នគរបាលសហព័ន្ធនៃសហរដ្ឋអាមេរិក អេហ្វប៊ីអាយ (FBI) បានចេញផ្សាយរូបថតនិងវីដេអូ ដើម្បីស្វែងជនសង្ស័យពីរនាក់ ដែលបានចូលរួមបង្កភេវរកម្ម បំផ្ទុះគ្រាប់បែកទាំងពីរគ្រាប់ នៅទីក្រុងប៊ូស្តុនជិត​ទីផ្ដាច់ព្រ័ត្រនៃកីឡារត់ម៉ារ៉ាតុន កាលពី​រសៀលថ្ងៃច័ន្ទទី១៥ខែមេសា។

រូបថតជនសង្ស័យទាំងពីរ បង្ហាញដោយអេហ្វប៊ីអាយ។

អេហ្វប៊ីអាយ ទទួលបានរូបភាព និងវីដេអូទាំងនេះ ពីហាងលក់ទំនិញ ដែលមានទីតាំងនៅក្បែរកន្លែងកើតហេតុ។  ក្រុមអ្នក​ស៊ើបអង្កេត បានគិតថា ជនម្នាក់ពីចំណោមជនសង្ស័យទាំងពីរ បានដាក់គ្រាប់បែកនៅក្បែរទីផ្ដាច់ព្រ័ត្រ។ ភ្នាក់ងារទទួល​ខុសត្រូវខាងការស៊ើបអង្កេត លោករីឆារ ដេសឡូរីយ៉េ (Richard DesLauriers) បានបញ្ជាក់ថា មុខសញ្ញាទាំងពីរ ប្រដាប់​ដោយអាវុធ និងមានគ្រោះថ្នាក់ជាទីបំផុត ហើយបានប្រាប់អោយបណ្ដាជន កុំអោយទៅក្បែរ។

គេអាចរកមើលរូបភាព និងវីដេអូនេះបាន នៅលើគេហទំព័ររបស់ អេហ្វប៊ីអាយ តែនៅពេលដាក់ផ្សាយក្នុងម៉ោង​ដំបូងភ្លាម គេហទំព័រនេះ មិនមានដំណើរការល្អទេ។ ការផ្សព្វផ្សាយជាសាធារណៈនេះ ត្រូវបានធ្វើឡើង នៅបន្ទាប់ពី​ដំណើរទៅចូលរួម ក្នុងពិធីសាសនាមួយ របស់ប្រធានាធិបតីអាមេរិក លោកបារ៉ាក់ អូបាម៉ា (Barack Obama) និងភរិយា ក្នុងទីក្រុងប៊ូស្តុន ដើម្បី​ឧទ្ទិសទៅអោយ​ជនរងគ្រោះ ក្នុងអំពើភេវរកម្មនោះ។

ហេតុអីបានជាជនទាំងពីរ ត្រូវបានអ្នកស៊ើបអង្កេតសង្ស័យ?

គុណភាពរបស់រូបភាព មិនអនុញ្ញាតអោយគេមើលឃើញច្បាស់ ពីមុខរបស់ជនសង្ស័យទាំងពីរនាក់នេះ បានដោយ​ស្រួល​នោះឡើយ។ នៅក្នុងវីដេអូ ជនទាំងពីរដើរធម្មតា ម្នាក់ពាក់មួកពណ៌ខ្មៅ និងវែនតាការពារពន្លឺ រីឯម្នាក់ទៀតពាក់មួក​ពណ៌​សរបែរទៅក្រោយ ធ្វើអោយគេអាចមើលមុខបានច្បាស់ជាង។ គេទាំងពីរនាក់នេះ ស្ពាយនៅនឹងខ្នង នូវកាបូបម្នាក់មួយ។

អេហ្វប៊ីអាយ ចង់ប្រើពាក្យ«ជនមានគំនួច» ដើម្បីហៅជនទាំងពីរនេះ តែសម្រាប់សាធារណជន ពាក្យថា «ជនសង្ស័យ» មានន័យច្បាស់ជាង។ នៅក្នុងវីដេអូមួយទៀត ដែលអេហ្វប៊ីអាយមិនបានផ្សាយជាសាធារណៈនោះ ជនសង្ស័យទីពីរ​ត្រូវ​បាន​ឃើញថា បានដាក់កាបូបរបស់ខ្លួន នៅចំចំនុចផ្ទុះគ្រាប់ទីពីរ តែប៉ុន្មាននាទីប៉ុណ្ណោះ មុននឹងគ្រាប់បែកបានផ្ទុះឡើង។ ចំនុច​មួយទៀត ដែលគួរអោយគេសង្ស័យដែរ គឺជនទាំងពីរទំនងជាដើរ ទៅណាមកណាជាមួយគ្នា តែទុកគម្លាតប្រមាណ​ជាពីរ​ម៉ែត្រពីគ្នាប៉ុណ្ណោះ។

សូមទស្សនាវីដេអូ ផ្សាយដោយអេហ្វប៊ីអាយ ដូចតទៅ៖

អេហ្វប៊ីអាយ ចង់និយាយជាមួយជនសង្ស័យទាំងពីរ

កាលពីព្រឹកថ្ងៃព្រហស្បត្តិ៍ទី១៨ខែមេសា រដ្ឋមន្ត្រីសន្តិសុខជាតិអាមេរិក លោកស្រី ចាណែត ណាប៉ូលីតាណូ (Janet Napolitano) បានអោយដឹងថា អេហ្វប៊ីអាយ ចង់និយាយជាមួយនឹងជនសង្ស័យទាំងពីរ ប៉ុន្តែលោកស្រីបានបដិសេធ មិន​បង្ហាញពីអត្តសញ្ញាណរបស់ជនទាំងនេះទេ។ លោកស្រីបានបញ្ជាក់ថា អាជ្ញាធរនៅមិនទាន់ដឹងថា គ្រាប់បែកទាំងពីរ​គ្រាប់ ជាស្នាដៃរបស់ភេវរជនក្នុងស្រុក ឬមកពីក្រៅប្រទេសនោះនៅឡើយ។

សូមបញ្ជាក់ថា អំពើភេវរកម្មបំផ្ទុះគ្រាប់បែកនេះ បានធ្វើ​អោយមនុស្ស៣នាក់ស្លាប់ និងជាង១៨០នាក់រងរបួស ក្នុងនោះ​១៧​នាក់របួសធ្ងន់៕

-----------------------------------------------------------------
ដោយ សេក មនោរកុមារ - ប៉ារីស​ ថ្ងៃទី១៩ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ