កម្ពុជា​បង្គុំ​លា​ជា​ចុង​ក្រោយ «សម្ដេច​ឪ»​អតីត​ព្រះរាជា​របស់​ខ្លួន

នៅថ្ងៃសុក្រទី១ខែកុម្ភះនេះ ប្រទេសកម្ពុជាបានប្រារព្ធ ព្រះរាជពិធី​ដង្ហែរ​ព្រះ​បរម​សព និង​ថ្វាយ​ព្រះ​ភ្លើង​ព្រះ​បរម​​រតន​​កោដ្ឋយ៉ាង​ធំ​មួយ សម្រាប់​«ថ្វាយ​បង្គុំ​លា» អតីតព្រះមហាក្សត្រ សម្ដេចព្រះនរោត្ដម សីហនុ ដែល​ទ្រង់​បាន​ចូល​ទីវង្គត់ នៅថ្ងៃទី​១៥ខែតុលាឆ្នាំ២០១២កន្លងទៅ ដោយរោគាពាធ នៅរដ្ឋធានី​ប៉េកាំង​ប្រទេស​ចិន។
កម្ពុជា​បង្គុំ​លា​ជា​ចុង​ក្រោយ «សម្ដេច​ឪ»​អតីត​ព្រះរាជា​របស់​ខ្លួន
ព្រះមេរុ ដែលត្រូវបានសាងសង់ ដើម្បីតំកល់ព្រះបរមសព។ (រូបថត MONOROOM.info Photo/ O.Vary)
Loading...
  • ដោយ: កេសរ កូល ([email protected]) - ភ្នំពេញ ថ្ងៃទី០១ កុម្ភះ ២០១៣
  • កែប្រែចុងក្រោយ: February 01, 2013
  • ប្រធានបទ: ស្ដេច​សោយទីវង្គត់
  • អត្ថបទ: មានបញ្ហា?
  • មតិ-យោបល់

ព្រះបរមសព ដាក់ក្នុងព្រះមឈូសារ បានចាកចេញពីព្រះបរមរាជវាំង នៅម៉ោងប្រមាណជា ០៨ព្រឹក ម៉ោង​នៅ​រាជធានី​​ភ្នំពេ ញ ហើយបានដង្ហែរឆ្ពោះ ទៅកាន់​រមណីយដ្ឋាន​ប្រវត្តិសាស្ត្រ «វត្តភ្នំ» មុននឹងកាត់តាម​មហាវិថី​ព្រះ​នរោត្តម មកព័ទ្ធ​ជុំវិញវិមានឯករាជ្យ ហើយបានបញ្ចប់នៅវាលព្រះមេរុ ប្រមាណ​ជាម៉ោង១រសៀល។ នៅ​តាម​ចំនុច​សំខាន់​មួយចំនួន ដូច​ជាពេលចេញពីព្រះរាជវាំង មកដល់មុខវត្តឧណ្ណលោម នៅក្នុងបរិវេណវត្តភ្នំ និង​មក​ដល់​វិមាន​ឯករាជ្យ​ជាដើម ក្បួនដង្ហែ​របស់ព្រះមឈូសារ បានទទួលការសូត្រមន្ត​​បង្សុកូលប្រោះព្រំ របស់​ព្រះ​សង្ឃ​ជា​ច្រើន​អង្គនៅទីនោះ។

ព្រះរាជពិធីនេះ មានការចូលរួម ពីថ្នាក់ដឹកនាំប្រទេស ដូចជាលោកហ៊ុនសែន នាយករដ្ឋមន្ត្រី លោកហេង សំរិន ប្រធានរដ្ឋាសភាជាដើម រួមជាមួយ​មន្ត្រីរាជការ​ជាច្រើន​ពាន់​នាក់ រៀបតាមលំដាប់ផែន ជិះយាន្ដនិងដើរអម ពី​មុខ​និង​ពីក្រោយ រាជរថដែលតំកល់​ព្រះមឈូសារ។

» អានអត្ថបទផ្សាយបន្តផ្ទាល់ ពីព្រះរាជដង្ហែនេះ ក្នុងអត្ថបទមុនរបស់ទស្សនាវដ្ដីមនោរម្យ,អាំងហ្វូ

ជូតទឹកព្រះនេត្រជាញ៉យដង ដោយទ្រង់ព្រះកន្សែង​ដ៏សោកសៅនោះ សម្ដេចម៉ែ មុនីនាថ សីហនុ ទ្រង់បាន​យាង​ដើរ​ដោយ​ព្រះបាតទា ទទេរ ជាមួយនឹងព្រះហស្ថទាំងគូរដាក់ប្រណម្យ ទៅចូលជាមួយនឹងព្រះរាជពិធីវិញ នៅ​ពេលក្បួនដង្ហែនេះ បានត្រឡប់មកដល់​មុខព្រះបរមរាជវាំង។ នៅក្បែរ​នឹងសម្ដេចម៉ែ «ស្ដេចកូន»​ដែល​ជា​ស្ដេច​ផែនដី នៃព្រះរាជាណាចក្រ ទ្រង់ក៏យាងទៅជាមួយ ដោយព្រះបាតទា ទទេរដូចគ្នា ប្រកប​ដោយ​ព្រះភ័ក្ដ​​ស្រពាប់​ស្រពោន ឆ្ពោះទៅកាន់វាលព្រះមេរុ ដែល​មានការរៀបចំសាងសង់ យ៉ាងពិសេសសម្រាប់​ព្រះរាជ​ពិធី​តំកល់ និងថ្វាយភ្លើង។

តាំងពីព្រហាម ព្រះអាទិត្យមិនទាន់រះ ប្រជាជនប្រុសស្រីជាច្រើនពាន់នាក់ ខ្លះសម្រុកលើកគ្នា ពីតាមបណ្ដាខេត្ត​ជុំវិញ​ផង ជាមួយនឹងសម្លៀក​បំពាក់សខ្មៅ បានធ្វើដំណើរមកកាន់ទីកន្លែង ដែលពួកគេយល់ថា អាច​បោះ​ទីតាំង​បាន ដើម្បីរងចាំ​ទទួល​នូវការយាង​មកដល់​ជាចុងក្រោយ នៃព្រះរាជវត្តមាន​នៃអង្គ​សម្ដេចឪ​របស់ពួកគាត់។

នៅថ្ងៃនេះ រាជធានីភ្នំពេញ ត្រូវ​បានគេរៀបចំ ដើម្បីត្រៀមទទួលបណ្ដាជន យ៉ាងហោចណាស់ពីរលាននាក់ ពី​គ្រប់​ទិសទី ដែលបានមកឈរ​នៅតាម​ដង​វិថីនានា រងចាំទទួល​ព្រះរាជព្រះទីនាំង ដែលមានដាក់តំកល់​ព្រះ​មឈូសារ​ពីលើ។ ពួកគាត់បានកំណត់​រួចជាស្រេច​​នៅ​ក្នុងចិត្ត ថានេះជាឱកាស​ចុង​ក្រោយ​បង្អស់ ដែល​ពួក​គាត់​អាចជួប​អតីតព្រះមហាក្សត្រ ជាទីសក្ការ បើទោះជាព្រះអង្គទ្រង់​បានយាងទៅកាន់ សុគតិភព​ផុតបាត់​ទៅ​ហើយ នោះក៏ដោយ។

ទ្រង់បានសោយទីវង្គត់នៅរដ្ឋធានី​ប៉េកាំង នៅថ្ងៃទី១៥ខែតុលា ឆ្នាំ២០១២ វេលាម៉ោង០១ម៉២០នាទី កណ្ដាល​អាធ្រាត ដោយរោគបេះដូង ហើយព្រះបរមសពត្រូវបាន មហេសីរបស់ព្រះអង្គ សម្ដេចម៉ែ មុនីនាថ សីហនុ អម​ព្រះរាជដំណើរ ដោយ​ស្ដេចកូន​ព្រះមហាក្សត្រ ព្រះបាទនរោត្ដម សីហមុនី និងកូនចិញ្ចឹមរបស់ព្រះអង្គ លោក​នាយក​រដ្ឋមន្ត្រី ហ៊ុន សែន យាង​ត្រឡប់មកកាន់ ព្រះរាជាណាចក្រ​មាតុភូមិវិញ នៅរសៀលថ្ងៃទី១៧ ខែតុលា ឆ្នាំ២០១២

មេដឹកនាំ​នៅ​បស្ចឹមលោក​អវត្តមាន...

ព្រះបរមសពត្រូវបានតំកល់ រក្សាទុកសម្រាប់​​រយះពេល​យ៉ាងហោច​ណាស់​បីខែ នៅក្នុងព្រះបរម​រាជវាំង ដែល​ទំនៀមទំលាប់នេះ ធ្លាប់បានធ្វើ កាល​ពី​ពេល​ព្រះវរបីតា​របស់ព្រះអង្គ ព្រះបាទនរោត្ដម សុរាម្រិត ទ្រង់​សោយ​ទីវង្គត់​​នៅ​ឆ្នាំ១៩៦០។ ការថែរក្សារូបរាងព្រះបរមសព​របស់ទ្រង់ ត្រូវបាន​អ្នកជំនាញកម្ពុជា និងចិន ប្រើប្រាស់​មធ្យោបាយ​ប្រហាក់ប្រហែល នឹងការថែរក្សារ​​សាកសព​របស់លោក ម៉ៅ សេទុង ដែល​ធ្វើ​មរណភាព​ កាល​ពី​ឆ្នាំ​១៩៧៦​​កន្លងទៅ ហើយរហូតមកទល់សព្វថ្ងៃ សាកសពនេះ​នៅតែមាន រូបរាង​ដូច​ដើមនៅឡើយ។

សូមបញ្ជាក់ថា ព្រះរាជពិធី ថ្វាយព្រះភ្លើងព្រះបរមរតនកោដ្ឋ នឹងធ្វើនៅថ្ងៃទី០៤ខែកុម្ភះខាងមុខ ដោយ​មាន​វត្តមាន​​ពី​សំណាក់មេដឹកនាំ ក្នុងតំបន់ជាច្រើន ខណៈមានតែនាយករដ្ឋមន្ត្រីបារាំង លោកហ្សង់-ម៉ាក អៃរ៉ូល (Jean-Marc Ayrault) ជា​មេដឹកនាំនៃ «បស្ចឹមលោក»​តែ​ម្នាក់​គត់ ដែលនឹងធ្វើដំណើរ មកចូលរួមក្នុង​ព្រះរាជ​ពិធី​នេះ។

ការចាកចេញ ដែលធ្វើឲ្យរាជានិយម នៅកម្ពុជា ចុះខ្សោយ...

ការសោយទីវង្គត់ របស់ព្រះបាទ នរោត្ដម សីហនុ អាចនឹងធ្វើអោយរាជានិយមនៅកម្ពុជា ធ្លាក់ចុះខ្សោយ ក្នុង​ខណៈ​ដែលរដ្ឋធម្មនុញ្ញរបស់ប្រទេស មិនអនុញ្ញាតអោយរាជានិយម មានអំណាចស្រាប់នោះ។ អ្នកវិភាគ​ប្រចាំ​តំបន់ បានមើល​ឃើញថានាយករដ្ឋមន្ត្រីលោក ហ៊ុន សែន ជាបុរសខ្លាំង​តែម្នាក់​គត់ នៅក្នុង​ព្រះរាជា​ណា​ចក្រ​នេះ ហើយលោកបានគ្រប់គ្រង​ប្រទេស ដោយប្រើកណ្ដាប់ដៃដែក តាំងពីជិត៣០ឆ្នាំមកហើយ។ យ៉ាងណាក៏ដោយ ក៏នៅ​ពេល​ទៅ​យាង ព្រះបរមសព​​​របស់​អតីត​ព្រះមហាក្សត្រ ពីរដ្ឋធានី​ប៉េកាំង លោក ហ៊ុន សែន បានស្បថ នឹងការពារ​«របប​រាជានិយម» និងព្រះញាតិវង្ស នៅចំពោះ​ព្រះបរមសព និងអ្នកមាន​វត្តមាន​នៅទីនោះ​ផ្សេងទៀត។

លោក ដាវិដ ឆេដល័រ (David Chandler) ប្រវត្តិវិទូ​ជំនាញ​ខាង​ប្រទេស​កម្ពុជា បានលើកឡើងថា «ព្រះរាជា សីហមុនី មិនមានព្រះរាជបុត្រស្នងរាជ្យទេ។ រីឯ​គណបក្ស​រាជានិយម ក៏កំពុងតែបែកខ្ញែក​គ្នា​ដែរ។ ប្រជា​រាស្ត្រ​ជាន់ទាប ស្រឡាញ់អតីតព្រះមហាក្សត្រ សីហនុ ណាស់ (...) ខ្ញុំគិតថា មនុស្សជំនាន់មុន ចង់បាន​អោយ​មាន​ស្ដេច។ តែ​លោក​ហ៊ុន សែន និងក្មេងស្រករក្រោយ ដូចជាមិនខ្វល់នឹងរឿងនេះទេ៕»

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...