ហេតុការណ៍អគ្គីភ័យមួយ បានកើតឡើង នៅថ្ងៃទី១៩ ខែសីហា ឆ្នាំ២០១៥ វេលាម៉ោង ៣ និង ៤០នាទីទាបភ្លឺ នាភូមិប៉ាលីល័យ២ សង្កាត់ប៉ាលីល័យ ក្រុងប៉ោយប៉ែត ខេត្តបន្ទាយមានជ័យ ហើយបានឆាបឆេះ ផ្ទះរបស់​ប្រជាពលរដ្ឋមួយខ្នង បណ្តាលឲ្យខូចខាតទ្រព្យសម្បត្តិ នៅក្នុងផ្ទះទាំងស្រុង។

ម្ចាស់ផ្ទះឈ្មោះ សោម ឡាំ អាយុ ៦២ឆ្នាំ បាននិយាយថា ផ្ទះដែលត្រូវភ្លើងឆេះនេះ ផ្នែកខាងលើសង់ពីឈើ និង​ខាងក្រោមសង់ពីថ្មទាំងស្រុង ហើយមានទំហំទទឹង ៨ ម៉ែត បណ្តោយ ៩ ម៉ែត ដំបូលប្រក់ សង្ក័សី។

នៅពេលភ្លើងកំពុងតែឆាបឆេះ ប្រជាពលរដ្ឋនៅជិតខាង និងសមត្ថកិច្ចបាននាំគ្នាជួយពន្លត់ដែរ តែគួរឲ្យ​សោក​ស្តាយ ទោះខំប្រឹងយ៉ាងណា ក៏នៅតែជួយមិនបាន។ ប៉ុន្តែជាសំណាងល្អ ដែលម្ចាស់ផ្ទះមិនបានរងរបួស​អ្វី​ឡើយ នៅក្នុងហេតុកាតណ៍នេះ ហើយអគ្គីភ័យ ក៏មិនបានរាលដាល ដល់ផ្ទះអ្នកជិតខាងដែរ គ្រាន់តែបាត់បង់​ទ្រព្យ​សម្បត្តិ​តែប៉ុណ្ណោះ។

លោក អ៊ុំ សុផល អធិការក្រុងប៉ោយប៉ែត បានលើកឡើងថា មូលហេតុដែលបង្កឲ្យមានអគ្គីភ័យឆាបឆេះ ខាង​លើនេះ គឺបណ្តាលមកពីទូស្សេខ្សែភ្លើង។ រីឯទ្រព្យសម្បត្តិ ដែលបាត់បង់មានប្រាក់បាតចំនួន ៣ ម៉ឺនបាត និង​មាសមួយតំឡឹង (មាសដូចជាមិនរលាយ ទៅណាទេ[?])៕