អ្នកដែលមិនយល់ ប្រាកដជាពិបាកយល់! ទោមនស្សនឹងទស្សនៈយល់ឃើញ របស់យុវតីម្នាក់... តែគឺហាងកាហ្វេ ទីកន្លែងធ្វើការ របស់យុវតីនោះទៅវិញទេ ដែលរងការ«អបអរ»។ កន្លែងធ្វើការមួយ នៅមិនគ្រប់គ្រាន់ឡើយ ព្រោះក្រុមខ្លួនស៊ើបមិនច្បាស់ ក៏ស្រាប់តែក្នុងពេលនេះ ត្រូវបន្ថែមកន្លែងធ្វើការមួយទៀត ឬត្រូវបន្ថែមហាងកាហ្វេ ក្នុងក្រុង សៀមរាប ទាំងអស់តែម្ដង។

នេះ បើតាមការលើកឡើង របស់លោក ខឹម វាសនា ប្រធានគណបក្សសម្ព័ន្ធ ដើម្បីប្រជាធិបតេយ្យ ដើម្បីបន្តភាគករណីយុវតីម្នាក់ ដែលបានសំដែងការធុញទ្រាន់របស់ខ្លួន ទល់នឹងក្បួនដង្ហែឃោសនា របស់គណបក្សណាមួយនោះ កាលពីប៉ុន្មានថ្ងៃមុន។

ប្រធានគណបក្សមួយ ដែលហៅខ្លួនឯងថា បក្សជួង ឬបក្ស «LDP» បានសរសេរលើកឡើង ពីការ «រាវស្ទាប» របស់ខ្លួន នៅមុននេះ ដូច្នេះថា៖ «នាងដែលមានទំនាស់ នឹង LDP មិនមែនធ្វើការ នៅហាងការហ្វេ Amazon ផ្សារចាស់នេះទេ គឺធ្វើការនៅហាងកាហ្វេ Amazon តាមផ្លូវជាតិលេខ៦ ទៅព្រលានយន្តហោះសៀមរាប។ តាមដឹង នៅសៀមរាម មិនមែនមានហាងកាហ្វេ Amazon តែពីរហាងនេះទេ គឺមានហាងកាហ្វេ Amazon ផ្សេងទៀត។»។

សំណេររបស់លោក ខឹម វាសនា ដែលជាប្រធានគណបក្សនយោបាយមួយ ជាប្រតិកម្មថ្មី និងចុងក្រោយបង្អស់ នៅក្នុងរឿងភាគ ហើយក៏ជាចម្លើយ តបទៅហាងកាហ្វេ «Amazon psa chas Siena reap» ក្រោយពីហាងរកទទួលទានមួយនេះ លើកឡើងកាលពីម្សិលម៉ិញ នៅលើទំព័រហ្វេសប៊ុករបស់ខ្លួនថា៖ «ប៉ុន្មានថ្ងៃនេះ មានភ្ញៀវច្រេីនខុសពីធម្មតា អរគុណបងប្អូន ដែលបានគាំទ្រ Amazon psa chas Siena reap»។

សម្រាប់ប្រធានគណបក្ស«ជួង» ការសរសេរ​របស់​ហាង​កាហ្វេ​ខាង​លើ មានចេតនាមិនល្អ។ លោកសរសេរថា៖ «តាមសំដី យើងមើលយល់ដល់ចេតនា។ គេអាចធ្វើអីបាន ជារឿងរបស់គេ យើងអាចធ្វើអីបាន ជារឿងរបស់យើង។»។

បន្ទាប់មក លោក ខឹម វាសនា បានញុះឲ្យអ្នកគាំទ្រគណបក្សលោក គួរធ្វើការអបអរហាងកាហ្វេទាំងពីរ តាមរយៈសំណេរលោក ដូចនេះ៖ «ពល LDP នៅសៀមរាប គួរជួយអបអរហាងកាហ្វេ Amazon ផ្សារចាស់នេះមួយ និងហាងកាហ្វេ Amazon ដែលនាងមានទំនាស់​នឹង LDP ធ្វើការនោះហើយ ដើម្បីឲ្យហាងកាហ្វេ Amazon ទាំងពីរនេះ កាន់តែកើនម៉ូយ»៕