ករណីបើករថយន្តទៅបុករនាំងថ្មនេះ បានកើតឡើងនៅថ្ងៃ ទី ១៥ ខែ កញ្ញា ឆ្នាំ ២០១៥ វេលាម៉ោង ២៣ យប់ ដែល​ស្ថិតតាមផ្លូវម៉ៅសេទុង ខាងជើងផ្សារដើមគរ ក្នុងសង្កាត់ផ្សារដើមគរ ខណ្ឌទួលគោក រាជធានី​ភ្នំពេញ បណ្តាលឲ្យរថយន្តដាច់កង់ ទៅមុខមិនរួច។

តាមសាក្សីនៅកន្លែងកើតហេតុ បានឲ្យដឹងថា គេឃើញរថយន្តដែលបង្កខាងលើ ជិះគ្នាបីនាក់បានបើកបរ ក្នុង​ល្បឿនលឿន មានទិសដៅពីត្បូងទៅជើង លុះមកដល់ខាងជើងផ្សារដើមគ ក៏ជ្រុលចង្កូច ទៅបុកក្បាលរនាំង​ថ្ម បណ្តាលឲ្យខូចខាតតិចតួច។

សាក្សីបាននិយាយទៀតថា រថយន្តបង្ក មានប្រភេទកាំរីបាឡែន ពណ៍សរ ពាក់ស្លាកលេខ ភ្នំពេញ 2AF 5929 បើកបរដោយបុរស«ភេទទី៣» មិនស្គាល់អត្តសញ្ញាណ។ ក្រោយពេលកើតហេតុ ពួកគេបាននាំគ្នាចុះ​ពី​រថយន្ត រត់គេចខ្លួនបាត់ដោយ បន្សល់ទុករថយន្តនៅនឹងកន្លែង។

បន្ទាប់ពីកើតហេតុ ក្រុមសមត្ថកិច្ចចរាចរណ៍ផ្លូវគោក បានមកធ្វើការអន្តរាគមន៍ និងបានស្ទូចរថយន្តនោះ យក​ទៅទុកនៅការិយាល័យ​ចរាចរណ៍រាជធានី ដើម្បីរងចាំកាដោះស្រាយ នាពេលក្រោយ៕