាកីឡាដ្ឋានផ្តាច់មុខ របស់ក្រុមនេះ ហើយ​នឹងអាចចាប់ផ្តើមដំណើរការនៅរដូវកាលឆ្នាំ ២០១៦-២០១៧។

កីឡាដ្ឋាន អូឡាំពិក របស់ទីក្រុងឡុងដ៍។

ក្រុមញញួរយក្សមួយនេះ បានត្រៀមលុយប្រមាណ ១៥០លានផោន ដើម្បីស្ថាបនាកីឡាដ្ឋាននេះ ឲ្យចប់រួចរាល់​មុនរដូវ​កាល ២០១៦-២០១៧ ចាប់ផ្តើម។ កីឡាដ្ឋានអូឡាំពិក នឹងត្រូវកែឆ្នៃ ឲ្យមានកៅអី នៅត្រឹមតែ ៥៤០០០ កៅអីតែប៉ុណ្ណោះ ដែលចំនួនកៅអីសព្វថ្ងៃមានចំនួន ៨ម៉ឺនកៅអី។ ការកែប្រែ ដើម្បីឲ្យមានទំហំល្មម ទៅនឹងចំនួនអ្នកទស្សនា​របស់ក្រុម​មួយ​នេះ។

លោក ដេវ៊ីដ សាលីវ៉ាន់ (David Sullivan) និងលោក ដេវ៊ីដ ហ្គោល (David Gold) ដែលជាម្ចាស់ក្លឹបបាល់ទាត់ វែសហេម បាននិយាយថា «វាពិតជាអស្ចារ្យខ្លាំងណាស់ សំរាប់អ្នកគាំទ្រក្រុម វែសហេម ហើយការជោគជ័យទាំងនេះ ដោយ​តែ​ការ​ខិតខំប្រឹងប្រែងរបស់ក្លឹប ក្នុងរយះពេល៣ឆ្នាំចុងក្រោយនេះ»។

ពួកគាត់បានបន្តថា «ចាប់តាំងពីយើង មកកាន់កាប់ក្រុមវែសហេម នៅឆ្នាំ២០១០ យើងមានចក្ខុវិស័យវែងឆ្ងាយ ធ្វើយ៉ាង​ណាដើម្បីជួយឲ្យក្រុមមួយនេះ អាចប្រកួតប្រជែងជាមួយនឹងក្រុមធំៗ។ ការសម្រេចចិត្តទាំងនោះ ថ្ងៃនេះពិតជា​ធ្វើឲ្យ​យើង​ទទួលបានជោគជ័យ។ យើងបានយកកីឡាដ្ឋានជាតិ មកកែប្រែទៅជាកីឡាដ្ឋានថ្មីរបស់ក្រុមយើង នេះជាមោទនភាព​មួយ។»

ក្រុម វែសហេម នឹងលួងលោមអ្នកគាំទ្ររបស់ពួកគេទាំងអស់ ដើម្បីចាកចេញពីកីឡាដ្ឋានចាស់ អ័បតុនផាក (Upton Park) ដែលមានតាំងរូបចម្លាក់វីរបុរសរបស់គេ បប់ប៊ី ម៉ួរ៉េ (Bobby Moore) នៅទីនោះ ឬបើមិនដូចឆ្នោះទេ ពួកគេនឹងយក​រូប​ចម្លាក់​នោះទៅកាន់កីឡាដ្ឋានថ្មីនោះដែរ។

ក្លឹបមានគំរោងដាក់ឈ្មោះ កីឡាដ្ឋានថ្មីនេះ ដោយមានឈ្មោះវីរបុរសរបស់ពួកគេ ម៉ួរ៉េ នៅមុខគេ បន្ទាប់មកទើបឈ្មោះអ្នក​ឧបត្ថមនៅតាមក្រោយ។

ប៉ុន្តែទោះជាយ៉ាងណា ក៏នៅមានអ្នកគាំទ្រជាច្រើនមិនសប្បាយចិត្តចំពោះការផ្លាស់ប្តូរនេះដែរ ដោយពួកគេយល់ថា អនាគតរបស់ក្លឹបនេះ អាចទៅជាក្លឹបមួយផ្សេង។ ហើយអ្វីដែលធ្វើឲ្យគេ មិនពេញចិត្តដោយសារតែកីឡាដ្ឋានចាស់ អ័បតុន ផាក របស់ពួកមានអាយុកាល ជាង១០០ឆ្នាំមកហើយ ហើយធ្លាប់មានវីរបុរសពួកគេជាច្រើននាក់ បានលេងនៅទីនោះ វា​ជាការចង់ចាំ និងមានអនុស្សាវរីយ៏ល្អៗជាច្រើន ដែលមិនអាចបំភ្លេចបាន៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៣ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ