កូរ៉េ​ខាង​ជើង​គម្រាម​រំលាយ​ប្រទេស​អាមេរិក ចេញ​ពី​ផែនដី

គេហទំព័រផ្លូវការមួយ របស់រដ្ឋាភិបាលកុម្មុយនីសកូរ៉េ បានបង្ហោះគម្រាមក្រុងវ៉ាស៊ីនតោន ពីកំហុសមួយ​ដ៏ធ្ងន់ធ្ងរ ប្រសិន​បើ​ប្រទេស​មហា​អំណាចមួយនេះ ហ៊ានប៉ះប្រទេសកូរ៉េខាងជើង។ កំហុសដ៏ធ្ងន់ធ្ងរនោះ នឹង​មិន​អាច​ជួសជុល​វិញ​បាន​ឡើយ ដោយសារ​ក្រុង​ព្យុងយ៉ាង មានសមត្ថភាព ធ្វើឲ្យសហរដ្ឋអាមេរិក ត្រូវរលាយ ចេញ​ពី​ផែនទី​​ពិភពលោក។
កូរ៉េ​ខាង​ជើង​គម្រាម​រំលាយ​ប្រទេស​អាមេរិក ចេញ​ពី​ផែនដី
កាំជ្រួចធុនធ្ងន់ របស់ប្រទេសកូរ៉េខាងជើង នៅក្នុងក្បួនព្យុហយាត្រាមួយ របស់របបកុម្មុយនីស។ (រូបថត AFP)
Loading...
  • ដោយ: កេសរ កូល ([email protected]) - ភ្នំពេញ ថ្ងៃទី២៥ មេសា ២០១៧
  • កែប្រែចុងក្រោយ: April 25, 2017
  • ប្រធានបទ: ឧបទ្វីបកូរ៉េ
  • អត្ថបទ: មានបញ្ហា?
  • មតិ-យោបល់

មហាអំណាចទីមួយ នៅលើផែនដី កំពុងរងការគម្រាម ពីការបាត់រូបរាង ចេញពីផែនទីពិភពលោក។ នេះ បើ​តាម​គេហទំព័រ​ផ្លូវការមួយ របស់រដ្ឋាភិបាលក្រុងព្យុងយ៉ាង ដែលបានចេញផ្សាយ នូវការព្រមានដូច្នេះ ក្នុង​ករណី​ដែល​មហា​អំណាច​មួយនេះ ហ៊ានប្រកាសសង្គ្រាម នៅលើឧបទ្វីបកូរ៉េ។ ការព្រមាននេះ បានចាក់​ប្រេង​បន្ថែម ​ទៅ​លើ​ស្ថានភាព​ដ៏តឹងតែង ដែលកំពុងមានស្រាប់ហើយ បន្ទាប់ពីការប្រកាសបញ្ជូន នាវាសង្គ្រាម​ផ្ទុកដោយ​យន្ដហោះ​ចម្បាំង​ របស់អាមេរិក ទៅ​កាន់​សមុទ្រ​ជប៉ុន​។

ការពីចុងសប្ដាហ៍កន្លងទៅ អនុប្រធានាធិបតី​អាមេរិក លោក ម៉ៃឃ៍ ផេន្ស៍ (Mike Pence) បានថ្លែង​ពី​ក្រុង ស៊ីដនី ប្រទេស​អូស្ត្រាលី មក​ថា នាវាសង្គ្រាម «Carl Vinson» ដែលមានផ្ទុក​យន្ដហោះ​រាប់​សិប រួមនឹង​នាវា​ពិឃាត និង​នាវា​ល្បាត​ផ្សេង​ទៀត ដែលមានសមត្ថភាព​បាញ់កាំជ្រួច សំដៅ​ដីគោក​បាន​នោះ នឹងមក​ដល់​សមុទ្រ​ជប៉ុន ក្នុង​ប៉ុន្មាន​ថ្ងៃ​ខាង​មុខ​នេះ។ សមុទ្រជប៉ុន ដែល​ស្ថិត​នៅ ទល់មុខតំបន់ឆ្នេរ​ខាងលើ នៃឧបទ្វីបកូរ៉េ។

» អត្ថបទដែលទាក់ទង៖ នាវា​សង្គ្រាម​ផ្ទុក​យន្ដហោះ​ចម្បាំង​អាមេរិក ជិត​​មក​ដល់​សមុទ្រ​ជប៉ុន

ការចល័តកងទ័ព និងសព្វាវុធ​ធុន​ធ្ងន់​ទាំងនេះ បានធ្វើ​ឡើង ដើម្បី​ត្រៀម​ឆ្លើយ​តប ទៅនឹងការលេច​ឮ​ចុង​ក្រោយ​បំផុត ដែល​អះអាង​ថា របប​កុម្មុយនីស​កូរ៉េ​គ្រោងនឹងសាកល្បង គ្រាប់បែកនុយក្លេងអ៊ែ ជា​លើក​ទី៦​របស់​ខ្លួន ​នៅ​ពេល​ខាង​មុខ។ គ្រាន់តែ​នៅក្នុង​ខែមេសា​នេះ ប្រទេសកូរ៉េខាងជើង បានបាញ់​សាកល្បង​កាំជ្រួច​របស់​ផង​ខ្លួន ចំនួន​ពីរដង​រួចហើយ។

គេហទំព័រ «Uriminzokkiri» ដែលជាគេហទំព័រ សម្រាប់ការឃោសនា របស់ក្រុង​ព្យុងយ៉ាង បាន​អះអាង​ថា ការ​ចល័ត​នាវា​សង្គ្រាម «Carl Vinson» មក​កាន់​ឧបទ្វីបកូរ៉េ ជាការប្រកាស​សង្គ្រាម ហើយ​«វាជា​ភស្ដុតាង មិន​អាច​ប្រកែក​បាន អំពី​ការ​ឈ្លានពាន មកលើ​ប្រទេស​កូរ៉េ​ខាងជើង ដែលកើត​ឡើង សឹងតែ​គ្រប់​ពេលវេលា»។ ក្នុង​បទ​វិចារណកថា​របស់​គេហទំព័រ​នេះ បានសរសេរ​ព្រមាន​ក្រុងវ៉ាស៊ីនតោន ពីកំហុស​ដ៏ធ្ងន់ធ្ងរ​មួយ ដែល​ប្រទេស​អាមេរិក ប្រដូច​ប្រទេស​កូរ៉េ​ខាង​ជើង ទៅនឹង​​ប្រទេស​ស៊ីរី។

គេហទំព័រឃោសនា បានសរសេរថា៖ «ពិភពលោក​នឹងមើលឃើញ ថាតើនាវានុយក្លេអ៊ែរ ដ៏ល្ងីល្ងើ​របស់​ក្រុង​វ៉ាស៊ីនតោន នឹង​ត្រូវ​កំទេច ឲ្យក្លាយជាគំនរដែក លិចបាត់​ចូល​ទៅបាត​សមុទ្រ ដោយ​របៀប​ណា ហើយ​ជា​ពិសេស មើល​ឃើញ​ថា តើប្រទេស​មួយ ដែល​មាន​ឈ្មោះ អាមេរិក នឹងត្រូវបានរលប់​បាត់​​ពី​ផែនដី យ៉ាង​ដូចម្ដេច»។

«ការគម្រាមកំហែង​ផ្នែកយោធា ទាំងននលគោក»

រីឯសារព័ត៌មាន «Rodong Sinmun» ដែលគេស្គាល់ថា ជាអ្នកនាំពាក្យរបស់របបកុម្មុយនីស ក៏​បាន​សរសេរ​បរិយាយ​ដែរ នៅក្នុង​បទ​វិចារណកថា​​របស់​ខ្លួនថា កងទ័ពប្រជាជនកូរ៉េ នៃ​សាធារណរដ្ឋ​ប្រជាមានិត​ប្រជា​ធិប​តេយ្យ​កូរ៉េ (ឈ្មោះ​ផ្លូវការ របស់ប្រទេសកូរ៉េខាងជើង) មិនបាន​ញាប់ញ័រ នឹង​ដំណឹង​នៃការមកដល់ របស់​នាវា​សង្គ្រាម​ខាង​លើ របស់​ប្រទេស​អាមេរិក​ឡើយ ដោយចាត់ទុក​ដំណឹង​នេះ ជា«ការគម្រាម​កំហែង​​ផ្នែក​​យោ​ធា​ ទាំង​ននល​គោក»​មួយ។ សារព័ត៌មាន បាន​សរសេរ​ថា៖ «កងទ័ព​ប្រជាជនកូរ៉ បានត្រៀម​រួច​ជា​ស្រេច ក្នុង​ការ​ពន្លិចនាវា​សង្គ្រាម​ទាំង​នោះ របស់​សហរដ្ឋអាមេរិក ដោយ​បើក​ប្រតិបត្តិការ​វាយ​ប្រហារ តែ​ម្ដង​គត់»។

ការព្រមានកំទេចសហរដ្ឋអាមេរិក ពីសំណាក់របបកុម្មុយនីស មិនមែនទើបតែកើតមាន ជាលើក​ទីមួយ​នោះ​ទេ ហើយ​របប​ដឹកនាំ​មួយ​នេះ នៅតែ​ប្រកាន់ភ្ជាប់ នូវ​គម្រោង​របស់ខ្លួន ក្នុងការ​ផលិត​កាំជ្រួច​រយៈឆ្ងាយ ដែល​មាន​បំពាក់ ដោយ​គ្រាប់​បែក​​នុយក្លេអ៊ែរ ដើម្បីបាញ់​ទៅដល់​ទឹកដីអាមេរិក។ តែ​បច្ចេកវិទ្យា របស់​របប​កុម្មុយនីស ត្រូវ​​ក្រុម​អ្នក​តាម​ដាន និងអ្នកជំនាញ​ជាច្រើន​នាក់ គិតថា នៅមិនទាន់​មានលទ្ធភាព​ ទៅ​ដល់នោះ នៅឡើយ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]oroom.info
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...