ហេតុការណ៍នេះ បានកើតឡើង កាលពីវេលាម៉ោង១៣ និង ៣០នាទី រសៀលថ្ងៃទី០៨ ខែតុលា ឆ្នាំ២០១៥ នៅចំណុចផ្សារ នគរាជទី២ ស្ថិតក្នុងភូមិព្រៃព្រីងខាងជើង សង្កាត់ចោមចៅ ខណ្ឌពោសែនជ័យរាជធានី​ភ្នំពេញ។ បុរសជាជនសង្ស័យ ត្រូវបានគេស្គាល់ថាឈ្មោះ ចេង សុជា មានមុខរបរមិនពិតប្រាកដ។

បច្ចុប្បន្ន ជនសង្ស័យ ស្នាក់នៅផ្ទះជួល ភូមិឬស្សី សង្កាត់ស្ទឹងមានជ័យ ខណ្ឌមានជ័យរាជធានីភ្នំពេញ។ មុន​ពេលកើតហេតុ សាក្សីបានឲ្យដឹងថា បុរសអាយុ៤០ឆ្នាំរូបនេះ ជិះម៉ូតូធុនគុបពណ៍ស្លែ នៅតាមផ្លូវលំចូលភូមិ រួចចុះមកលួងលោមក្មេងស្រី ឈ្មោះ អ.ក.ស អាយុ៣ឆ្នាំ។ អ្នកស្រី លឹម ហ៊ុននី វ័យ៣៥ឆ្នាំ ជាអ្នកលក់កាហ្វេ ប្រាប់ឲ្យដឹងថា មុនពេលកើតហេតុ កូនស្រីរបស់គាត់ កំពុងអង្គុយលេង នៅក្រោយផ្ទះ ស្រាប់តែជនសង្ស័យ បានមកដល់ ហើយធ្វើសកម្មភាព លួងលោមដោយឲ្យស្ករគ្រាប់ ទៅនាងញ៉ាំ។

ម្តាយក្មេងស្រីរងគ្រោះបញ្ជាក់បន្ថែមថា កូនអ្នកស្រីមានគ្រឿងប្រើប្រាស់ ជា (ក្រវឹល) ប្រមាណ៥ហ៊ុន ដែល​ជាមាសសុទ្ធ។ អ្នកស្រីបានឲ្យដឹងទៀតថា កូនស្រីអាយុ៣ឆ្នាំនិយាយថា ភ្លាមៗក្រោយពេលញ៉ាំស្គរគ្រាប់ ជន​សង្ស័យ បានដោះយកក្រវឹលនាង ពីត្រចៀក រួចឡើងលើម៉ូតូរបស់ខ្លូន ជិះគេចខ្លូន។ តែជិះចេញ មិន​ទាន់​ផុត​ផ្លូវ ក្នុងភូមិនោះផង អ្នកជិតខាងបានឃើញ រួចស្រែកផ្អើលឆោឡោ ឲ្យអ្នកជិតខាងជួយ ដោយបន្លឺឡើងថា៖ «មានចោរចូលភូមិ លួចដោះក្រវឹលក្មេង»។

ក្រោយពីអ្នកភូមិខាងលើ បានអន្តរាគមន៍ និងស្វាគមន៍ជនសង្ស័យ លួចដោះក្រវឹលក្មេង ម្នាក់មួយដៃមួយ​ជើងតាមកំហឹង ធ្វើឲ្យជនសង្ស័យ រងរបួសទ្រោមខ្លូន រហូតលុះត្រាក្រុមសមត្ថកិច្ចមកដល់។ បុរស ចេង សុជា ត្រូវបានសមត្ថកិច្ច មូលដ្ឋានខណ្ឌពោសែនជ័យ បញ្ជូនខ្លូនទៅអធិការដ្ឋាន ក្រោយពីរកឃើញមាសសុទ្ធ នៅ​នឹងខ្លូន៥ហ៊ុន ដូចដែលកូនស្រ្តីរងគ្រោះបានបាត់។ នេះបើតាមការអះអាង របស់មន្ត្រីសមត្ថកិច្ចមួយរូប។ រីឯ​មាស​សុទ្ធនោះវិញ ត្រូវបានប្រគល់ ត្រឡប់ទៅឲ្យ ម្ចាស់ដើមវិញ៕