រាល់​សេចក្ដី​សម្រេច ​របស់​គណបក្សសង្គ្រោះជាតិ គឺ​ជា​សេចក្ដី​សម្រេច​ របស់​សមាជ​ក្រុមប្រឹក្សា​ជាតិ គណៈកម្មការ​នាយក និង​គណៈកម្មាធិការ​អចិន្ត្រៃយ៍​គណបក្ស​ ដែល​ស្រប​តាម​លក្ខន្តិកៈ​របស់​បក្ស ហើយគណបក្សប្រកាស មិន​ទទួល​ស្គាល់​ការ​ផ្សព្វផ្សាយ និង​សកម្មភាព​បុគ្គលណា ​ដែល​មិន​មែន​ជា​សេចក្ដី​សម្រេច​របស់​គណបក្ស ​រួម​មាន ការ​ប្រើប្រាស់​សំឡេង រូបភាព ឯកសារ​​លាយលក្ខណ៍​អក្សរ ឬស្ដីពី​សកម្មភាព​ទណ្ឌិត ដែលបានជាប់ទោស ពីបទមជ្ឈឹម ឬបទឧក្រិដ្ឋ។ នេះ បើតាមសេចក្ដី​ថ្លែងការណ៍មួយ ​របស់​គណបក្ស​សង្គ្រោះ​ជាតិ ដែលទើបនឹងចេញផ្សាយ នៅរសៀលនៅ​ថ្ងៃ​ទី​១០ ខែ​សីហា ឆ្នាំ២០១៧នេះ។

សេចក្ដីថ្លែងការណ៍បានបន្តឲ្យដឹងថា គណបក្សប្រកាសមិនទទួលខុសត្រូវ ​ចំពោះការ​ផ្សព្វផ្សាយ និង​សកម្មភាព​បុគ្គលណា ទោះជាមាន​ការ​យល់​ព្រម​​ដោយ​ចំហ ដោយ​តុណ្ហីភាព (ដំណើរ​ស្ងៀម​​មិន​បញ្ចេញ​វាចា) ឬ​ដោយ​​ឃុបឃិត​ ជាមួយ​ទណ្ឌិត ជាប់​ទោសពីបទ​ឧក្រិដ្ឋ ឬបទ​​មជ្ឈិម ឲ្យធ្វើសកម្មភាពណាមួយ ដោយ​ផ្សារភ្ជាប់​​ទៅ​នឹង​គណបក្ស។

ការ​ប្រកាសខាងលើ ​របស់​គណបក្ស​ប្រឆាំងធំជាងគេ នៅកម្ពុជា​នេះ បានធ្វើឡើង ​បន្ទាប់​ពី​ច្បាប់ ស្ដីពី​គណបក្ស​នយោបាយ​ ដែល​ទើប​ត្រូវ​បាន​ធ្វើ​វិសោធនកម្ម​ថ្មីៗ​នេះ ត្រូវបានដាក់ឲ្យចូលជាធរមាន ដោយលោក សាយ ឈុំ ប្រធានព្រឹទ្ធសភា - អនុប្រធានគណបក្សប្រជាជនកម្ពុជា ចុះហត្ថលេខាលើច្បាប់នេះ ក្នុងនាមជាប្រមុខរដ្ឋស្ដីទី កាលពីពេលថ្មីៗនេះ។

ច្បាប់ថ្មី ដ៏មានឥទ្ធិពល...

ក្នុងអត្ថបទ​ច្បាប់កែថ្មីនេះ បានចែង​ហាម​គ្រប់​គណបក្ស​នយោបាយ ​មិន​ត្រូវ​ប្រើប្រាស់​សារ​ ជា​សំឡេង រូបភាព ឯកសារ​ជា​លាយលក្ខណ៍អក្សរ ឬ​សកម្មភាព ​របស់​ទណ្ឌិត​ជាប់ទោស​ ពី​បទ​ឧក្រិដ្ឋ ឬ​ពី​បទ​មជ្ឈិម ដើម្បី​ជា​ផលប្រយោជន៍​នយោបាយ​ សម្រាប់​គណបក្ស​របស់​ខ្លួនឡើយ។ បើពុំនោះទេ ច្បាប់នេះ អនុញ្ញាតឲ្យតុលាការ​ ​សម្រេច​ផ្អាក​សកម្មភាព​​នយោបាយ​ របស់គណបក្សនោះ ក្នុង​រយៈពេល ៥​ឆ្នាំ ឬ​អាច​រំលាយ​គណបក្ស​នោះ ​ចោល​តែម្ដង។

ក្រុមអ្នកនយោបាយប្រឆាំង និងក្រុមអ្នកឃ្លាំមើល បញ្ហានយោបាយកម្ពុជា មួយចំនួន បានយល់ថា ច្បាប់នេះចែងឡើង ដើម្បីសំដៅកំហិត ដាក់ទៅលើ​លោក សម រង្ស៊ី អតីតប្រធានគណបក្សសង្គ្រោះជាតិ ដែលត្រូវបានប្រព័ន្ធតុលាការកម្ពុជា ផ្តន្ទាទោសពីបទចោទជាច្រើន ក្រោមពាក្យបណ្ដឹង របស់លោកនាយករដ្ឋមន្ត្រី ហ៊ុន សែន និងលោកឧបនាយករដ្ឋមន្ត្រី ហោ ណាំហុង។ លោក ហ៊ុន សែន ផ្ទាល់ ក៏ធ្លាប់បានថ្លែងសំដៅទៅលោក សម រង្ស៊ី ដូច្នេះដែរ នៅពេលច្បាប់នេះ ត្រូវបានបុរសខ្លាំងរូបនេះ បញ្ជាទៅក្រុមតំណាងរាស្ត្រ មកពីគណបក្សប្រជាជនកម្ពុជា ឲ្យស៊ើរើធ្វើវិសោធនកម្ម ជាលើកទីពីរ កាលពីចុងខែមិថុនាកន្លងទៅ។

ដោយឡែក នៅក្នុងសំណេរមួយ របស់លោក អេង ឆៃអ៊ាង អនុប្រធានគណបក្សសង្គ្រោះជាតិ នៅលើបណ្ដាញសង្គម បានអះអាងថា លោកនៅតែបន្តនិយាយ និងបង្ហោះរូបភាព ពីបុគ្គលទណ្ឌិត​បន្តទៅទៀត ក្នុងនាមរូបលោកផ្ទាល់។ ទណ្ឌិតរូបនោះ ទំនងជាលោកចង់សំដៅ ទៅលោក សម រង្ស៊ី ដោយសារតែលោក ឆៃអ៊ាង ត្រូវបានគេស្គាល់ថា ជាមនុស្សស្មោះស្ម័គ្រ របស់អតីតប្រធានគណបក្សប្រឆាំង តាំងពីដើមទីរៀងមក ហើយសំណេរ ដែលលោកសរសេរនោះ ក៏មានអមមកជាមួយ ដោយរូបថតរបស់លោក សម រង្ស៊ី ដែរ។

អនុប្រធានគណបក្សរូបនេះ បានសរសេរឡើងថា៖ «ច្បាប់ស្តីពីវិសោធនកម្មច្បាប់ ស្តីពីគណបក្សនយោបាយ ហាមតែគណបក្សនយោបាយទេ តែមិនហាមចំពោះបុគ្គលឡើយ»។

លោក អេង ឆៃអ៊ាង បានប្រកាសពីជំហររបស់លោកថា៖ «ដូច្នេះ ក្នុងនាមខ្លួនខ្ញុំផ្ទាល់ ខ្ញុំនៅតែមានសិទ្ធិនិយាយ ឬយករូបភាព [ពីលោក សម រង្ស៊ី] មកផុស (បង្ហោះ) ក្នុងគណនីបណ្តាញសង្គមផ្ទាល់ខ្លួន ចំពោះមនុស្ស ដែលខ្ញុំគោរពស្រលាញ់ ហើយត្រូវក្រុមអ្នកមានអំណាច ចាត់ជាអ្នកទោស»៕