ក្រុមបាតុករទាំងនោះ សុទ្ធសឹងជាបណ្ដាជន ម៉ាដេស៊ី (Madhesi) ជនជាតិភាគតិចមួយ ក្នុងចំណោម​​ជនជាតិ​ភាគតិចជាច្រើន ដែលមានការបារម្ភថា ច្បាប់កំពូលដែលបានអនុម័ត្រថ្មី នឹងធ្វើការគៀបសង្កត់ ដោយ​ស្រប​ច្បាប់​ទៅលើពួកគេ។ ច្បាប់រដ្ឋធម្មនុញ្ញថ្មី ដែលបានបែងចែកប្រទេសនេប៉ាល់ ទៅជា៧តំបន់ផ្សេងគ្នា ហើយ​អាច​នឹង​ធ្វើ​ឲ្យ​ចំនួនតំណាងរាស្ត្រ នៅរដ្ឋសភាជាតិ មានការថយចុះ។ នេះបើតាមការផ្សាយឲ្យដឹង របស់​ទី​ភ្នាក់ងារ​​សារព័ត៌មាន​បារាំង អាអេហ្វប៉េ (AFP)។

រលកបាតុកម្មជាថ្មីនេះ បានធ្វើឡើងប្រឆាំងនឹងច្បាប់អាជ្ញាសិក ដែលបានដាក់ឲ្យដំណើរការ បន្ទាប់ពីអំពើ​ហិង្សា​ជាច្រើន បានកើតឡើងនៅក្នុងសប្ដាហ៍ចុងក្រោយនេះ រវាងកងកម្លាំងអាជ្ញាធរ និងក្រុមបាតុករ នៃ​បណ្ដា​ជន​ភាគ​តិច ម៉ាដេស៊ី និង ថារូ (Tharu)។ អំពើហិង្សាក្នុងពេលកន្លងមក បានធ្វើឲ្យមនុស្ស៤០នាក់ បាត់​បង់​​ជីវិត នៅ​ទូទាំង​ប្រទេស។

នាយនគរបាលប្រចាំតំបន់ បានថ្លែងប្រាប់ទីភ្នាក់ងារ តាមទូរស័ព្ទថា៖ «មនុស្សម្នាក់ត្រូវបានសម្លាប់ នៅពេល​ដែលកងកម្លាំងអាជ្ញាធរ បានបើកការបាញ់ប្រហារ បន្ទាប់ពីមនុស្សរាប់ពាន់នាក់ បានចេញមកដើរនៅ​តាម​ផ្លូវ ដែលល្មើសនឹងច្បាប់អាជ្ញាសឹក» នាយនគរបាលនោះ បានអះអាងទៀតថា ក្រុមបាតុករបានធ្វើការវាយ​ប្រហារ ទៅលើកងកម្លាំងនគរបាល ដោយប្រើដុំថ្ម និងដប។ លោកបានបន្ថែមថា មានអ្នករងរបួសច្រើន​នាក់ ទាំង​សង​ខាង។

សូមបញ្ជាក់ដែរថា រដ្ឋធម្មនុញ្ញថ្មី ត្រូវបានអនុម័ត្រកាលពីថ្ងៃពុធ ដោយសម្លេងភាគច្រើន នៅក្នុងរដ្ឋសភា​នៃ​ប្រទេស​នេប៉ាល់។ យ៉ាងណាក៏ដោយ ក៏តួលេខខាងលើនេះ នៅមិនទាន់មានការបញ្ជាក់អះអាង ពីប្រភព​ឯករាជ្យ​ណា​ផ្សេង​ទៀត​នៅឡើយ មកទល់នឹងម៉ោងនេះ៕