ភាពមមាញឹករបស់លោក ហ៊ុន សែន បង្ហាញពីប្រសិទ្ធិភាព នៃរដ្ឋាភិបាលរបស់លោកឬ? សម្រាប់លោក សួន សេរីរដ្ឋា គឺវាមិនដូច្នោះទេ។ លោក រដ្ឋា ដែលជា​ប្រធានគណបក្សអំណាចខ្មែរ បាន«បញ្ឆេះម៉ាស៊ីន» ហើយ​រោទ៍​តិចៗ​ថា៖ «ពេលនេះលោក ហ៊ុន សែន បានក្លាយទៅជាមនុស្ស ដែលមានសមត្ថភាពតែម្នាក់ (និង)​ដែល​លេចធ្លោ ក្នុងចំណោមមនុស្ស ដែលគ្មានសមត្ថភាព រាប់រយនាក់ នៃគណរដ្ឋមន្ត្រីរបស់គាត់»។

បន្ទាប់មក លោក សួន សេរីរដ្ឋា បាន«រោទ៍ម៉ាស៊ីន»ខ្លាំងៗថា៖ «បច្ចុប្បន្ននេះ សូម្បីតែរឿងតាស៊ីក្លូ រឿង​ម៉ូតូ​លក់​ពងមាន់អាំង រឿងបាយក្តាំងបាយកក និងរឿងផ្លុំកញ្ចែចរាចរណ៍ ព្រមទាំងរឿងកណ្តៀរពូនដី ខ្មូតស៊ីឈើ​ផ្សេង​ទៀត ក៏ទាល់តែដល់លោក ហ៊ុន សែន ដែរទើបដោះស្រាយចេញ។ ដូច្នោះហើយ បានជាពលរដ្ឋខ្មែរ ជន​រង​គ្រោះ​គ្រប់​គ្នា​ខំ​សម្រុក ធ្វើយ៉ាងណារកមធ្យោបាយបញ្ជូនរឿងឈឺចាប់ រឿងអយុត្តិធម៌របស់ខ្លួន ឲ្យបាន​ទៅ​ដល់​ដៃ របស់លោក ហ៊ុន សែន ជានាយករដ្ឋមន្ត្រី។»

ប្រធានគណបក្សអំណាចខ្មែរ បានបន្តបរិហារថា វិធីសាស្ត្រដើម្បីបញ្ជូនរឿងឈឺចាប់ របស់ពលរដ្ឋ ឲ្យដល់​ដៃ​នាយក​រដ្ឋមន្ត្រី​នោះ «បានធ្វើឲ្យទីផ្សារត់ការឯកសារ រត់ការសំណុំរឿង គឺឡើងថ្លៃត្រូវប៉ាន់ ចំពោះមន្ត្រី​ឡេម​ឡឺម អែបអប នៅជិតលោក ហ៊ុន សែន ដើម្បីទទួលផលកំរៃជើងសារនោះផង»។

គេមិនដឹងថា លោក សួនសេរីរដ្ឋា ចង់ចង្អុលទៅចំកន្លែងណាមួយ ឲ្យប្រាកដនោះទេ។ យ៉ាងណាក៏ដោយ ក៏ក្នុង​ពេល​កន្លងមក លោក ហ៊ុន សែន ធ្លាប់ប្រកាសថា លោកយក​ទំព័រហ្វេសប៊ុក​របស់លោក ដើម្បីជាកន្លែង​ដែល​ពលរដ្ឋ អាចមក​ថ្លាថ្លែង​ទុក្ខព្រួយ​របស់ពួកគេ ដោយផ្ទាល់​ជាមួយ​នឹងរូបលោក​បាន។ លោកនាយករដ្ឋមន្ត្រី ធ្លាប់​​បាន​អួតអាង​​ទៀតថា លោក​កំពុងដឹកនាំ​តាមបែប «E-Government»។

ប៉ុន្តែកាលពីប៉ុន្មានថ្ងៃមុន ពលរដ្ឋរងគ្រោះដោយបញ្ហាដីធ្លី បានព្យាយាមជួបលោក ហ៊ុន សែន ដើម្បីថ្លែងពី​ទុក្ខ​ព្រួយ​របស់​ពួកគេ នៅក្នុងដំណើររបស់លោកនាយករដ្ឋមន្ត្រី ទៅកាន់ខេត្តព្រះសីហនុ ប៉ុន្តែត្រូវបានអាក់ខាន ដោយ​ការ​រារាំង​ពី​សំណាក់​កម្លាំងអាជ្ញាធរ ដែលត្រូវបានដាក់ពង្រាយនៅទីនោះ យ៉ាងសន្ធឹកសន្ធាប់។ ក្រោយ​មក ថ្នាក់ដឹកនាំ​ខេត្តព្រះសីហនុ បានពន្យល់​ការអាក់ខាននោះ ដោយសារ​មូលហេតុ​សុខភាព របស់​លោក ហ៊ុន សែន។

លោក សួន សេរីរដ្ឋា ដែលជាអតីតប្រធានចលនាអំណាចពលរដ្ឋខ្មែរ ជាចលនាមួយដែលមានប្រភព ពី​សហរដ្ឋ​អាមេរិករូបនេះ បានពន្យល់បន្ថែម ដើម្បីបញ្ចប់សេចក្ដី«ការបញ្ឆេះម៉ាស៊ីន»របស់លោក ដូច្នេះថា៖ «នេះ​ជាភាព​លេចធ្លោ ខ្ពស់ត្រដែតរបស់លោក ហ៊ុន សែន ក្នុងឋានៈជានាយករដ្ឋមន្ត្រី ដែលក្លាយជាមនុស្ស​មាន​សមត្ថភាព​តែម្នាក់គត់ នៅក្នុងចំណោមសមាជិក​​គណរដ្ឋមន្ត្រី​រាប់រយនាក់ ដែលគ្មានសមត្ថភាព។ មនុស្ស​ខ្លាំង នៅ​ក្នុង​ចំណោម​អ្នកខ្សោយ អ្នកមានសមត្ថភាព នៅក្នុងចំណោម​អ្នកអត់សមត្ថភាព អ្នកពូកែ នៅក្នុង​ចំណោម​អ្នក​ល្ងង់ អ្នកខ្ពស់ជាងគេ នៅក្នុងចំណោមអ្នកទាប គឺជា នាយករដ្ឋមន្ត្រីស្រុកខ្ញុំ!»៕