ប្រសិនជាកីឡាករបារាំងមួយចំនួន បានសម្រេចប្រគល់ប្រាក់បំណាច់បន្ថែមពិសេស ដែលទទួលបាន បន្ទាប់ពីក្រុមខ្លួនរកបានជ័យជំនះ នៅក្នុងការប្រកួតនីមួយៗ ទៅឲ្យសមាគម ឬអង្គការមនុស្សធម៌នោះ កីឡាករ ប៉ូល ប៉ូកបា (Paul Pogba) ខ្សែបម្រើបារាំងវិញ បានជ្រើសរើសឧទ្ទិសជ័យជំនះរបស់ខ្លួន ទៅឲ្យកីឡាករបាល់ទាត់ វ័យក្មេងថៃ ទាំង១២នាក់ ដែលទើបនឹងត្រូវបានសង្គ្រោះ និងយក​ចេញ​ទាំង​អស់គ្នា ពីរូងភ្នំ​ស្ថិតនៅ​ភាគខាងជើង នៃប្រទេសថៃ ក្រោយពីពួកគេ បានជាប់គាំងខ្លួន អស់រយៈពេល១៧ថ្ងៃ នៅទីនោះមក។

ខ្សែបម្រើបារាំង បានបង្ហោះពាក្យពេជន៍ទាំងនេះ ជាភាសាអង់គ្លេស នៅលើទំព័រទ្វីសធើររបស់ខ្លួន ដោយមានអត្ថន័យ ជាខេមរភាសាទាំងស្រុង ដូចខាងក្រោមថា៖ «ជ័យជំនះ (កាលពីយប់ម៉ិញ ទល់នឹងក្រុម ប៊ែលហ្សិក) នេះ ត្រូវបានឧទ្ទិសទៅយុវកីឡាករ ដ័ក្លាហាន នៅថ្ងៃនេះ។ សូមអបអរសាទរ ដល់អ្នកទាំងអស់គ្នា! អ្នកឯងពិត​ជាអស្ចារ្យ​ខ្លាំង​ណាស់។»។

This victory goes to the heroes of the day, well done boys, you are so strong #thaicaverescue #chiangrai pic.twitter.com/05wysCSuVy

— Paul Pogba (@paulpogba) 10 juillet 2018

កីឡាករបាល់ទាត់វ័យក្មេង អាយុពី១២ ដល់១៦ឆ្នាំ និងគ្រូបង្វឹក អាយុ២៥ឆ្នាំ ទាំងអស់ចំនួន ១៣នាក់ ទើបនឹងត្រូវបានសង្គ្រោះជាស្ថាពរ ចេញពីរូងភ្នំជាបន្តបន្ទាប់ រាប់ពីថ្ងៃអាទិត្យ មកទល់នឹងយប់ថ្ងៃអង្គារ​ម្សិលម៉ិញ បន្ទាប់ពីពួកគេ ត្រូវបានជាប់គាំង នៅក្នុងរូងភ្នំខាងលើ អស់រយៈពេលជាង២សប្ដាហ៍ ដោយសារទឹកភ្លៀងជន់លិច​ច្រកចូល និងនៅតាមបណ្ដោយរូងភ្នំ។ តុល្យភាពសរុប៖ ក្មេង៤នាក់ ត្រូវបាននាំចេញ នៅថ្ងៃអាទិត្យ - ៤នាក់ នៅថ្ងៃចន្ទ និង៥នាក់ចុងក្រោយ ក្នុងយប់ថ្ងៃអង្គារ។

ពួកគេទាំងនេះ ត្រូវបានសហព័ន្ធបាល់ទាត់អន្តរជាតិ «Fifa» អញ្ជើញឲ្យមកទស្សនាដោយផ្ទាល់ ការប្រកួតផ្ដាច់ព្រ័ត្រ នៃបាល់ទាត់ពិភពលោក នៅចុងសប្ដាហ៍ខាងមុខ។ តែបើតាមក្រុមគ្រូពេទ្យ ការធ្វើដំណើររបស់ក្រុមក្មេងរងគ្រោះ ទំនងជាមិនអាចធ្វើបានទេ ក្រោមមូលហេតុ សុខភាពដ៏ផុយស្រួយ​របស់ពួកគេ ដែលចាំបាច់ត្រូវឲ្យពួកគេ សម្រាកនៅមន្ទីរពេទ្យ សម្រាប់រយៈពេលជាច្រើនថ្ងៃ៕