ក្រុមប្រឹក្សសន្តិសុខនៃអ.ស.ប. ថ្កោលទោស​ការ​សាកល្បង​នុយក្លេអ៊ែរ​របស់​ព្យុងយ៉ាង

ក្រុមប្រឹក្សាសន្តិសុខ នៃអង្គការសហប្រជាជាតិ បានថ្កោលទោស យ៉ាងដាច់អហង្កា ទៅលើការសាកល្បងជាថ្មីទៀត របស់ប្រទេសកូរ៉េខាងជើង ហើយបានប្រកាសថា នឹងចេញនូវ«វិធានការសមស្រប» តាមរយះដំណោះស្រាយ​ថ្មីមួយ​ទៀត។ សេចក្ដីប្រកាសរបស់ក្រុមប្រឹក្សាសន្តិសុខ ដែលអានដោយលោក គីម ស៊ុងហ្វាន (Kim Sung-hwan) រដ្ឋមន្ត្រី​ក្រសួងការបរទេស នៃ​ប្រទេសកូរ៉េខាងត្បូង ប្រទេស«ប្រធានផ្លាស់វេន» នៃក្រុមប្រឹក្សាសន្តិសុខ នៅខែកុម្ភះនេះ បាន​កំណត់ថា ការសាកល្បង​អាវុធកាលពីព្រឹកថ្ងៃដដែលនេះ របស់ទីក្រុងព្យុងយ៉ាង ជាការគម្រាមទៅដល់«សន្តិភាព និង​សុវត្ថិភាពអន្តរជាតិ» និងបាន​រំលោភយ៉ាងធ្ងន់ធ្ងរទៅលើ «ដំណោះស្រាយ» របស់អ.ស.ប ដែលដាក់លើកូរ៉េខាងជើង​កន្លងមក។
Loading...
  • ដោយ: កេសរ កូល
  • កែប្រែចុងក្រោយ: February 13, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ទីក្រុងព្យុងយ៉ាង បានសាកល្បងអាវុធនុយក្លេអ៊ែរជាថ្មីទៀត កាលពីថ្ងៃអង្គារទី១២ខែកុម្ភះ ជាលើកទីបី នៅក្នុងប្រវត្តិសាស្ត្រ​របស់ខ្លួន។ សកម្មភាព ដែលបង្កអោយមានប្រតិកម្មតបតរយ៉ាងខ្លាំង ពីសហគមអន្តរជាតិ។


កិច្ចប្រជុំបន្ទាន់នៃក្រុមប្រឹក្សាសន្តិសុខ របស់អង្គការសហប្រជាជាតិ នាទីក្រុងញ៉ូយក។

ក្រុមប្រឹក្សាសន្តិសុខ នៃអង្គការសហប្រជាជាតិ បានថ្កោលទោស យ៉ាងដាច់អហង្កា ទៅលើការសាកល្បងជាថ្មីទៀត របស់ប្រទេសកូរ៉េខាងជើង ហើយបានប្រកាសថា នឹងចេញនូវ«វិធានការសមស្រប» តាមរយះដំណោះស្រាយ​ថ្មីមួយ​ទៀត។ សេចក្ដីប្រកាសរបស់ក្រុមប្រឹក្សាសន្តិសុខ ដែលអានដោយលោក គីម ស៊ុងហ្វាន (Kim Sung-hwan) រដ្ឋមន្ត្រី​ក្រសួង​ការបរទេស នៃ​ប្រទេសកូរ៉េខាងត្បូង ប្រទេស«ប្រធានផ្លាស់វេន» នៃក្រុមប្រឹក្សាសន្តិសុខ នៅខែកុម្ភះនេះ បាន​កំណត់ថា ការសាកល្បង​អាវុធកាលពីព្រឹកថ្ងៃដដែលនេះ របស់ទីក្រុងព្យុងយ៉ាង ជាការគម្រាមទៅដល់«សន្តិភាព និង​សុវត្ថិភាព​អន្តរជាតិ» និងបាន​រំលោភយ៉ាងធ្ងន់ធ្ងរទៅលើ «ដំណោះស្រាយ» របស់អ.ស.ប ដែលដាក់លើកូរ៉េខាងជើង​កន្លងមក។

«សមាជិករបស់ ក្រុមប្រឹក្សាសន្តិសុខ បានចាប់ផ្ដើមធ្វើការជាបន្ទាន់ ទៅលើវិធានការសមស្រប នៅក្នុងក្របខ័ណ្ឌ​នៃ​ដំណោះស្រាយ» ជាការបន្ថែមសេចក្ដី ចែងនៅក្នុងសេចក្ដីប្រកាស ដែលបានសម្រេចធ្វើ នៅក្រោយកិច្ចប្រជុំបិតទ្វា ជា​បន្ទាន់នៅព្រឹកថ្ងៃអង្គារ នាទីក្រុងញ៉ូយក។ តែអត្ថបទមិនបានបញ្ជាក់ពី វិធានការណាមួយ ដែលនឹងត្រូវជ្រើសរើស យក​មកប្រើនោះទេ។

ជាអពើ «បង្កហេតុ» សម្រាប់ប្រធានាធិបតីអាមេរិក អូបាមា

ការសាកល្បង ដែលត្រូវបានរកឃើញ កាលពីថ្ងៃអង្គារ បានធ្វើអោយរង្គើរ នៅក្នុងមាត្រាដ្ឋានរីចស្ទើ កម្រិត៥.០ ទល់នឹង​៤,២ នៃការសាកល្បងក្នុងឆ្នាំ២០០៩ របស់ប្រទេសកូរ៉េខាងជើង។ នេះបើតាមរបាយការណ៍​ របស់ភ្នាក់ងារត្រួតពិនិត្យ ការសាកល្បងនុយក្លេអ៊ែរ ដែលមានទីស្នាក់ការនៅទីក្រុងវីយ៉េន (Vienne) ក្នុងប្រទេសអូទ្រីស។

ប្រធានាធិបតីអាមេរិក លោក បារ៉ាក់ អូបាម៉ា (Barack Obama)បានបរិហាពីអំពើ«បង្កហេតុ»មួយ ហើយបានអំពាវនាវ​អោយមាន ការ​ឆ្លើយតបជាអន្តរជាតិ យ៉ាងឆាប់រហ័ស និងមានអត្ថន័យ ពីសំណាក់សហគមអន្តរជាតិ។ «ប្រទេសកូរ៉េ​ខាងជើង ជាការ​គម្រាមពិតប្រាកដមួយ មកលើសហរដ្ឋអាមេរិក។ ដូច្នេះយើងត្រូវត្រៀមខ្លួន បំរុងទុកជាមុន។» នេះជា​ការ​បន្ថែមរបស់​លោក ឡេអុង ប៉ាណេតា (Leon Panetta) រដ្ឋលេខាធិការនៃ ក្រសួងការពារជាតិអាមេរិក។

នៅទ្វីបអាស៊ី ប្រទេសជប៉ុន និងកូរ៉េខាងត្បូង បានធ្វើការរិះគន់ យ៉ាងចាស់ដៃដូចគ្នា ទៅលើអំពើររបស់ប្រទេសកូរ៉េ​ខាងជើង​នេះ។

ចំណែកឯរដ្ឋមន្ត្រីក្រសួងការបរទេស នៃប្រទេសចិន ក៏បានបញ្ចេញប្រតិកម្មយ៉ាងមុតមាំដែរ នូវការ«ប្រឆាំង»របស់ខ្លួន ទល់នឹងកាយវិការរបស់ទីក្រុងព្យុងយ៉ាង។ តែចិនមិនបានប្រើពាក្យ «ថ្កោលទោស» នៅក្នុងសេចក្ដីថ្លែងការណ៍នោះទេ។ ទីក្រុងប៉េកាំង ដែលជាសម្ព័ន្ធមិត្តតែមួយគត់របស់កូរ៉េខាងជើង ធ្លាប់បានស្នើសុំអោយប្រទេសនេះ កុំធ្វើការសាកល្បង​អាវុធនុយក្លេអ៊ែរ ជាលើកទីបីទៀត។ អ្នកការទូតម្នាក់នៅអ.ស.ប. សុំមិនបញ្ចេញឈ្មោះ បានបង្ហើបថា កាយវិការរបស់​ប្រទេសកុម្មុយនីសកូរ៉េខាងជើង បង្កជាចំណោទច្បាស់ក្រលែតមួយ ដាក់អោយប្រទេសចិនធ្វើការដោះស្រាយ។ រីឯ​ប្រទេសអៀរ៉ង់ ដែលធ្លាប់តែរងការរិះគន់ ថាខិតខំស្រាវជ្រាវផលិតអាវុធប្រល័យលោកដែរនោះ ក៏បានបញ្ចេញប្រតិកម្ម​ ពីការ«មិនយល់ព្រម»របស់ខ្លួន ជាមួយទីក្រុងព្យុងយ៉ាង ដោយបញ្ជាក់ថា គ្មានប្រទេសណាមួយ ត្រូវមាន​អាវុធអាតូមិក​បែបនេះទេ។

កម្រិតផ្ទុះ រវាងពី៦ទៅ៧គីឡូតោន

ក្រសួងការពារជាតិ នៃប្រទេសកូរ៉េខាងត្បូង បានរកឃើញពីកម្រិតបំផ្ទុះ គ្រាប់បែក ធ្វើការសាកល្បងកាលពីថ្ងៃអង្គារ ថាមានកម្លាំង រវាងពី៦ទៅ៧គីឡូតោន ដែលកាលពីការសាកល្បងលើកទីមួយរបស់ខ្លួននាឆ្នាំ២០០៦ កូរ៉េខាងជើងធ្វើ​បានត្រឹមតែ១គីឡូតោន និងលើកទីពីរបានតែ ២ទៅ៦គីឡូតោនប៉ុណ្ណោះ។  ការិយាល័យនៃនាយកដ្ឋានព័ត៌មានជាតិ​អាមេរិកាំង (ODNI) ក៏បានបញ្ជាក់ ពីកម្រិតបំផ្ទុះនៃការសាកល្បងនេះ ថាមានជាច្រើនគីឡូតោនដែរ។

សូមរំលឹកថា គ្រាប់បែបប៉ារម៉ាណូ ដែលសហរដ្ឋអាមេរិក បានទម្លាក់ទៅលើទីក្រុងហ៊ីរ៉ូស៊ីម៉ា ប្រទេសជប៉ុន ក្នុងសង្គ្រាម​លោកលើកទី២ មានកម្រិត១៥គីឡូតោន។ ដូច្នេះ អ្វីដែលកូរ៉េខាងជើងសម្រេចបានក្នុងថ្ងៃនេះ អ្នកបច្ចេកទេសកំពុងតែ​បារម្ភថា ប្រទេសនេះបានធ្វើអោយសម្រេចរួចហើយ នូវបច្ចេកវិទ្យាផលិតអាវុធប្រល័យលោក ដ៏រង្គាលមួយនោះ៕

------------------------------------------------
ដោយ ៖ កេសរកូល - ភ្នំពេញ ថ្ងៃទី១៣ ខែកុម្ភះ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...