ហ៊ុន សែន ថាគ្មានបញ្ហា បើអាមេរិកកាត់ជំនួយ១០០%
- ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី១៥ មិថុនា ២០១៧
- កែប្រែចុងក្រោយ: June 15, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
«មិនមានបញ្ហាទេ ទោះកាត់១០០ភាគរយ ក៏កាត់ទៅ ព្រោះខ្មែរយើងអត់មានអីផង» នេះជាការលើកឡើង របស់លោក ហ៊ុន សែន នាយករដ្ឋមន្ត្រី-ប្រធានគណបក្សប្រជាជនកម្ពុជា ដើម្បីតបទៅនឹងគម្រោងកាត់ជំនួយអាមេរិក សម្រាប់ប្រទេសកម្ពុជា ពីសំណាក់រដ្ឋបាលប្រធានាធិបតីអាមេរិកថ្មី លោក ដូណាល់ ត្រាំ (Donald Trump)។
នាយករដ្ឋមន្ត្រីកម្ពុជា បានថ្លែងដូច្នេះ នៅចំពោះនិស្សិតបញ្ចប់ការសិក្សា ជាច្រើនរយនាក់ នៅក្នុងពិធីចែកសញ្ញាបត្រមួយ ក្នុងព្រឹកថ្ងៃទី១៥ ខែមិថុនានេះ ដោយនិយាយការពាររដ្ឋបាលប្រធានាធិបតីអាមេរិកថា លុយមិនមែនធ្លាក់ពីលើមេឃទេ ដែលជាហេតុធ្វើឲ្យរដ្ឋបាលលោក ដូណាល់ ត្រាំ ត្រូវកាត់បន្ថយជំនួយទៅក្រៅប្រទេស ចំនួន៣០ភាគរយ សម្រាប់គម្រោងថវិកាឆ្នាំក្រោយៗ របស់ប្រទេសមហាអំណាច។
លោក ហ៊ុន សែន បានថ្លែងថា៖ «ដូណាល់ ត្រាំ ត្រូវការលុយ អញ្ជឹងលុយវាមិនមែនធ្លាក់ពីលើមេឃមកទេ វាត្រូវមានតុល្យភាព អញ្ចឹងគាត់កាត់ជំនួយ ទៅក្រៅប្រទេសចំនួន៣០ភាគរយ។ ចំពោះខ្មែរយើងមិនមានបញ្ហាទេ ទោះកាត់១០០ភាគរយ ក៏កាត់ទៅ ព្រោះខ្មែរយើងអត់មានអីផង»។
គម្រោងកាត់បន្ថយជំនួយ ពីសំណាក់រដ្ឋបាលលោក ដូណាល់ ត្រាំ សម្រាប់ឆ្នាំ២០១៨ ដល់ប្រទេសកម្ពុជា មានទំហំរហូតដល់ទៅ ៧០,៥% ដែលនឹងធ្វើឲ្យកម្ពុជា អាចបាត់បង់ទឹកប្រាក់ជំនួយ ពីអាមេរិក សម្រាប់ឆ្នាំ២០១៨ រហូតដល់ទៅជាង ៥៤លានដុល្លារអាមេរិក ខណៈទឹកប្រាក់ជំនួយ សម្រាប់ឆ្នាំ២០១៦ កន្លងទៅ មានចំនួនសរុបជាង ៧៧លានដុល្លារអាមេរិក។ នេះ បើតាមការការផ្សាយ របស់ទស្សនាវដ្ដីគោលនយោបាយការបរទេស (Foreign Policy Magazine) កាលពីថ្ងៃទី២៤ ខែមេសា កន្លងទៅ។
ក្នុងចំណោមទឹកប្រាក់ជំនួយអាមេរិក កាលពីឆ្នាំ២០១៦ កន្លងទៅ សម្រាប់ប្រទេសកម្ពុជា ដែលមានចំនួនទឹកប្រាក់សរុបជាង ៧៧លានដុល្លារអាមេរិកនេះ ជំនួយអភិវឌ្ឍន៍ប្រមាណជាង ៣៤លានដុល្លារអាមេរិក និងមូលនិធិទ្រទ្រង់សេដ្ឋកិច្ចចំនួន ៨លានដុល្លារអាមេរិក នឹងត្រូវកាត់បន្ថយទាំងស្រុង។ រីឯកម្មវិធីសុខាភិបាលសកល របស់ក្រសួងការបរទេស ចំនួនជាង ៦លានដុល្លារអាមេរិក នឹងត្រូវកាត់បន្ថយ ១៨,៣% មកនៅត្រឹម ៥លានដុល្លារអាមេរិក និងកម្មវិធីសុខាភិបាលសកលរបស់ USAID ចំនួនជាង ២៨លានដុល្លារអាមេរិក នឹងត្រូវកាត់បន្ថយ ៣៧,៤% មកនៅត្រឹមជាង ១៧លានដុល្លារអាមេរិកវិញ។
បើតាមតួលេខថ្មីនោះ កម្ពុជាអាចទទួលបានជំនួយសរុបពីអាមេរិក សម្រាប់ឆ្នាំ២០១៨ ខាងមុខ នូវទឹកប្រាក់ប្រមាណតែជាង ២២លានដុល្លារអាមេរិកប៉ុណ្ណោះ។
សម្រាប់លោក ហ៊ុន សែន បានទម្លាក់ការទទួលខុសត្រូវ នៃព្រឹត្តិការណ៍នៃការកាត់បន្ថយជំនួយនេះ ទៅលើសារព័ត៌មានទៅវិញ ដោយលោកបានបន្ទោសសារព័ត៌មាន ថាមានបំណងចង់ផ្សាយ ឲ្យកម្ពុជាមានឈ្មោះអាក្រក់។ លោកថា៖ «អាមេរិក បានប្រកាសកាត់បន្ថយជំនួយទៅក្រៅប្រទេស ៣០ភាគរយ ប៉ុន្តែអ្នកនៅស្រុកខ្មែរ កាសែតមួយចំនួននៅស្រុកខ្មែរថា កាត់តែកម្ពុជាទេ ដើម្បីឱ្យឃើញថាកម្ពុជានេះ វាអាក្រក់តែឯង។ អញ្ចឹងបាន ដូណាល់ ត្រាំ គាត់ជេរកាសែតពួកគាត់តែម្តង ហើយគាត់ជេរជាងគេ គឺ CNN ហើយអា ញូយ៉កថែម នេះ សុទ្ធតែត្រូវមាត់គាត់ តែទាំងអស់»។
នាយករដ្ឋមន្ត្រីកម្ពុជា បានឆ្លៀតឱកាសនៃការថ្លែងនេះ ដើម្បីធ្វើរិះគន់ធ្ងន់ៗ ទៅកាន់សហរដ្ឋអាមេរិកថែមទៀត ដោយលោកគ្រោងនឹងនិយាយ ជាមួយលោក ដូណាល់ ត្រាំ ឱ្យបានដឹងថា តើអ្វីទៅដែលធ្វើឱ្យគេ មិនចូលចិត្តសហរដ្ឋអាមេរិក ដូចពេលនេះ។ គម្រោងជួបនិយាយនោះ អាចនឹងធ្វើឡើងក្នុងកិច្ចប្រជុំ អាស៊ាន-អាមេរិក នៅប្រទេសឡាវ នៅពេលខាងមុខ ។
ចំពោះលោក មាស នី អ្នកវិភាគនិងអ្នកឃ្លាំមើលបញ្ហាសង្គម បានសំដែងក្ដីបារម្ភថា ការកាត់បន្ថយជំនួយ ពីសំណាក់សហរដ្ឋអាមេរិក នឹងធ្វើឲ្យកម្ពុជារត់ទៅខ្ចីបំណុល ពីបរទេសកាន់តែច្រើន ហើយអាចរុញឲ្យកម្ពុជា ងាកទៅរកប្រទេសចិនកុម្មុយនីស កាន់តែខ្លាំងឡើង។ លោកបានមានប្រសាសន៍ តាមរយៈវិទ្យុអាស៊ីសេរីថា៖ «រឿងមួយដែលធ្ងន់ធ្ងរនោះ គឺវាហាក់ដូចជាធ្វើឲ្យកម្ពុជា កាន់តែងាកខ្លួន ទៅរកពឹងផ្អែកទៅលើប្រទេសចិន ហ្នឹងកាន់តែធ្ងន់ទៅៗ»៕