ក្រសួងបង្រួបបង្រួមកូរ៉េ នៃប្រទេសកូរ៉េខាងត្បូង បានថ្លែងឲ្យដឹង កាលពីចុងសប្ដាហ៍កន្លងទៅនេះថា អគ្គ​មគ្គុ​ទេសន៍​ដ៏មហិមា នៃរបប​កុម្មុយនីស​​កូរ៉េខាងជើង លោក គីម ជុង-អ៊ុន (Kim Jong-un) បានដកចេញពីតំណែង នូវ​រដ្ឋមន្ត្រី​មួយ​រូប ដែលទទទួលបន្ទុក ក្រសួង​សន្ដិសុខ​រដ្ឋ និងជាប្រធានគ្រប់គ្រង បណ្ដាញចារកម្ម​របស់​របប​ក្រុង​ព្យុងយ៉ាង ក្រោម​ហេតុ​ផល ថាបាន រំលោភ«អំណាច និងការទុកចិត្ត»។ មិន​ត្រឹមតែប៉ុណ្ណឹង មេដឹកនាំវ័យក្មេង​កូរ៉េ​ខាង​ជើង​រូបនេះ នៅបាន​ប្រហារ​ជីវិត​​ភ្នាក់ងារ​ចារកម្ម ជាច្រើននាក់ទៀត។

លោក «Jeong Joon-Hee» អ្នកនាំពាក្យ​របស់​ក្រសួង​បង្រួប​បង្រួម​កូរ៉េ នៃប្រទេសកូរ៉េខាងត្បូង បានថ្លែង​ឡើង​ថា លោក «Kim Won-Hong» រដ្ឋមន្ត្រី​សន្តិសុខរដ្ឋ ត្រូវបានដកចេញពីតំណែង កាលពីពាក់កណ្ដាល​​ខែ​មករា​កន្លង​ទៅ នៅក្នុងក្របខណ្ឌ នៃការ​អង្កេត​មួយ ទាក់ទង​នឹងអំពើពុករលួយ និង​ការ​«រំលោភលើអំណាច» ដែលត្រូវ​បាន​ធ្វើ​ឡើង ទៅលើរាល់​ភារកិច្ច របស់ឧត្ដមមន្ត្រីរូបនេះ។

អ្នកនាំពាក្យបានថ្លែងឡើងថា៖ «លោក "Kim Won-Hang" គឺជាទីប្រឹក្សាដ៏ជិតដិតម្នាក់ របស់​លោក គីម ជុង-អ៊ុន និងជាមនុស្ស​​ដែល​បាន​ចូលរួម នៅក្នុងការដឹកនាំ​ដ៏គួរឲ្យភ័យខ្លាច នៃរបបកុម្មុយនីស។ ប៉ុន្តែ​ឧត្ដម​មន្ត្រី​រូប​នេះ ត្រូវ​បាន​លោក គីម ជុង-អ៊ុន ដកចេញ​​ពី​តំណែង។»។

លោក «Kim Won-Hong» មានថានៈ​ជាច្រើន នៅក្នុងរបបកុម្មុយនីស ហើយលោក​​ក៏ជា​ឧត្ដមសេនីយ៍​​មួយ​រូប ដែល​ពាក់​ផ្កាយ​​ចំនួន​៤គ្រាប់ នៅលើ​ស្មារដែរ។ នៅក្រោយ​ការដក​ចេញ​ពីតំណែង អតីតឧត្តមមន្ត្រី ត្រូវបាន​កាត់​បន្ថយ​​ចំនួនផ្កាយ​របស់​ខ្លួន មក​នៅ​សល់​មួយ។

ប្រភពមួយផ្សេងទៀត ពីមន្ត្រីជាន់ខ្ពស់ របស់ក្រសួងបង្រួបបង្រួមកូរ៉េ (កូរ៉េខាងត្បូង) ដែលសុំមិនបញ្ចេញឈ្មោះ បានបង្ហើប​ឲ្យដឹង​បន្ថែម​ថា ក្នុង​ពេលតែមួយ នឹងការដកតំណែង របស់លោក «Kim Won-Hong» នៅមាន​អ្នក​ទទួល​ខុសត្រូវ ជាច្រើននាក់ របស់ក្រសួង​សន្តិសុខ​រដ្ឋកូរ៉េខាងជើង ត្រូវ​បាន​របប​នេះ​ប្រហារជីវិត។

ប្រភពបានបញ្ជាក់ទៀតថា នេះគឺជាយុទ្ធនាការ«ចម្រាញ់» មួយថ្មីទៀត បង្កក្ដីព្រួយបារម្ភខ្លាំងឡើង ដល់​មន្ត្រី​ជាន់​ខ្ពស់​​របស់​​របប​​កុម្មុយនីស ដែលធ្វើឲ្យ​ស្ថិរភាព​នយោបាយ របស់របបនេះ មានសភាព​កាន់តែ​ផុយស្រួយ​។

ក្រសួងសន្តិសុខរដ្ឋ​របស់ប្រទសកូរ៉េខាងជើង មិនមែនជាក្រសួង ដែលធានាពីសន្ដិសុខ ជូនដល់ជាតិនិង​ប្រជាជន​ទេ តែ​ជា​ស្ថាប័ន​គ្រឹះដ៏រឹងមាំមួយ របស់របបក្រុងព្យុងយ៉ាង សម្រាប់ឃ្លាំមើល ទៅលើចលនាប្រជាជន ឬសម្រាប់​ប្រយុទ្ធ​ប្រឆាំង ទល់នឹង​អ្នក​បំបែកខ្លួន (អ្នកក្បត់នឹងរបបដឹកនាំ) ទៅវិញ។ ក្រសួងនេះ ក៏គ្រប់គ្រងផងដែរ នូវ​ពន្ធនាការ​ទាំងឡាយ ដែល​បង្កើត​ឡើង សម្រាប់ដាក់ឃុំអ្នក​នយោបាយ ដែលរបបកុម្មុយនីស តាមរយៈ​តុលាការ​ប្រជាជន សម្រេច​ផ្ដន្ទាទោស។

ស្ថិតក្នុងតំណែងខាងលើ តាំងពីឆ្នាំ២០១២ នោះមក លោក «Kim Won-Hong» ទំនងជាមន្ត្រីជាន់​ខ្ពស់​​ដំបូង​គេ ដែល​មិន​រង​ការប្រហារ​ជីវិត ពី​សំណាក់​របបដឹកនាំ បន្ទាប់ពីលោក​ត្រូវ​បាន​ចោទប្រកាន់ និងដកចេញពីតំណែង។ លោក​ក៏ត្រូវបាន​គេ​ស្គាល់ដែរ ថាបាន​ដើរ​តួនាទី​​យ៉ាង​សំខាន់ នៅក្នុងការប្រហារជីវិត កាលពីខែធ្នូ ឆ្នាំ២០១៣​កន្លង​មក ទៅលើ​លោក ចាំ សុង-តឹក (Jang Song-taek) អតីត​ឧត្ដម​មន្ត្រី​ថ្នាក់ទី២ ដែលត្រូវជា​ឪពុកមា​​សាច់​ថ្លៃ (ភរិយា​របស់​អតីត​មន្ត្រីរូប​នេះ ត្រូវជាម្ដាយ​មីង​​បង្កើត) របស់លោក គីម ជុង-អ៊ុន។

ផ្ទុយទៅវិញ ការដកលោក «Kim Won-Hong» ចេញពីតំណែងនេះ មិនត្រូវបានប្រព័ន្ធផ្សព្វផ្សាយ របស់​ប្រទេស​កូរ៉េ​ខាង​ជើង អះអាង ឬប្រកាសឲ្យដឹងនោះទេ។ សូមបញ្ជាក់ដែរថា តាំងពីបានឡើង​​ស្នង​តំណែង​​ពីឪពុក នៅចុង​ឆ្នាំ​២០១១​នោះ​មក អគ្គមគ្គុទេស​វ័យក្មេង លោក គីម ជុង-អ៊ុន បានសម្រេច ឲ្យមានការ​ប្រហារជីវិត ទៅលើ​មន្ត្រី​ជាន់​ខ្ពស់​បំផុត របស់ប្រទេសកូរ៉េខាងជើង អស់​ចំនួន​៤នាក់​ហើយ ក្នុងនោះរាប់ទាំង​លោក ចាំង សុង-តឹក ម្នាក់​ផង៕