គោរមងារ«សម្ដេច»៖ ក្រសួងព័ត៌មានបង្ខំ តែ ហ៊ុន សែន ថា«ទេ»
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី០៧ កក្កដា ២០១៦
- កែប្រែចុងក្រោយ: July 08, 2016
- ប្រធានបទ: គោរមងារ«សម្ដេច»
- អត្ថបទ: មានបញ្ហា?
- មតិ-យោបល់
-
តើករណីនេះ វាជាការសម្ដែងល្ខោនជាថ្មីទៀតឬ? ដោយម្នាក់ធ្វើជាតួកាច ខណៈម្នាក់ទៀតចេញមកតាមក្រោយ ធ្វើជាតួស្លូត ដើម្បីសង្គ្រោះអស់អ្នកសារព័ត៌មាន ដ៏កំសត់ទាំងឡាយ ពីការចាប់បង្ខំឲ្យសរសេរ ឬហៅ នៅក្នុងអត្ថបទព័ត៌មានរបស់ខ្លួន តាមគោរមងារ«សម្ដេច» របស់មេដឹកនាំឬ?
លោក ផៃ ស៊ីផាន អ្នកនាំពាក្យ និងជារដ្ឋលេខាធិការ ទីស្ដីការគណរដ្ឋមន្ត្រី បានសរសេរឲ្យដឹង នៅមុននេះបន្តិច នៅលើទំព័រហ្វេសប៊ុករបស់លោក ពីលទ្ធផលត្រួសៗ នៃកិច្ចប្រជុំគណៈរដ្ឋមន្ត្រី នាព្រឹកថ្ងៃទី៨ ខែកក្កដា ឆ្នាំ២០១៦នេះថា លោក ហ៊ុន សែន បានប្រកាសឲ្យ«ទាត់ចោល» នូវសេចក្តីណែនាំរបស់ក្រសួងព័ត៌មាន ស្តីពីការប្រើប្រាស់គោរមងារ«សម្តេច» ចុះថ្ងៃទី០៦ ខែកក្កដា ឆ្នាំ២០១៦។
កាលពីថ្ងៃទី៦ ខែកក្កដា ក្រសួងព័ត៌មានកម្ពុជា បានចេញសេចក្ដីព្រមានជាថ្មី និងជាលើកចុងក្រោយ បន្ទាប់ពីសេចក្ដីព្រមានម្ដងជាពីរដង ឲ្យស្ថាប័នសារព័ត៌មានទាំងឡាយ អនុវត្តតាមការបង្ខំរបស់ក្រសួង ថាត្រូវសរសេរ និងហៅតាមគោរមងារ «សម្ដេច» នៅក្នុងអត្ថបទព័ត៌មាន ឬសេចក្ដីរាយការណ៍របស់ពួកគេ ចំពោះមេដឹកនាំធំៗ ដែលត្រូវបានព្រះមហាក្សត្រ ព្រះរាជទានតែងតាំង។
សេចក្ដីព្រមាននោះ បានបញ្ជាក់ទៀតថា នៅក្នុងខែកក្កដានេះ ក្រសួងព័ត៌មាននឹងបិទមិនឲ្យផ្សាយ ចំពោះអង្គភាពសារព័ត៌មានណា ដែលមិនប្រើគោរមងារ «សម្ដេច»។
រហូតមកដល់ថ្ងៃនេះ ស្ថាប័នដែលមិនប្រើគោរមងារ «សម្ដេច» រួមមានវិទ្យុបរទេស ផ្សាយជាខេមរភាសានៅកម្ពុជា កាសែតភ្នំពេញប៉ុស្តិ៍ (Phnom Penh Post) កាសែតខ្មែរថែមស៍ (Khmer Times) និងព្រឹត្តិបត្រ ឌឹខេមបូឌាដេលី (The Cambodia Daily) ដោយមិនភ្លេចផងទេ ពីទស្សនាវដ្ដីចេញផ្សាយ តាមបណ្ដាញអ៊ិនធឺណែត មនោរម្យ.អាំងហ្វូ ខ្លួនឯងនេះផង។
បើទោះជាគ្មានច្បាប់ ឬក្រមវិជ្ជាជីវៈ ចែងពីការកំណត់ឲ្យអ្នកសារព័ត៌មាន ត្រូវសរសេរ ឬហៅអស់លោក«ធំៗ»ទាំងនោះ ទៅតាមគោរមងារជា«សម្ដេច» នោះក៏ដោយ តែសម្រាប់ក្រសួងព័ត៌មាន បានពន្យល់ថា ប្រទេសកម្ពុជាមានព្រះមហាក្សត្រ ដែលឡាយព្រះហស្តលេខា ឲ្យប្រើរដ្ឋធម្មនុញ្ញ ច្បាប់នានា និងព្រះរាជក្រឹត្យ តាមសេចក្ដីស្នើសុំរបស់គណៈរដ្ឋមន្ត្រី។ ដូច្នេះ ការប្រើគោរមងារ «សម្ដេច» គឺអនុវត្តតាមព្រះរាជក្រឹត្យតែងតាំង។
តើបើនៅក្នុងពេលនេះ លោក ហ៊ុន សែន បានប្រកាសទាត់ចោល ពីការអះអាងខាងលើនេះទៅវិញ មិនដូចជាបានសេចក្ដីថា ការពន្យល់របស់ក្រសួងព័ត៌មាន ទាក់ទងនឹងព្រះរាជតួនាទី របស់ព្រះមហាក្សត្រ នៅក្នុងលិខិតព្រមាននោះ គ្រាន់តែជា«លេស» ឬជាការ«លេងសើច»ទេឬយ៉ាងណា?
យ៉ាងណា ការសម្រេចចិត្តរបស់លោក ហ៊ុន សែន ត្រូវបានអ្នកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា សម្ដែងការសាទរ និងបានហៅករណីនេះ ថាជាការសម្រេចចិត្តមួយ ដ៏ត្រឹមត្រូវ។ អ្នកស្រីបានសរសេរ នៅលើគណនីហ្វេសប៊ុករបស់អ្នកស្រីថា៖ «ការគោរពមិនស្តែងត្រឹមតែតាមរយៈគោរមងារនោះទេ តែតាមសកម្មភាព សម្មាវាចា (...) ខ្ញុំយល់ថា កិច្ចការមួយចំនួន តួយ៉ាងដូចជាការដាក់លិខិតជាផ្លូវការជាដើម យើងត្រូវដើរតាមនីតិវិធីបែបបទរដ្ឋបាល ប៉ុន្តែបើគ្រាន់តែជាការរាយការណ៍ព័ត៌មាន ឬភាសានិយាយនោះ វាមិនចាំបាច់ ហើយក៏មិនចាំបាច់ រហូតដល់ត្រូវចេញបង្គាប់ ឬពិន័យដោយសារ ការមិនប្រើគោរមងារនោះដែរ»៕